وقىعان كىسىلەردەن ەستىپ, كىتاپحانالاردان ىزدەپ, گازەتتەن گازەت قويماي, اقىرى «ەگەمەن قازاقستان» گازەتىنىڭ وسى جىلعى 11 ناۋرىزداعى «شارق ۇرعان قىران ەدىم كەڭ دالانى...» اتتى عابيت ءىسكەندەر ۇلىنىڭ اقىن ومىرزاق قوجامۇراتوۆپەن «سىرتتاي سۇحباتىن» مۇقيات وقىپ شىقتىم. زامانداسىم, دوستىعىمىز جاراسقان, جۇرەگىنىڭ جىلۋىن اياماعان التىنداي ازامات-اقىننىڭ جالىندى جىرلارىنىڭ وتتاي شارپىعان ورنەكتەرىنە تاعى ءبىر مارتە تۇششىندىم. ءو.قوجامۇراتوۆتىڭ باسقاعا ۇقسامايتىن بولمىسىن بىلەتىندەردىڭ بارلىعىنا قۋانىپ, اۆتور ءتىلىنىڭ ۋىتتىلىعىنا ريزا بولىپ, اتىنا ارنايى شەكسىز راحمەتىمدى ايتقىم كەلدى!
ءيا, ءو.قوجامۇراتوۆ دارىنىمەن اقىندىعىن تانىتىپ, قىلشىلداعان قىرىقتىڭ ۇستىندە جارىق دۇنيەمەن ماڭگى قوشتاسىپ, باقيلىققا اتتاندى. تۋعانىنا 80 جىل تولىپ, اقىننىڭ مەرەيتويى وتەتىن ءساتتى جىلى وسى جىل بولاتىن...
اقىننىڭ 60 جىلدىعى ازەر دەگەندە ءوزى وسكەن تامدىسىندا, 70 جىلدىعى ونى بىلەتىن ازعانا كىسىلەر توبىمەن الماتىدا وتكەنىن بىلەتىنبىز. باسىمىزدان وتكەن توقىراۋ, كەڭەس وداعى ىدىراپ, ءار ەل ءوز ەگەمەندىگىن الا سالا, ىرگەسىن, شاپانىنىڭ ەتەگىن جيا باستاعان ءدۇبىرلى كەزەڭ ومىرزاق وسكەن تاۋەلىباي وڭىرىندەگى قازاقتاردىڭ دا تارىداي شاشىلىپ, اتاجۇرتقا قونىس اۋدارۋىنا اكەلدى.
اسا دارىندى, ءبىتىمى بولەك, جەرى مەن ەلىن شەكسىز ءسۇيىپ, ول ءجونىندە جالىندى جىرلار جازعان ءو.قوجامۇراتوۆتى وزبەكستاننىڭ تاۋەلىباي وڭىرىندە بىلمەيتىن جان بولماعان-دى. مەكتەپ قابىرعاسىندا جۇرگەندە-اق وڭەشىن ورتەگەن ولەڭىن جازا باستاپ, جىل وتكەن سايىن «جۇمىر جەرگە جۇرەك بولىپ وت بەرىپ», الىستاعى اتاجۇرتقا تانىلعانى ونىڭ ءومىرىنىڭ شىندىعى ەدى. اقىن جىرلارىندا, دۇنيەتانىمىندا, ومىرگە دەگەن سۇيىسپەنشىلىگىندە باسقالاردا سيرەك كەزدەسەتىن قاسيەت – تۇتاستىق بار ەدى. وسى قاسيەت ادەپتەن-اق قازاقتىڭ جىر الىپتارىنىڭ جىلى لەبىزىنە, اۋزىنا ءىلىندىرىپ تانىتتى دا. بىراق باسقانىڭ وزىنە بەرگەن ازارىنا شىداماي, از عانا ءومىرىن ازاپ پەن قاسىرەتتىڭ قۇربانىنا اينالدىرىپ الدى. ومىرزاقتىڭ مۇنداي جاعدايعا تۇسۋىنە سول كەزدەگى تالانتتى باعالامايتىن قوعامنىڭ ۇر دا جىق ۇلىقتارىنىڭ قياناتى سەبەپ ەدى.
قازاق پوەزياسىنىڭ الىپتارىمەن كەزدەسكەندە ءو.قوجامۇراتوۆتىڭ ولەڭىنە بەرىلگەن باعا قانشاما. ولار جازىلىپ تا, ايتىلىپ تا ءجۇر. اقىننىڭ اتىن ماڭگى ەستە قالدىرۋ ماقساتىندا تۋعان جەرىندە مەكتەپكە ەسىمى دە بەرىلگەن. ال قازىرگى كەزدە جاس ۇرپاق ونىڭ وتتى ولەڭدەرىن جاتقا وقيدى. ولاردى ەستىسەڭ, ءجۇرەگىڭدى جىلىتىپ, جانىڭدى راحاتقا بولەيدى, ەرىكسىز ىرعاعىنا جانىڭ تەربەلگەندەي كۇي كەشەسىڭ.
زامانىندا ومىرزاق قوجامۇراتوۆتىڭ شىنايى دارىنىن تانىپ, قولۇشىن بەرگەن تانىمال سىنشى زەينوللا سەرىكقالي ۇلى اقىندى كوزى تىرىسىندە الماتىعا الدىرىپ, «وي كەشۋ», «كۇن استىندا قۇدىرەت» اتتى كىتاپتارىن باستىرتقانى ونىڭ ازاماتتىعىنىڭ بەلگىسى ەمەس پە! ول, ءسىرا, ۇمتىلار ما؟ وسىندايدا اقىننىڭ ۇلىلىعىن تانىتاتىن پوەزيا كەشىن ۇيىمداستىرىپ, 80 جىلدىق مەرەيتويىن اتاپ وتۋگە اتسالىساتىن ازاماتتار تابىلسا عوي...
مەنىڭشە, ولەڭ-جىردىڭ قۇدىرەتىن تەرەڭ تۇسىنەتىن ادامداردىڭ ومىرزاق قوجامۇراتوۆتى ۇمىتۋى مۇمكىن ەمەس. ونىڭ جىرلارىنىڭ ومىرشەڭدىگى جىرعا ىنتىق تالاپكەرلەردىڭ دە شابىتىن شارىقتاتاتىنى داۋسىز.
ۇسەباي جۇمابەكوۆ,
ارداگەر-زەينەتكەر
قوستاناي وبلىسى,
رۋدنىي قالاسى