قوستاناي. 12 مامىر. قوستاناي قالاسىنداعى جەدەل باسقارۋ ورتالىعىنا 5 ايدىڭ ىشىندە تۇرعىنداردان 60 مىڭعا تارتا دابىل تۇسكەن. ولاردىڭ اراسىندا 38 مىڭ قىلمىس اشىلىپ, 7 مىڭ قۇقىق بۇزۋشىلىق انىقتالعان. بۇل تۋرالى وبلىستىق ىشكى ىستەر دەپارتامەنتى ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
قوستاناي قالاسىنداعى جەدەل باسقارۋ ورتالىعىن قالالىق ىشكى ىستەر باسقارماسىنىڭ «جۇرەگى» دەپ ايتۋعا بولادى. مۇندا «102» نومەرى ارقىلى تىنىمسىز دابىل ءتۇسىپ جاتادى. پوليتسيانىڭ جۇمىسى دا وسى تۇسكەن دابىلدار ىزىمەن قۇرىلادى.
قوستانايداعى جەدەل باسقارۋ ورتالىعى 2005 جىلى قۇرىلعان بولاتىن. ول ىشكى ىستەر ورگاندارىنىڭ قۇقىق بۇزۋشىلىقپەن كۇرەسىنىڭ, ءتارتىپ ورناتۋداعى جۇمىسىنىڭ تيىمدىلىگىن ارتتىرىپ, بىردەن ناتيجەسىن كورسەتتى. ورتالىقتا كەزەكشىلەر تەلەۆيزيالىق مونيتوردان 179 كامەرانى باقىلاپ وتىرادى. ونىڭ ىشىندە 112 كامەرا قوعامدىق ورىندارعا قويىلعان, قالعاندارى تۇرعىن ۇيلەردىڭ اۋلاسىندا تۇر.
قوستاناي قالالىق ىشكى ىستەر باسقارماسى جەدەل باسقارۋ ورتالىعىنىڭ باستىعى, كاپيتان اسىلبەك بيكەنوۆ: «جەدەل باسقارۋ ورتالىعىنىڭ قىزمەتكەرلەرى ىشكى ىستەر باسقارماسىنىڭ جۇمىسىن ۇيلەستىرەدى. ورتالىقتا بارلىعى دا اۆتوماتتاندىرىلعان. مىسالى, «102» ارقىلى دابىل تۇسىرگەن ادامنىڭ تەلەفونى كورىنەدى, سول ساتتە داۋىسى جازىلادى. ەگەر زارداپ شەككەندەر بولسا «جەدەل جاردەممەن» تىكەلەي بايلانىس قوسىلادى», – دەدى.
ءنازيرا جارىمبەتوۆا.
دەرەك, فوتو: قوستاناي وبلىستىق ىشكى ىستەر دەپارتامەنتى ءباسپاسوز قىزمەتى.