سەمەيدەگى ءساندى سۋبۇرقاق

جەڭىس كۇنى قۇرمەتىنە اشىلدى سەمەيدىڭ ورتالىق الاڭىندا مۋزىكاسى ويناپ تۇراتىن جاڭا سۋبۇرقاق اشىلدى. قالا كىندىگىندەگى كوككە شاپ­شىعان ءمولدىر سۋلارىمەن, عاجايىپ سازىمەن, مىڭ بۇرالعان بيىمەن ءھام كورەر كوزگە كوركەم ءتۇرلى-تۇستىلىگىمەن باۋراعان بۇل ەرەكشە فونتان نىسانىنا وبلىستىق بيۋدجەتتەن 205 ميلليون تەڭگە جۇمسالدى. ونىڭ كوككە تىك شانشىلعان سۋلارىنىڭ بيىكتىگى 18 مەترگە دەيىن جەتەدى. قۇرىلىسى وتكەن كۇزدە باستالىپ, 9 مامىر – جەڭىس كۇنىندە پايدالانۋعا بەرىلدى. سۋبۇرقاق قۇرىلىسىن «سەمەي­پلاستكوم» كاسىپورنى جۇرگىزگەن. قالا قاۋىمى كوپ جينالعان تۇساۋ­كەسەردە نىساننىڭ تۇرعىندار كوڭىلىنەن شىققانى اڭعارىلدى. «سۋبۇرقاقتىڭ ءوز ديامەترى 30 مەتردى قۇراسا, جوعارى توستاعانىنىڭ بيىكتىگى 8 مەترگە تەڭ. سۋ ىشىندە 280 ديودتى جارىق شامدارى ورناتىلعان. ال ەڭ باس­تى اعىسى جەردەن 18 مەتر بيىكتىككە دەيىن شاپشيدى. ءتورت جاعىندا 4 باعانا ورنالاسقان. سۋ اعىستارى تانىمال كلاسسيكالىق شىعارمالارمەن بىرگە بەس ءتۇرلى تۇسپەن كومكەرىلە كوتەرىلەدى. بۇل جوبادا 10 اۋەن وينايدى», – دەلىنگەن قالا اكىمدىگى تاراتقان حابارلامادا. ءدال وسى ىسپەتتى ءان سالىپ, بي بي­لەي­تىن اسەم فونتاندار بىلتىر وبلىس ورتالىعىندا پايدالانۋعا بە­رىلگەن بولاتىن. وبلىس اكىمى دانيال احمەتوۆتىڭ باستاماسىمەن سالىنعان بۇل سۋبۇرقاقتار ازىرگە ەلىمىزدە كۇردەلى اكۆاديزاينعا يە ەرەكشە نىسانداردىڭ ءبىرى بولىپ وتىر. جەڭىس كۇنىندە سە­مەي­لىكتەرگە شات-شادىمان كوڭىل كۇي سىيلاعان نىسان تۇساۋكەسەرى شاھاردىڭ بارقىت اسپانىنداعى وتشاشۋلارمەن اياقتالدى. دۋمان اناش, «ەگەمەن قازاقستان»