استانا. 20 ءساۋىر. وسى كۇندەرى بوكسشىلار گەننادي گولوۆكين مەن دومينيك ۋەيدتىڭ كەزدەسۋىنە بولجام جاسالىپ جاتىر. بۇل تۋرالى egemen.kz ءتىلشىسى حابارلادى.
ەلىمىزدىڭ جانە شەتەلدىڭ بوكس ماماندارى گولوۆكين مەن ۋەيدتىڭ اراسىندا وتەتىن جەكپە-جەكتە وتانداسىمىزدىڭ جەڭەتىن ايتۋدا. سولاردىڭ ءبىرى بوكستان وليمپيا ويىندارىنىڭ قولا جۇلدەگەرى سەرىك ەلەۋوۆ ءوزىنىڭ دوسى گولوۆكيننىڭ جەڭەتىنىنە سەنىمدى ەكەنىن ايتتى. «مەن گەنناديمەن سويلەستىم. ول جەكپە-جەككە دايىنمىن دەدى. وعان ۋەيدپەن كەزدەسۋى تۋرالى ارتىق سۇراق قويعان جوقپىن. مەنىڭشە, گەننادي 5 راۋندقا دەيىن ماسەلەنى شەشەدى. كەزدەسۋ 5 راۋندقا دەيىن اياقتالۋى مۇمكىن. گولوۆكيننىڭ سوققىلارىنا 12 راۋند شىداي الاتىن بوكسشىنى ءالى كورگەن ەمەسپىن. ۋەيدتى اسا مىقتى بوكسشى دەپ ايتا المايمىن», دەدى ول. سونىمەن بىرگە سەرىك ەلەۋوۆ «قازاقستان» ۇلتتىق تەلەارناسىنان الداعى كەزدەسۋگە ساراپشى بولۋعا شاقىرتۋ العانىن, وعان قۋانا كەلىسكەنىن ايتتى.
تاعى ءبىر ايتاتىن نارسە, "قازاقستان" رترك كورەرمەندەر اراسىندا گولوۆكين مەن ۋەيدتىڭ اراسىندا وتەتىن جەكپە-جەككە ارنالعان بايقاۋ جاريالاعان بولاتىن. ونىڭ شارتى بويىنشا قاتىسۋشىلار جەكپە-جەكتىڭ ناتيجەسىن, ياعني كىمنىڭ, قالاي جانە قاشان جەڭىسكە جەتەتىنىن بولجام رەتىندە دۇرىس ايتۋى كەرەك. "قازىر كورەرمەندەر مەن جانكۇيەرلەر بەلسەندى قاتىسىپ, ءوز جاۋاپتارىن جىبەرىپ جاتىر. وسى ۋاقىتقا دەيىن رەداكتسياعا بارلىعى 1329 بولجام كەلىپ ءتۇستى", دەپ حابارلادى رترك-نىڭ ءباسپاسوز قىزمەتى.
بايقاۋ گولوۆكين-ۋەيد جەكپە-جەگى باستالعانعا دەيىن جالعاسادى. جاۋاپتاردى مىنا http://vote.kaztrk.kz/boxing سىلتەمە ارقىلى ءوتىپ, بەرۋلەرىڭىزگە بولادى. جەڭىمپاز سول كۇنى انىقتالادى. باعالى سىيلىقتى كەزدەسۋ ناتيجەسىن ناقتى انىقتاعان كورەرمەن يەلەنەدى.
بۇل جەكپە-جەكتى «قازاقستان» تەلەارناسى 24 ءساۋىر كۇنى استانا ۋاقىتىمەن ساعات 07.20-تان باستاپ تىكەلەي ەفيردە كورسەتەدى. سونداي-اق, كەزدەسۋ kaztrk.kz سايتىندا تىكەلەي ەفيردە كورسەتىلەدى. كەزدەسۋ 23 ءساۋىر كۇنى اقش-تىڭ لوس-اندجەلەس قالاسىنداعى «فورۋم» ارەناسىندا وتەدى.
داستان كەنجالين.
دەرەك: «قازاقستان» رترك ءباسپاسوز قىزمەتى.
فوتو: egemen.kz