بۇل كۇندەرى الماتىداعى م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا ءداستۇرلى «تەاتر كوكتەمى–2016» فەستيۆالى ءجۇرىپ جاتىر. بيىلعى ونەر دۋمانى قازاق ساحناسىنىڭ كوزى ءتىرى كورنەكتى اكتريساسى, قازاقستاننىڭ ەڭبەك سىڭىرگەن ءارتيسى حابيبا ەلەبەكوۆانىڭ 100 جاسقا تولۋىنا ارنالعان.
جىل سايىن ناۋرىز مەرەكەسى جانە 27 ناۋرىز حالىقارالىق تەاتر كۇنىنە ورايلاستىرىلىپ وتكىزىلەتىن اتالمىش فەستيۆال تەاتردىڭ بۇگىنگى باعىت-باعدارىن انىقتاۋعا, رەپەرتۋار ساياساتىنداعى وزىندىك ىزدەنىستەرىن, دراماتۋرگيا, رەجيسسەر, اكتەر ونەرىنىڭ بۇگىنى مەن ەرتەڭىن زەردەلەۋگە مۇمكىندىك بەرەدى.
بيىلعى فەستيۆالدا الدىمەن كىشى زالدا الەم تەاترلارىندا وتە كوپ جانە ءارتۇرلى ينتەرپرەتاتسيامەن ساحنالانعان «مەدەيا» تراگەدياسى قويىلدى. بۇل الەنا قابدەشوۆانىڭ وزىندىك جۇمىسى بولىپ تابىلادى.
فەستيۆالدىڭ سالتاناتتى اشىلۋىندا تەاتر ديرەكتورى ەرلان ءبىلال ءسوز تولعاپ, مەرەكە رەسمي تۇردە كسرو حالىق ءارتيسى ءاسانالى ءاشىموۆ قويعان «قازا مەن جازا» سپەكتاكلىمەن باستالدى.
سول سياقتى, فەستيۆال بايقاۋىنا قاتىساتىن «اي مەن ايشا» دراماسى مەن «قازا مەن جازا» كريمينالدىق دراماسى وتكەن ماۋسىمنىڭ پرەمەرالارى بولسا, «قوشتاسقىم كەلمەيدى» (رەج. اسحات ماەميروۆ) مەن «الماس قىلىش» (رەج.الما كاكىشەۆا) 90-شى ماۋسىمنىڭ كوزايىمدارى.
قالاي دەسەك تە 90-ماۋسىم تەاتر ءۇشىن تولاعاي تابىستارمەن باستالدى. تاراز قالاسىندا اتالىپ وتكەن قازاق حاندىعىنىڭ 550 جىلدىق مەرەكەسىندە م.اۋەزوۆ تەاترى «قيلى جول» تاريحي دراماسىن ۇسىندى. تاريحي-پاتريوتتىق تاقىرىپتاعى بۇل الاڭدىق قويىلىم ەلىمىزدىڭ ساحنا ونەرى تاريحىنداعى عانا ەمەس, رۋحاني تاجىريبەسى تۇرعىسىنان دا اسا ءساتتى مەگاجوبا. تەاتر ۇجىمى قىرعىزستاندا وتكەن «ARD ORDO» حالىقارالىق فەستيۆالىنە قاتىسقان «قاس قاعىم» (رەج. ە.نۇرسۇلتان) تراگەدياسىمەن باس جۇلدە, اتىراۋداعى ر.وتارباەۆ اتىنداعى حالىقارالىق فەستيۆالدان «بەيبارىس سۇلتان» (رەج. يۋ.حانينگو-بەكنازار) تاريحي دراماسىمەن قاتىسىپ, باس جۇلدە الىپ قايتقان بولاتىن.
فەستيۆال كۇندەرى رەجيسسەرلەر, اكتەرلەر مەن كورەرمەندەر اراسىندا كەزدەسۋ وتكىزىلەدى. كورمەلەر ۇيىمداستىرىلادى.
ايناش ەسالي,
«ەگەمەن قازاقستان».
الماتى.