قاراعاندى. 23 ناۋرىز. رەسەي ازاماتتارى وزدەرىن قار قۇرساۋىنان قۇتقارىپ قالعان قاراعاندى وبلىستىق توتەنشە جاعدايلار جونىندەگى دەپارتامەنتىنە العىس حات جولدادى. بۇل تۋرالى وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
رەسەي ازاماتتارى ا. دەمكين مەن ا. تەرەنتەۆ چەليابينسك وبلىسىنان شىمكەنت قالاسىنا ارنالعان ءورت ءسوندىرۋ كولىگىن ايداپ كەلە جاتقاندارىندا ۇلىتاۋ اۋدانىنان 30 شاقىرىم جەردە تۇرىپ قالعان. تەحنيكالارى سىنىپ, وزدەرى بوراندا قالعان رەسەيلىكتەر 112 شۇعىل تەلەفونى بويىنشا قوڭىراۋ شالىپ, كومەك سۇرايدى. حابارلاما بويىنشا وقيعا ورنىنا جەدەل جەتكەن ۇلىتاۋ اۋداندىق توتەنشە جاعدايلار ءبولىمىنىڭ قىزمەتكەرلەرى ولارعا جان-جاقتى كومەك كورسەتكەن.
وسى وقيعادان كەيىن ا. تەرەنتەۆ پەن ا. دەمكين قاراعاندى وبلىستىق توتەنشە جاعدايلار دەپارتامەنتى باسشىسىنىڭ مىندەتىن اتقارۋشى پولكوۆنيك م. قاتپانوۆتىڭ اتىنا العىس حات جولداعان. حاتتا ن. ساباعانوۆ, ب. مۋحانبەتوۆ, د. مۋحانبەتوۆ, ت. تلەۋكابىلوۆ, م. كولەي جانە م. يسمايلوۆ سىندى قۇتقارۋشىلاردىڭ ەسىمدەرى قۇرمەتپەن اتالىپتى.
قايرات ءابىلدينوۆ.
دەرەك, سۋرەت: قاراعاندى وبلىسى توتەنشە جاعدايلار دەپارتامەنتىنىڭ ءباسپاسوز قىزمەتى.