استانا. 23 ناۋرىز. انگليانىڭ ۋوررينگتون قالاسىندا تانىمال The Beatles توبىنىڭ 1962 جىلى شىققان كۇي تاباعى 77,5 مىڭ فۋنت ستەرلينگكە ساتىلدى. بۇل تۋرالى egemen.kz ءتىلشىسى حابارلادى.
اۋكتسيوندا ساتىلعان كۇيتاباقتا The Beatles-تىڭ پول ماككارتينيمەن بىرگە شىرقاعان Till There Was You جانە توپتىڭ جەكە ورىنداعان Hello Little Girl اندەرى جازىلعان. مۋزىكا سالاسىنىڭ ساراپشىلارى بۇل پلاستينكانى «قاسيەتتى گراال» دەپ اتاپ كەتكەن. قۇندى دۇنيە تانىمال HMV ساۋدا جەلىسىندە دايىندالعان.
ايتا كەتەيىك, وتكەن جىلدىڭ جەلتوقسان ايىندا اتالعان توپتىڭ سيرەك نۇسقادا شىققان «اق البوم» ءان جيناعى 790 مىڭ اقش دوللارىنا ساتىلعان بولاتىن. ساناۋلى نۇسقادا شىققان البوم توپتىڭ بارابانشىسى رينگو ستاررعا تيەسىلى بولعان. بۇل اۋكتسيون 2015 جىلى 300 مىڭ دوللارعا ساتىلعان ەلۆيس پرەسليدىڭ «روك-ن-رولل پاتشاسى» البومىنىڭ قويعان رەكوردىن جاڭارتتى.
The Beatles توبى انگليانىڭ ليۆەرپۋل قالاسىندا قۇرىلعان. مۋزىكا تاريحىنداعى ەڭ ءساتتى ءارى سىنشىلاردىڭ تاراپىنان قۇرمەتكە يە بولعان روك توبى.
ايان ءابدۋالي.
دەرەك: تاسس.
سۋرەت: dmitrovets.ru.