قىتايدىڭ شىڭجاڭ ولكەسى, التاي ايماعى, قابا اۋدانىنان باتىسقا قاراي ءجۇز شاقىرىم قاشىقتىقتا قۇم اراسىندا قاراتوقتى دەگەن كول بار. ءوزىنىڭ سۇلۋلىعىمەن, كوركەمدىگىمەن تالايدى تامساندىرعان قاراتوقتى كولى – تابيعاتتىڭ عاجايىپ كورىنىسى.
كوركەم كول قازاقستان مەن قىتايدىڭ شەكاراسىندا جاتىر. ول قازاقستاننىڭ كۇرشىم, زايسان اۋداندارىمەن شەكتەسەتىن شەكاراعا جاقىن جەردە. وسى كولگە بارىپ, ونىڭ سۋىنا اياعىن سالعان ادامداردىڭ ايتۋىنشا, بۇل – الەمدەگى ەڭ كوركەم جەرلەردىڭ ءبىرى. ونى ءبىر عانا رەت كورگەن ادام قايتا كەلىپ, ايناداي كولدىڭ ايدىنىن, تەرەڭىنەن تارايتىن عاجايىپ ساۋلەسىن كورمەسە تۇرا المايدى. كول جاعاسىنداعى اعاش جاپىراعى مەن شوپتەر كۇز مەزگىلىندە الۋان تۇرگە بويالىپ, قۇلپىرىپ شىعا كەلەدى. وسى كەزدە اعاش جاپىراقتارى مەن شوپتەر قۇم ورتاسىنداعى كەرەمەت كولدى ءتۇرلى بوياۋمەن بوياپ, ادامنىڭ كوزىن تارتىپ تۇرادى.
بۇل جەردە كوگىلدىر تاۋ دا بار. وسى تاۋ قۇم القابىمەن كەرەمەت جاراسىپ, كولدىڭ سانىنە ءسان قوسىپ تۇرعانىن كورۋگە بولادى.
داستان جۇمابەك ۇلى
استانا