قازىر بارلىق بۇقارالىق اقپارات قۇرالدارىندا جەر كودەكسىنە ەنگىزىلەتىن وزگەرىستەردىڭ ماسەلەسى جايلى ساعات سايىن جازىلىپ جاتىر. اسىرەسە, جاستار كوپ قولدانىلاتىن زاماناۋي ينتەرنەت جەلىلەرىندە ءارتۇرلى پىكىرلەردىڭ جۇرگەنى الاڭداتادى. ويتكەنى, جەردى جالعا بەرۋ, بەرمەۋ, شەتەلدىكتەرگە بەرىلۋى جايلى كەلسىن-كەلمەسىن, ماسەلەنىڭ مانىسىنە بارماستان وي ايتاتىندار دا بار ەكەنىن كوزىمىز شالادى.
وسىنداي جايتتاردى ەسكەرگەندىكتەن دە ەلباسى جەر زاڭناماسىنىڭ كەيبىر نورمالارىنا موراتوري جاريالاپ, ونى ۇكىمەت جانىنان قۇرىلاتىن كوميسسيا ارقىلى تالقىلاۋعا سالۋدى ۇسىنىپ وتىر. بۇل دۇرىس قادام دەپ ويلايمىن.
ارينە, بارىمىزگە كىشكەنتايىمىزدان بەلگىلى, قۇلاعىمىزعا قۇيىپ وسكەن ءبىر ءسوز بار: ول – اتامەكەن, تۋعان جەر, كەڭ دالا, ەلىمىز, اتا-بابامىزدىڭ جەرى. بۇل سوزدەر عۇمىر بويى ءار قازاقتىڭ جۇرەگىندە جۇرەدى. ول – بويتۇمارى. سول ءۇشىن دە جەر دەگەن سوزگە باسقا ءبىر تىركەستەر جالعانىپ كەتە بارسا قازىر قولىمىزدان شىعىپ كەتەردەي, الىپ سارى دالامىزدى بىرەۋلەر كوتەرىپ الىپ كەتەردەي ۇلارداي شۋلاپ شىعا كەلەمىز. اتا-بابامىز جاۋگەرشىلىك زاماندا قارا قازان, سارى بالانىڭ قامى ءۇشىن اتقا قوندى. وسىناۋ جەردى باتىر اتا-بابالارىمىز نايزانىڭ ۇشىمەن, بىلەكتىڭ كۇشىمەن قورعاپ, عاسىرلار بويى كوزدەرىنىڭ قاراشىعىنداي ساقتاپ بۇگىنگى ۇرپاققا مۇرا-امانات ەتىپ قالدىردى. ەندى جەر ماسەلەسىن شەشۋ ءۇشىن, ونىڭ يگىلىگىن ۇرپاقتارىمىز كورۋ ءۇشىن وسى قازاق جەرىندە تۇرىپ جاتقان بارلىق حالىقتىڭ وي-پىكىرلەرىمەن ساناسۋ كەرەك. عالىمدار, زەرتتەۋشىلەر, ماماندارىمىز بار ءبارى بىرلەسىپ كورشى ەلدەردىڭ تاجىريبەسىن, جىلدار بويى قوردالانعان ماسەلەلەرىن انىقتاپ بارىپ, ەل ءىشىن ارالاپ جەر كودەكسىنە ەنگىزىلگەن بارلىق جاڭاشىلدىق, جاڭالىقتاردىڭ انىق-قانىعىن تالداپ, تۇسىندىرمەسە بولمايدى. ءبىزدىڭ ءبىر كەمشىلىگىمىز وسى. جەر ساتىلادى, شەتەلدىكتەر كەلەدى دەپ قاراداي ابدىرادى حالىق. جاڭاشىلدىقتار, وزگەرىستەر حالىققا جەتپەيدى. بۇل ەندى جەرگىلىكتى اكىمدىكتەردىڭ كۇندەلىكتى جۇمىسى عوي. حالىقپەن, جۇرتشىلىقپەن بايلانىس ماسەلەسى سىرت قالىپ قويعانداي. جەردى يگەرۋ وڭاي شارۋا ەمەس. ءۇيىڭنىڭ قاسىنداعى باۋ-باقشانى جاز بويى كۇتىپ-باپتاۋ ءۇشىن دە ەڭبەكتەنەسىڭ. ال, ونىڭ قاسىندا جەر الىپ, وعان ءونىم ەگىپ, ەلىمىزدىڭ اۋىل شارۋاشىلىعىن دامىتۋعا ۇلەس قوسۋ ناعىز ەڭبەك. «ەل – ىرىستىڭ كىلتى, ەر – ىرىستىڭ قورعانى» دەيدى حالقىمىز, ولاي بولسا جەردىڭ يگىلىگىن حالقىمىز كورىپ جاتسا, ودان ۇتارىمىز انىق.
باقىتجامال ماقسىلوۆا,
وبلىستىق «نۇر انا الەمى» قوعامدىق بىرلەستىگىنىڭ ءتورايىمى
پاۆلودار وبلىسى