استانا. 14 مامىر. جەر رەفورماسى جونىندەگى كوميسسيا وتىرىسىندا قاتىسۋشىلار حالىقتىڭ كوكەيىندە جۇرگەن ساۋالداردى كوتەرىپ, قازاق دالاسىنىڭ قادىر-قاسيەتىن بارىنشا باعالاۋ قاجەتتىگىن العا تارتتى. سونىمەن قاتار, ولار بوس جاتقان جەردى يگەرۋ ءۇشىن الدىمەن اۋىلدى دامىتىپ, جاستاردى سول اۋىلدارعا ورنالاستىرۋ كەرەك ەكەنىن مالىمدەدى. بۇل تۋرالى egemen.kz تiلشiسi حابارلادى.
كوميسسيا مۇشەسى مۇرات ابەنوۆ جاستار اراسىندا جەر ماسەلەسىندە بىرجاقتى عانا تۇسىنىك قالىپتاسقانىن ايتتى. ول: «بۇگىنگى تاڭدا ەلىمىزدىڭ جاستارى جەر ماسەلەسىنە قاتىستى تەك وزدەرىنىڭ ىشكى ەموتسياسىن عانا ءبىلدىرىپ ءجۇر. شىندىعىنا كەلگەندە جەر رەفورماسى نە ءۇشىن جاسالىپ جاتىر, نارىقتىق اينالىمعا ەنگىزۋ نە ءۇشىن قاجەت دەگەن ماسەلەلەردى ولار تەرەڭ بىلمەيدى. سوندىقتان ءبىز جەر رەفورماسى نە ءۇشىن جاسالعانىن جاستارعا كەڭىرەك ءتۇسىندىرۋىمىز كەرەك», – دەدى قوعام قايراتكەرى. سونداي-اق, مۇرات ابەنوۆتىڭ ايتۋىنشا, كەيىنگى جىلدارى قالانىڭ ادامدارى اۋىلعا كوپ باراتىن بولعان.
«قالادا وقىعان قازاقتىڭ جاس جىگىتتەرى اۋىلدان كاسىپ اشىپ, جۇمىس جاساۋدى كوزدەۋدە. سەبەبى ولار اۋىلدىق جەرلەردىڭ جەرىن يگەرۋدە ءتيىمدى جاعىن بايقادى. ال اۋىلدىڭ جاستارى كەرىسىنشە, قالاعا قاشىپ جاتىر. سوندىقتان وسى جاعدايدى دۇرىستاۋ ءۇشىن جاستارعا كوبىرەك اقپارات بەرۋىمىز كەرەك», – دەدى ول.
ال كوميسسيا مۇشەسى نۇرلان ەرىمبەتوۆ بوس جەرلەردى يگەرۋ ءۇشىن الدىمەن الەۋمەتتىك تۇرعىدا قاراۋ كەرەك دەپ سانايدى.
«ءبىز الدىمەن اۋىل حالقىن ەسەپكە الۋىمىز كەرەك. ولاردىڭ تۇرمىس-تىرشىلىگىنە ءۇڭىلىپ, جۇمىسپەن قامتىلۋىن قامتاماسىز ەتكەنىمىز دۇرىس. سوسىن بارىپ بوس جەرلەردى يگەرۋگە كوشكەن ءجون. وتاندىق كاسىپكەرلەردى, شەتەلدىك ينۆەستورلاردى تارتقانىمىز ابزال. حالىقتىڭ جەر ساتىلادى نەمەسە جالعا بەرىلەدى, سوسىن جەرىمىزدەن ايرىلىپ قالامىز دەپ قورقۋىنا نەگىز جوق. زاڭ بار, قاداعالاۋشى ورگان بار, بيلىك بار. ولار جەرىمىزدى تارتىپ الىپ نەمەسە ازاماتتىق الىپ تۇراقتاپ قالمايدى. ەڭ باستىسى ينۆەستور ارقىلى ءبىز جاڭاشىلدىقتى ۇيرەنەمىز, جەرىمىزدى ءتيىمدى پايدالانامىز, جەرگىلىكتى تۇرعىنعا جۇمىس بولادى», – دەيدى ول.
تالعات رايىمبەك.
دەرەك, فوتو: egemen.kz.