احمەد مۋرادوۆ,
پارلامەنت ءماجىلىسىنىڭ دەپۋتاتى, «ۆايناح» چەشەن-ينگۋش قاۋىمداستىعىنىڭ توراعاسى:
– ەلباسى ءوزىنىڭ «قازاقستان-2050» ستراتەگياسىندا الدا كۇتىپ تۇرعان ەكونوميكالىق, گەوساياسي, ەنەرگەتيكالىق, ازىق-ت ۇلىك جانە تاعى باسقا وزەكتى ماسەلەلەرگە قاتىستى جاھاندىق سىن-قاتەرلەردى اتاپ كورسەتكەن بولاتىن. بۇگىندە سول كەلەڭسىزدىكتەرگە كەزىگىپ وتىرمىز. دەگەنمەن, اتالعان سىن-قاتەرلەردى ەڭسەرۋگە قازاقستاننىڭ مۇمكىندىگى تولىق جەتەدى. سەبەبى, ءبىزدىڭ كورشى مەملەكەتتەرگە قاراعانداعى دايىندىق دەڭگەيىمىز ايتارلىقتاي جوعارى.
كەز كەلگەن جاعدايدا حالىقتىڭ اۋىزبىرشىلىگى, ەلدىڭ تۇتاستىعى ەرەكشە ءرول اتقاراتىنى بەلگىلى. بۇل تۇرعىدا دا قازاقستان وزگە ەلدەردەن وق بويى وزىق تۇر. جۇدىرىقتاي جۇمىلعان حالىق قانا كەز كەلگەن قيىندىققا مويىماي, توتەپ بەرەدى.
سونىمەن قاتار, قازاقستان الەمدىك سىن-قاتەرلەردىڭ الدىن الۋ ماقساتىندا «100 ناقتى قادام» ۇلت جوسپارىن بەكىتتى. اتالعان باسىم-باعىتتاردىڭ جۇزەگە اسۋىندا قازاقستان حالقى اسسامبلەياسىنىڭ دا وزىندىك ۇلەسى بار. ويتكەنى, بىرلىگى مەن ىنتىماعى جاراسقان ەل عانا الدىنا ايقىن ماقساتتار قويىپ, سوعان جەتۋ جولىندا ارەكەت ەتەدى.
مەن اسسامبلەيانىڭ قۇرىلۋىن 25 جىلدىڭ ىشىندە قول جەتكىزگەن نەگىزگى جەتىستىكتەرىمىزدىڭ ءبىرى دەپ باعالايمىن. سەبەبى, ءدىنى مەن دىلىنە, ءتىلى مەن داستۇرىنە قاراماستان, بارلىق حالىقتىڭ باسىن ءبىر شاڭىراقتىڭ استىنا جيىپ, ورتاق ماقسات ءۇشىن «ءبىر جەڭنەن قول, ءبىر جاعادان باس» شىعارىپ ارەكەت ەتۋ قازىرگىدەي گەوساياسي تۇراقسىزدىق كەزىندە كوپ قاجىر-قايراتتى قاجەت ەتەتىن اۋقىمدى جۇمىس. وسى رەتتە ءبىرىنشى كەزەكتە ءوز جەرىندە تۇراقتىلىق پەن تولەرانتتىلىقتىڭ ساقتالۋىنا بارلىق جاعدايدى جاساپ وتىرعان قازاق حالقىنا العىس ايتۋىمىز كەرەك.
اسسامبلەيا ءبىز سياقتى وزگە ۇلت وكىلدەرىنە ءوزىمىزدىڭ قازاقستان مەملەكەتىنىڭ ءبىر بولشەگى ەكەنىمىزدى جانە وسى مەملەكەتكە كەرەكتىگىمىزدى سەزىنۋگە مۇمكىندىك بەردى. سونداي-اق, ءوزىمنىڭ قازاقستانعا مۇقتاج ەكەنىمدى سەزىندىم. ال وسىنداي بىرلىگى مىعىم, ىرىس-بەرەكەسى تاسىعان ەلدىڭ بارلىق سىن-قاتەردى ەڭسەرۋگە قاۋقارلى بولارى داۋسىز.
الەكساندر بارون,
«ميتسۆا» ەۆرەي ۇلتتىق ۇيىمى قاۋىمداستىعىنىڭ توراعاسى,
قازاقستان حالقى اسسامبلەياسى كەڭەسىنىڭ مۇشەسى:
– «100 ناقتى قادام» ۇلت جوسپارىندا مەملەكەت باسشىسى بىرتەكتىلىك پەن بىرلىك تاقىرىبى بويىنشا نەگىزگى باسىم باعىتتاردى كورسەتىپ بەردى. سونىڭ ىشىندە قازاقستان حالقى اسسامبلەياسىنىڭ «ۇلكەن ەل – ۇلكەن وتباسى» جانە ازاماتتىق بىرتەكتىلىكتى نىعايتۋ ماقساتىندا «مەنىڭ ەلىم» كەڭ كولەمدى جوبالارىن ازىرلەپ, جۇزەگە اسىرۋ تاپسىرىلعانى بەلگىلى.
