استانا. 14 مامىر. بۇگىن جەر رەفورماسى جونىندەگى كوميسسيا وتىرىسى وتۋدە. شارا بارىسىندا قوعام قايراتكەرلەرى مەن كاسىپكەرلەر جەر ماسەلەسى جايىندا ءوز ويلارىن جەتكىزدى. بۇل تۋرالى egemen.kz ءتىلشىسى حابارلادى.
«جاقسىلىق» شارۋا قوجالىعىنىڭ توراعاسى, قوعام قايراتكەرى جاقسىلىق ۇشكەمپىروۆ كوميسسيا وتىرىسىندا جەر ماسەلەسىنە بايلانىستى ءوز ويىن ءبىلدىردى. ونىڭ ايتۋىنشا, بوس جاتقان جەرلەردى پايدالانۋ ءۇشىن شەتەلدىك ينۆەستورلاردى تارتۋ كەرەك. ول: «نەگە ءبىز شەتەلدىك اۋىل شارۋاشىلىعى تاۋارلارىن يمپورتتاي بەرەمىز؟ نەگە ءبىز اقشامىزدى سىرتقا شاشامىز؟ بۇلاي بولمايدى. ءبىز قايتا ينۆەستور تارتىپ, جەرگە جان ءبىتىرىپ, كۇتىپ-باپتاپ, ماقساتتى پايدالانىپ, ءوز ونىمدەرىمىزدى ەكسپورتقا شىعارۋىمىز كەرەك. ول ءۇشىن ۇكىمەت جەر كودەكسىن قايتا قاراپ, كەيبىر باپتارىنا راسىمەن تۇزەتۋلەر ەنگىزىپ, جەردى وتاندىق كاسىپكەرلەرگە جەكەمەنشىككە بەرۋى كەرەك. سوندا عانا كاسىپكەرلەر اۋىلشارۋاشىلىق سالاسىنا تولىق بەت بۇرادى. ال شەتەلدىكتەرگە جالعا بەرۋ دەگەندى ءالى دە اقىلداسۋ كەرەك, ويلانۋ كەرەك», – دەدى.
ال قىزىلوردا وبلىسىنداعى «رزا» جاۋاپكەرشىلىگى شەكتەۋلى سەرىكتەستىگىنىڭ توراعاسى سامۇرات يماندوسوۆ جەردى وتاندىق بيزنەس وكىلدەرىنە جەكەشەلەندىرىپ بەرۋ قاجەت دەپ سانايدى. «ەلىمىزدە ميلليونداعان اۋىلشارۋاشىلىق ماقساتىنداعى جەرلەر بوس جاتىر. سوندىقتان قاراۋسىز قالعان جەردىڭ توپىراعى توزىپ, ارام ءشوپ قاپتاپ كەتكەن. مەنىڭ ويىمشا, مەملەكەت وسىنداي جەردى كاسىپكەرلەرگە بەرۋ كەرەك. بۇدان ەلىمىز ەش ۇتىلمايدى. قايتا سول كاسىپكەر ارقىلى اۋىلدىڭ ەكونوميكاسى داميدى. حالىققا جۇمىس كۇشى بولادى. جەرگىلىكتى تۇرعىندار ناپاقاسىن وسىلاي تابادى», – دەيدى ول.
ايتا كەتەيىك, جەر رەفورماسى جونىندەگى كوميسسيا وتىرىسى ۇلتتىق مۋزەيدە وتۋدە. وندا كوميسسيا مۇشەلەرى ءوز وي-پىكىرلەرىن ايتىپ, حالىقتىڭ كوكەيىندەگى ماسەلەنى قوزعاپ جاتىر.
تالعات رايىمبەكوۆ.
دەرەك, فوتو: egemen.kz.