ەلوردا قاي باعىتتا دا ۇلگى كورسەتۋى كەرەك

 ەلباسى نۇرسۇلتان نازارباەۆ استانا قالاسىنىڭ اكىمى ادىلبەك جاقسىبەكوۆتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى. ءا.جاقسىبەكوۆ مەملەكەت باسشىسىنا ەلوردانىڭ الەۋمەتتىك-ەكونوميكالىق دامۋى, نەگىزگى مەملەكەتتىك باعدارلامالاردىڭ جۇزەگە اسىرىلۋ بارىسى جانە الداعى كەزەڭگە ارنالعان جوسپارلار تۋرالى باياندادى. كەزدەسۋ بارىسىندا قازاقستان پرەزيدەنتى وڭىرلىك جالپى ءونىمىنىڭ كولەمى 4 تريلليون 560 ميلليارد تەڭگەگە جەتكەن قالا بۇگىندە ءوسىم قارقىنى بويىنشا ەلدە ءبىرىنشى ورىندا تۇرعانىن ايتتى. سونىمەن قاتار, نەگىزگى كاپي­تالعا سالىنعان ينۆەستيتسيالار كولەمىنىڭ ءوسىمى بايقالۋدا, بىل­تىرعى جىلدىڭ قورىتىندىسى بويىنشا ول 770 ميلليارد تەڭگە بولدى. شاعىن جانە ورتا بيزنەس سۋبەكتىلەرىنىڭ سانى 2014 جىلى 93 مىڭ بولسا, قازىرگى كەزدە 105 مىڭعا دەيىن جەتتى. شاعىن جانە ورتا بيزنەس سەكتورىنداعى قوسىمشا قۇننىڭ جيىنتىق ۇلەسى قالا ەكونوميكاسىنىڭ جالپى كولەمىنىڭ 62 پايىزىنا جەتەعابىل. بيىل 2,1 ميلليون شارشى مەتر كولەمىندە باسپانا پايدالانۋعا بەرىلەدى دەپ جوسپارلانعان, 2014 جىلى بۇل كورسەتكىش 1 ميلليوننىڭ شاماسىندا بولعان ەدى. مەملەكەت باسشىسى الەۋمەتتىك دامۋ ينديكاتورلارى اراسىنان جۇمىسسىزدىق دەڭگەيىنىڭ تومەن ەكەنىن جانە 6 مىڭ بوس جۇمىس ورنى بار ەكەنىن ايتىپ ءوتتى. وتكەن جىل قورىتىندىسى بويىنشا, استانادا جان باسىنا شاققانداعى ورتاشا تابىس 3,7 ميلليون تەڭگە بولدى. ەلوردادا بالالاردىڭ 84,5 پايىزى مەكتەپكە دەيىنگى بىلىممەن قامتىلعان, بالاباقشالار مەن مەكتەپتەر قۇرىلىسى جالعاسۋدا. 2015 جىلى جاڭا تۋعان 100 مىڭ سابيگە شاققاندا انا ءولىمى 7 ادامعا تەڭ بولسا, بيىلعى ءبىرىنشى توقساندا بۇل كورسەتكىش نولگە تەڭەستى. نۇرسۇلتان نازارباەۆ قالانى دامىتۋعا كاپيتال سالۋ ءتيىمدى بولىپ شىققانىنا, بۇگىندە ونىڭ ورنى تولىپ جاتقانىنا دا نازار اۋداردى. – بۇل – قۋانتارلىق كورسەت­كىش­تەر, ول مەملەكەتتىڭ, ءبىرىنشى كەزەكتە, قالا اكىمدىگىنىڭ سىندار­لى جۇمىسىنىڭ ناتيجەسى بولىپ تابىلادى. وسى جۇمىستى جال­عاس­تىرۋ كەرەك. ەلوردا بارلىق باعىت بويىنشا ۇلگى كورسەتۋگە ءتيىس. «اقىلدى قالانى», بالاما ەنەر­گەتيكانى دامىتۋ, جىلۋمەن جابدىقتاۋ, كوشەلەردى اباتتان­دىرۋ, اۆتوتۇراقتار سالۋ باعى­تىندا كوپ نارسە جاسالۋدا. قالا جاقسى دامىپ كەلەدى جانە بۇعان قاجەتتى ءوز قاراجاتى دا بار, – دەدى قازاقستان پرەزيدەنتى. مەملەكەت باسشىسى كەزدەسۋ قورىتىندىسى بويىنشا بىرقاتار ناقتى تاپسىرما بەردى. سۋرەتتى تۇسىرگەندەر س.بوندارەنكو, ب.وتارباەۆ