اقتوبە. 21 ناۋرىز. اقتوبەدە ۇلىستىڭ ۇلى كۇنى قارساڭىندا قالاعا قاراستى «زارەچنىي» ەلدى مەكەنىندە ورنالاسقان «اينالايىن» جەكە بالاباقشاسى پايدالانۋعا بەرىلدى. بۇل تۋرالى egemen.kz ءتىلشىسى حابارلادى.
بۇل بالاباقشانىڭ قۇرىلىسىن كاسىپكەر نۇرجان قۋاتوۆ سالعان. 50 ورىندىق مەكتەپكە دەيىنگى بالالار مەكەمەسىنىڭ سالتاناتتى اشىلۋىنا وبلىس اكىمى بەردىبەك ساپارباەۆ قاتىستى. ءوڭىر باسشىسى اتا-انالاردى قۋانىشتى ساتتەرىمەن قۇتتىقتاپ, يگىلىكتى شارانىڭ قازاقستان پارلامەنتى ءماجىلىسى مەن ءماسليحات دەپۋتاتتارىنىڭ سايلاۋى, سونداي-اق, حالقىمىزدىڭ ناۋرىز مەرەكەسى قارساڭىندا اشىلىپ وتىرعانىمەن ساباقتاستىردى.
«ەلباسى 2020 جىلعا دەيىن بالالاردى بالاباقشامەن تولىق قامتاماسىز ەتۋدى تاپسىردى. قازىر ەلىمىزدە «بالاپان» مەملەكەتتىك باعدارلاماسى جۇزەگە اسىرىلۋدا. پرەزيدەنتتىڭ مەملەكەت پەن جەكەمەنشىكتىڭ ارىپتەستىگىن دامىتۋ جونىندەگى تاپسىرماسى بويىنشا جەرگىلىكتى بيلىك مەكتەپكە دەيىنگى ورىن تاپشىلىعى ماسەلەسىن كاسىپكەرلەر مەن كومپانيالار جەتەكشىلەرىمەن بىرلەسە وتىرىپ شەشۋدە. وسى باعىتتاعى جۇمىستار بارىسىندا جاڭا تۇرعىن ءۇي كەشەندەرىندەگى بالالاردى ورىنمەن قامتۋعا باسىمدىق بەرىلىپ وتىر», – دەدى ايماق باسشىسى.
مۇندا بۇلدىرشىندەردى تاربيەلەۋگە بارلىق جاعداي جاسالعان. عيماراتتىڭ اۋماعى مەن توپ بولمەلەرىندە ونلاينعا قوسىلعان بەينە باقىلاۋ ورناتىلعان. باعدارلامادا مەملەكەتتىك ءتىل مەن اعىلشىن ءتىلىن تەرەڭدەتە وقىتۋ, حورەوگرافيامەن اينالىسۋ قاراستىرىلعان. باستى نازار «دەنى ساۋ ۇرپاق – دەنى ساۋ ۇلت» باعدارلاماسىنا اۋدارىلعان جانە اتا-انالاردىڭ قاتىسۋىمەن سپورتتىق شارالار وتكىزىلەتىن بولادى.
بالاباقشادا 12 ادام جۇمىس ىستەيدى. جالپى وبلىس ورتالىعىندا حالقىمىزدىڭ ۇلىق مەرەكەسى ناۋرىزدىڭ قارساڭىندا 670 ورىنعا ارنالعان 10 بالاباقشا اشىلدى. وسى اتالعان مەكتەپكە دەيىنگى مەكەمەلەردە بارلىعى 150 ادام ەڭبەككە ورنالاستى.
مەرەكە كۇندەرى وسىنشاما بالا مەن ولاردىڭ اتا-انالارى قۋانىشقا بولەندى. بۇعان دەيىن مەملەكەت پەن جەكەمەنشىك ارىپتەستىگى اياسىندا جۇمىس ىستەيتىن بالاقشالار سانى 33 بولسا, ەندى ولاردىڭ قاتارى 43-كە جەتتى.
ساتىبالدى ءساۋىرباي.
دەرەك, سۋرەت: egemen.kz.