باسقارما باسشىسى

باس دارىگەرلەردەن پارا العان با؟ سوڭعى جىلدارى جامبىل وب­لىستىق دەنساۋلىق ساقتاۋ باسقار­ماسىنىڭ باسىنان داۋ كەتپەي قويدى. ماسەلەن, وسىدان بىرنەشە جىل بۇرىن دەنساۋلىق ساقتاۋ باسقار­ماسىنا باسشى بولعان ق.قۇرالباەۆ دەگەن ازاماتقا ءدارى-دارمەك تەندەر­لەرىن دۇرىس وتكىزبەدى دەگەن ايىپ تاعىلىپ, ءىستى بولىپ, قىزمەتىنەن بوساتىلدى. ودان كەيىن باسشى بولعان ب.جەتىباەۆ قىزمەتتىك كابي­نەتىندە 3 ميلليون تەڭگە پارا الىپ جاتقان جەرىنەن ۇستالىپ, سەگىز جىلدى ارقالاپ شىعا كەلدى. جەتىباەۆتان كەيىن وبلىستىڭ دەنساۋلىق ساقتاۋ سالاسىنىڭ تىزگىنىن ۇستاعان ۆ.وۆسياننيكوۆ بىرنەشە جىل جاپ-جاقسى قىزمەت ەتىپ, شىعىس قا­زاقستان وبلىسىنا تۋرا سونداي قىزمەتكە اۋىسىپ كەتكەن-ءدى. جاقىندا عانا اقپارات قۇرالدارى ۆ.وۆسياننيكوۆتىڭ دا سول قىزمەتىندە پارامەن ۇستال­عانىن جارىسا جازدى. ەندى مىنە, اپتا باسىندا بىرنەشە سايتتاردا جامبىل وبلىستىق دەنساۋلىق ساقتاۋ باسقارماسىنىڭ باسشىسى ە.ماساليموۆتىڭ ءجا­نە ونىڭ ەكى ورىنباسارىنىڭ, سون­داي-اق, مەملەكەتتىك ساتىپ الۋ, ەكونوميكا جانە بيۋدجەت­تىك جوسپارلاۋ بولىمدەرى جەتەك­شىلەرىنىڭ پارا الدى دەگەن كۇدى­كپەن ۇستالعاندارى تۋرالى اق­پاراتتار جاريالاندى. ولار قىزمەتتىك وكىلەتتىكتەرىن تەرىس پايدالانا وتىرىپ ءدارى-دارمەك جانە مەدي­تسينالىق جابدىقتاردىڭ تەندەر­لەرىن وتكىزۋدە زاڭسىز ارەكەتتەرگە بارعان كورىنەدى. – ۇستىمىزدەگى جىلدىڭ 25 اق­پا­نىندا جامبىل وبلىستىق دەن­ساۋلىق ساقتاۋ باسقارماسىنىڭ باس­شىلارىنا قاتىستى قىل­مىستىق ءىس ارنايى تىركەۋگە الىنىپ, جاسىرىن تۇردە تەرگەۋ ارەكەتتەرى جۇرگىزىلدى, – دەيدى بۇل جونىندە سىبايلاس جەمقورلىققا قارسى ءىس-قيمىل ۇلتتىق بيۋرو­سىنىڭ جام­بىل وبلىسى بويىنشا دەپار­تامەنتى باسشىسىنىڭ ورىنباسارى راۋان رامازانوۆ. – 19 ءساۋىر كۇنى باسقارما باسشىسى ۇستالىپ, تەرگەۋ ارەكەتتەرى ءارى قاراي جال­عاسۋدا. قازىر ە.ما­ساليموۆ ۋاقىتشا قا­ماۋعا الىندى. ماساليموۆ جانە ونىڭ ەكى ورىنباسارى جانە ءبولىم مەڭگەرۋشىلەرى جۇيەلى تۇردە باس دارىگەرلەردەن 300 بەن 10 000 دول­لار كولەمىندە پارا الىپ وتىرعان. ازىرگە بۇل جونىندە 7 فاكتى انىقتالدى. ونىڭ ىشىندە قى­زمەتكە تاعايىنداۋ جانە جەكە ستوماتولوگيالىق كلينيكالاردىڭ مەملەكەتتەن بولىنەتىن سۋبسي­ديالارعا قول جەتكىزۋمەن تەندەرلەردە جەڭىمپاز اتانۋ ءۇشىن بەرىلگەن پارالار بار. الداعى ۋاقىتتا باسقارما باسشىسىنىڭ ەكى ورىنباسارىنىڭ جانە ءبولىم مەڭگەرۋشىلەرىنىڭ, سونداي-اق پارا بەرگەن تۇلعالاردىڭ باس شاراسى انىقتالاتىن بولادى. ارينە, تەرگەۋ بىتپەي جاتىپ بىرەۋدى كىنالاۋدان اۋلاقپىز, ءىستىڭ اق-قاراسىن ءتيىستى ورگاندار تەكسەرە جاتار. ايتسە دە جامبىل وبلىستىق دەنساۋلىق ساقتاۋ دەپار­تامەنتىندەگى بۇل جاعداي ءالى ءبىراز «جىر» بولاتىنى انىق. ورالحان ءداۋىت, «ەگەمەن قازاقستان» جامبىل وبلىسى