بۇگىنگى شارا اتالعان تاپسىرمالاردىڭ اياسىندا اتقارىلىپ جاتقان جۇمىستاردىڭ ءبىر ساتىسى. اتاپ ايتقاندا, ۇلتتىق مۋزەيدەگى «قازاقستان حالقى اسسامبلەياسىنىڭ جانە قازاقستاننىڭ پوليەتنيكالىق تاريحى» اتتى زالدىڭ اشىلۋىنىڭ استارىندا ۇلكەن ءمان بار. بۇل جەردە قازاق دالاسىنا قونىس اۋدارعان حالىقتاردىڭ تاريحىنان باستاپ, ولاردىڭ بۇگىنگى دوستىعى, تاتۋلىعى, سالت-ءداستۇرى ناسيحاتتالادى. ارينە, ءبىر تۋدىڭ استىندا وسىنشا ۇلت وكىلدەرىنىڭ تاتۋ-ءتاتتى ءومىر ءسۇرۋىن ءبىر عانا زالمەن قامتۋ مۇمكىن ەمەس. سوندىقتان, الداعى ۋاقىتتا بۇل جۇمىستاردىڭ اياسى كەڭەيەدى دەپ ويلايمىن.
ءبىزدىڭ بۇل ارەكەتىمىزدىڭ ەڭ باستى ماقساتى – كەزدەسەتىن ەكونوميكالىق داعدارىستار مەن ءارتۇرلى قيىندىقتاردى بىرگە ەڭسەرىپ, قازاقستاننىڭ كوركەيۋى جولىندا كۇشىمىزدى بىرىكتىرۋ. مۇنداي بىرتەكتىلىكتىڭ گەوساياسي جاعداي ۋشىققان قازىرگى جاعدايدا ماڭىزى زور.
يۋري بۋناكوۆ,
قازاقستان حالقى اسسامبلەياسى جانىنداعى ورىس قوعامداستىعىنىڭ باسشىسى:
– مەن قازاقستان حالقى اسسامبلەياسىندا قۇرىلعان كۇننەن باستاپ جۇمىس ىستەپ كەلەمىن. سوندىقتان, ونىڭ قابىرعاسىندا بولاتىن ءار وقيعا مەن ءۇشىن اسا ماڭىزدى.
جالپى, وسىنداي ۇيىمدى قۇرۋ, جۇمىسىن جۇرگىزۋ, حالىقتاردىڭ باسىن ءبىر ارناعا توعىستىرىپ, ورتاق ماقساتقا ۇمتىلدىرۋ كورەگەندىلىكتى قاجەت ەتەدى. وسىنداي اۋقىمدى ءارى بىرەگەي جوبانى جۇزەگە اسىرعانى ءۇشىن ەلباسىنا شەكسىز العىسىمدى بىلدىرگىم كەلەدى.
اسسامبلەيا قۇرىلعان العاشقى جىلداردا مەملەكەت باسشىسىنىڭ «ەگەر حالىقتاردىڭ دوستىعىن ساقتاي الماساق, ەلدىڭ گۇلدەنۋى تۋرالى ءسوز قوزعاۋدىڭ ءوزى ارتىق» دەگەنى بار. سول سەبەپتى دە اسسامبلەيانىڭ جۇمىسىن پرەزيدەنتىمىز ءوزى تىكەلەي قاداعالاپ, باعىت-باعدار بەرىپ وتىر.
بۇگىنگى الەمدە بولىپ جاتقان ساياسي جانە ەكونوميكالىق جاعدايلارعا قاتىستى ايتار بولساق, ءبىزدىڭ بىرلىگىمىزدىڭ سول كەلەڭسىزدىكتەرگە توتەپ بەرەتىن جويقىن كۇش ەكەنىن اتاپ وتكىم كەلەدى. سەبەبى, بىرلىگى جاراسقان ەلدىڭ ەرتەڭى جارقىن. وسى رەتتە بۇگىن بولاتىن قازاقستان حالقى اسسامبلەياسىنىڭ كەزەكتى سەسسياسىنا ەرەكشە نازار اۋدارعانىمىز ءجون. ويتكەنى, بۇل باسقوسۋدا ەلباسىنىڭ جۇكتەگەن مىندەتتەرى مەن تاپسىرمالارىنىڭ ورىندالۋ بارىسى تالقىلانىپ, الداعى ۋاقىتتا اتقاراتىن ناقتى ءىس-ارەكەتىمىز ايقىندالادى.
جازىپ العان
ەلامان قوڭىر,
«ەگەمەن قازاقتان»
سۋرەتتەردى تۇسىرگەن ەرلان وماروۆ