قالامگەردىڭ ەكىنشى ءومىرى

استاناداعى ۇلتتىق اكادەميالىق كىتاپحانادا كورنەكتى جازۋشى, مەملەكەتتىك سىيلىقتىڭ جانە م.اۋەزوۆ اتىنداعى ۇلتتىق سىيلىقتىڭ سونداي-اق, م.شولوحوۆ اتىنداعى حالىقارالىق سىيلىقتىڭ لاۋرەاتى, «قۇرمەت» جانە «پاراسات» وردەندەرىنىڭ يەگەرى دۇكەنباي دوسجاننىڭ  رۋحىنا ارنالعان «تارلانبوز» جانە جازۋشىنىڭ زايىبى ساۋلە دوسجاننىڭ «مەنىڭ جالعىز سەرىگىم» اتتى كىتاپتار تۇساۋكەسەرى, سونىمەن قاتار, قالامگەر مۇراجايىنىڭ اشىلۋ سالتاناتى بولىپ ءوتتى. كوزى تىرىسىندە-اق وقىرمان ماحابباتىنا بولەنگەن قالامگەر دۇكەنباي دوسجاننىڭ جازۋعا دەگەن قۇشتارلىعى ەرتە كەزدەن باستالعان. ول ءوزىنىڭ العاشقى «كوكپار» اڭگىمەسىن 15 جاسىندا جازعان بولاتىن. بۇل كۇندە جازۋشىنىڭ كىتاپتارى الەمنىڭ 20-دان استام  تىلدەرىنە اۋدارىلىپ, جالپى جيىنى 3,7 ميلليون تارالىممەن باسىلىپ شىققان. كىتاپ پالاتاسىنان قازاقستانداعى ەڭ كوپ وقىلاتىن جازۋشى كۋالىگىن العان. كەش بارىسىندا قالامگەردىڭ وتكەن ءومىرىنىڭ قىزىعى مەن شىجىعىنا, ءاردايىم شىڭعا ورمە­لەيتىن ەڭبەكقورلىعىنا, كونبىس, كەڭقولتىق مىنەزى تۋراسىندا ەرەكشە تولعانىسپەن, تەبىرەنە ءسوز قوز­عالدى. دۇكەنباي اعا تۋرالى دەرەكتى فيلم كور­سەتىلدى. ەسكە الۋ كەشىندە قايراتكەر ءادىل احمەتوۆ, جازۋشى الدان سمايىل, حالىق قاھارمانى باقىتجان ەرتاەۆ, جازۋشى, دراماتۋرگ سۇلتان ورازالين, اقىن نەسىپبەك ايت ۇلى, فيلولوگيا عىلىمدارىنىڭ دوكتورى, پروفەسسور سەرىك نەگيموۆ جازۋشى تۋرالى تولعامدى ەستەلىكتەرىن ايتتى.  اسىرەسە, دۇكەڭنىڭ  زامانداس, بىرگە جۇرگەن  ۇزەڭگىلەس دوستارىنىڭ ايتقان قىزىقتى ەستەلىكتەرى بىردە كۇلدىرسە, ەندى بىردە كەلگەن قوناقتاردىڭ كوڭىلىن بوساتتى. كەش­تە ادەبيەتتى ءومىرىنىڭ ءمانى ساناعان, اسا ءونىمدى جازۋ­شى د.دوسجاننىڭ جاعداي تالعاماي, قاعازدان باس كوتەرمەي جازاتىن جانكەشتى ەڭبەكقورلىعى, قاي­سار­لىعى مەن شىدامدىلىعى تىلگە تيەك ەتىلدى.  سون­داي-اق, قالامگەردىڭ جارى, اقىن, قازاقستاننىڭ ەڭبەك سىڭىرگەن قايراتكەرى ساۋلە دوسجاننىڭ «مەنىڭ جالعىز سەرىگىم» اتتى ولەڭىندەگى: جەر سياقتى مەنىڭ جالعىز سەرىگىم, ماعان باستاپ الىپ كەلدى سەنى كىم؟ قۋ تىرلىكتە جانسەبىلدەپ جۇرگەندە, تاعدىرىڭدى تاعدىرىما تەلىدىڭ, – دەپ باستالاتىن جىر جولدارى  ومىرلىك سەرىگىنە دەگەن قيماستىق سەزىمىن ايشىقتادى. د.دوسجان ءوزىنىڭ تىرناقالدى «وتىرار», «فارابي», «جىبەك جولى» سەكىلدى سۇيەكتى شىعارمالارى ارقىلى تاريحي تاقىرىپتىڭ پيونەرى اتاندى. ۇلتتىق قاۋىپسىزدىك كوميتەتىنىڭ الپىس جىلداي جابۋلى ارحيۆىنە تۇڭعىش ەنگەن جازۋشى قۇجاتتار ىزىمەن «اباقتى» (1992) دەرەكتى كىتابىن جانە 1986 جىلعى جەلتوقسان وقيعاسى تۋرالى «الاڭ» (1993) رومانىن جازدى. زەرتتەۋشىلەر د.دوسجان شىعارماشىلىعىن ءۇش سالاعا ءبولىپ ءجۇر. ءبىرىنشى: كونە عاسىر قويناۋىنان ەر تۇرىك ارۋاعىن كوتەرگەن 60-جىلدار باسىنداعى تاري­حي كىتاپتارى. ەكىنشى: بوداندىق بۇعاۋ مەن شەنەۋنىكتەر شار­­پىسۋىنان ۇلتتىق رۋحىن جوعالتقان ءومىرزايا ۇرپاق­تار وبرازىنىڭ گالەرەياسى «زاۋال», «داريا», «تابالدىرىعىڭا تابىن», «جولبارىستىڭ سۇرلەۋى», «كىسى اقىسى» تۋىندىلارىنان تابىلادى. ءۇشىنشى: عاجايىپ ادامدار عۇمىرىن كوركەم تىلمەن سويلەتكەن «مۇحتار جولى» (1988), «ابايدىڭ رۋحى» (1994, 2008), «الىپتىڭ ازابى» (1997) روماندارى. ۇلتتىق اكادەميالىق كىتاپحانادا دۇكەنباي دوسجان ۇلىنا ارنالعان مۇراجاي اشىلدى. وندا جازۋشىنىڭ كيىمدەرى, كىتاپتارى, ماراپاتتارى, جازۋ ۇستەلى مەن تۇتىنعان زاتتارى, ەستەلىك فوتوسۋرەتتەرى قويىلعان. راۋشان تاۋىرحانقىزى, «ەگەمەن قازاقستان»