قىزىلوردادا ۆەلوسپورتتان قازاقستان چەمپيوناتى باستالدى

سىر بويىندا ەكىنشى مارتە ۇيىمداستىرىلعان ۆەلوشاباندوزدار چەمپيوناتىنا استانا, الماتى قالالارىنان  جانە  الماتى, باتىس قازاقستان, وڭتۇستىك قازاقستان, شىعىس قازاقستان, جامبىل, قوستاناي, پاۆلودار جانە قىزىلوردا وبلىستارىنان 80-گە جۋىق   ۆەلوشاباندوزدار قاتىسۋدا. ولار 5 كۇن بويى قىزىلوردا-شىمكەنت جانە قىزىلوردا-سامارا باعىتتارىنداعى تاس جولدا توپتىق, جەكەلەي جانە اينالما جارىستاردا باق سىناسادى. چەمپيوناتتىڭ اشىلۋ سالتاناتتىندا وبلىستىق دەنە شىنىقتىرۋ جانە  سپورت باسقارماسىنىڭ باسشىسى سادىق مۇستافاەۆ پەن قازاقستان تاريحىندا تۇڭعىش الەم چەمپيونى, كسرو-عا  ەڭبەگى سىڭگەن سپورت شەبەرى, قازاقستان ۆەلوسيپەد سپورتى فەدەراتسياسى پرەزيدەنتىنىڭ كەڭەسشىسى مارات ساتىبالديەۆ سايىسقا  قاتىسۋشىلاردى قۇتتىقتاپ,  جەڭىس تىلەدى. چەمپيونات 20 ساۋىرگە دەيىن جالعاسادى.

ۆەلوسپورت بايگەسى اشىلۋىنان كەيىن قىزىلوردا قالاسى سپورتشىلارىنىڭ قاتىسۋىمەن ۆەلوسپورتتان 2000 جىلى تۋعان جانە ودان جاس ۇلدار مەن قىزدار اراسىندا توپتىق جارىس وتكىزىلدى. ناتيجەسىندە قىزدار اراسىندا ارۋجان عالىمجان  جەڭىمپاز اتانسا, اناستاسيا يۆانوۆا ەكىنشى ورىندى, اسەم تولەمىسوۆا ءۇشىنشى ورىندى يەلەندى. ۇلدار اراسىندا دامير امانتايدىڭ مەرەيى ۇستەم بولسا, بەكسۇلتان ابتاەۆ كۇمىس جۇلدەنى, ارتەم پەرۆۋشين قولا جۇلدەنى ەنشىلەدى. سونداي-اق, ۆەلوسپورتتان قازاقستان چەمپيوناتى اياسىندا ءبىرىنشى رەت مەكتەپ جاسىنا دەيىنگى بالالار اراسىندا «بالدىرعان - 2016» اتتى قىزىلوردا قالاسىنىڭ گران-پري جارىسى وتكىزىلدى. وعان قىزىلوردا قالاسىنىڭ 3 بالاباقشاسىنان 3-5 جاستاعى كىشكەنتاي بالالار قاتىسىپ, ۇزدىكتەرى انىقتالدى. ۇلدار اراسىندا فارابي ىبىراەۆ التىن جۇلدەنى يەلەنسە, بەكبولات شاحمات ەكىنشى ورىنعا, اسلان سانجار ءۇشىنشى ورىنعا  يە بولدى. قىزدار اراسىندا ينايات الياكبار جەڭىس تۇعىرىنا كوتەرىلسە, ەكىنشى ورىندى ارۋنا بايمۇحامەدوۆا, ءۇشىنشى ورىندى شۇعىلا تابىلعانوۆا ەنشىلەدى. جەڭىمپازدار مەن  جۇلدەگەرلەرگە قازاقستان ۆەلوسيپەد سپورتى فەدەراتسياسىنىڭ ارنايى سىيلىقتارىمەن ديپلومدار تابىس ەتىلدى.

داستان كەنجالين.

دەرەك: شتاتتاعى ۇلتتىق كوماندالار جانە سپورت رەزەرۆى ديرەكتسياسى.

فوتو: egemen.kz