پارلامەنت ءماجىلىسى مەن جەرگىلىكتى ءماسليحاتتار دەپۋتاتتارىن سايلاۋ بارىسىندا قوعامدىق ءتارتىپتى قامتاماسىز ەتۋ ماسەلەسى تۋرالى كەشە ورتالىق كوممۋنيكاتسيالار قىزمەتىندە ارنايى بريفينگ بولىپ ءوتتى. بۇل جولى بۇقارالىق اقپارات قۇرالدارىنىڭ الدىنا ىشكى ىستەر ءمينيسترىنىڭ ءبىرىنشى ورىنباسارى مارات دەمەۋوۆ شىقتى.
سايلاۋ كۇنى, ياعني كەشە ءماجىلىس جانە جەرگىلىكتى ءماسليحاتتار دەپۋتاتتارىن تاڭداۋ ءۇشىن ەلىمىزدە 9905 سايلاۋ ۋچاسكەلەرى اشىلعان-دى. وسىعان وراي قۇقىق قورعاۋ ورگاندارىنىڭ قىزمەتكەرلەرى دە كۇشەيتىلگەن جۇمىس رەجىمىنە كوشىپ, قۇقىقتىق ءتارتىپتى قامتاماسىز ەتۋ ءۇشىن بىرقاتار شارالار قابىلداعانى بەلگىلى بولىپ وتىر. سايلاۋ ۋچاسكەلەرىنە قۇقىق قورعاۋ ورگاندارى تاراپىنان قانشا ادام بولىنگەنى جانە ولاردىڭ نەندەي مىندەتتەر اتقاراتىنىن ىشكى ىستەر ءمينيسترىنىڭ ءبىرىنشى ورىنباسارى تاراتىپ ايتىپ بەردى.
ونىڭ سوزىنەن بەلگىلى بولعانى, باسشىلىق پەن كوماندالىق قۇرامنىڭ تاۋلىك بويى كەزەكشىلىك ۇيىمداستىرىپ, قوسىمشا كۇشتەردى تارتۋ ارقىلى پاترۋلدىك جاساقتاردى كوبەيتۋ جولىمەن سايلاۋ ۋچاسكەلەرىنە جاقىن كوشەلەرگە كوبىرەك بەكىتىلگەندىگى. سايلاۋ كۇنى قوعامدىق ءتارتىپتى ساقتاۋ ءۇشىن 20 مىڭنان استام پوليتسيا قىزمەتكەرى تارتىلعان. بيۋللەتەندەردى سايلاۋ ۋچاسكەلەرىنە اكەلگەن ساتتەن باستاپ تاۋلىكتىك كۇزەتۋ كۇشەيتىلىپ, بارلىق قاۋىپسىزدىك شارالارىنىڭ ساقتالۋى قامتاماسىز ەتىلگەن.
ول, بۇل رەتتە, سايلاۋ ناۋقانى قالىپتى جاعدايدا وتكەندىگىن جانە سايلاۋ زاڭناماسىن ورەسكەل بۇزۋ فاكتىلەرى ورىن الماعاندىعىن ايتتى. ونىڭ ۇستىنە, «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭعا سايكەس, سايلاۋ وتكىزىلگەن كۇن قۇقىق قورعاۋ ورگاندارى ءۇشىن جۇمىس كۇنى بولعاندىقتان, ىشكى ىستەر ورگاندارىنىڭ قىزمەتكەرلەرىنە قوعامدىق ءتارتىپتى قورعاۋ مەن جول قاۋىپسىزدىگىنىڭ ءتيىستى دەڭگەيىن قامتاماسىز ەتۋ باعىتىندا ۇلكەن جاۋاپكەرشىلىك جۇكتەلىپتى.
جاعدايدى جەدەل ساۋىقتىرۋ جانە ءتيىستى قۇقىقتىق ءتارتىپتى قامتاماسىز ەتۋ ءۇشىن ءىىم 16-18 ناۋرىز ارالىعىندا «قۇقىقتىق ءتارتىپ» جەدەل-پروفيلاكتيكالىق ءىس-شارا وتكىزىلگەنى دە اتالدى. «سايلاۋ ۋچاسكەلەرىندە كەز كەلگەن قۇقىققا قايشى ارەكەتتەرگە جەدەل ىقپال ەتۋ ءۇشىن بىرقاتار ءىس-شارالار جۇزەگە اسىرىلدى: 17-24 ناۋرىز ارالىعىندا ىشكى ىستەر ورگاندارىنىڭ بارلىق جەكە قۇرامى, ونىڭ ىشىندە توتەنشە جاعدايلار, قىلمىستىق-اتقارۋ جۇيەسى بولىنىستەرى جانە ۇلتتىق ۇلان قىزمەتتىڭ كۇشەيتىلگەن نۇسقاسىنا كوشىرىلدى; ىشكى ىستەر ورگاندارى مەن ۇلتتىق ۇلاننىڭ كۇش-قۇرالدارى ەسكەرىلىپ, جەكە قۇرامدى ورنالاستىرۋدىڭ ءتيىستى جوسپارى جاسالدى; ءىىم-دە جانە اۋماقتىق ءىىد-دە جۇمىلدىرىلعان كۇش-قۇرالدارىن باسقارۋ جانە ۇيلەستىرۋ ءۇشىن ارنايى شتابتار قۇرىلدى; ءاربىر قالالىق, اۋداندىق ورگانداردا 2-3 جەدەل-تەرگەۋ توپتارى قۇرىلىپ, ولاردىڭ قۇرامىنا پروكۋراتۋرا قىزمەتكەرلەرى دە تارتىلدى», – دەدى ءبىرىنشى ۆيتسە-مينيستر.
م.دەمەۋوۆ پوليتسيا قىزمەتكەرلەرى بايقاۋشىلار مەن جۋرناليس-
تەر تاراپىنان جاسالاتىن فوتو جانە بەينە ءتۇسىرۋ ارەكەتتەرىنە ارالاسپايتىندىعىن دا تىلگە تيەك ەتە كەتتى. جانە دە كەز كەلگەن سايلاۋ زاڭناماسىن بۇزۋعا بايلانىستى ارىزدار مەن شاعىمدار ىشكى ىستەر ورگاندارىنىڭ قۇزىرەتتىلىگىنىڭ شەگىندە سايلاۋ كۇنى شۇعىل قارالىپ وتىردى. سونداي-اق, جول قاۋىپسىزدىگىن قامتاماسىز ەتۋ, سايلاۋ كوميسسياسىنا قىزمەت ەتەتىن اۆتوكولىكتەردىڭ تەحنيكالىق جاعدايىن تەكسەرۋدى ۇيىمداستىرۋ, سايلاۋ بيۋللەتەندەرىن تاسىمالداۋدا پاترۋلدىك اۆتوكولىكتەردىڭ ەرىپ ءجۇرۋى بارىسىن باقىلاۋ سياقتى مىندەتتەر قالتقىسىز ورىندالدى. بۇدان باسقا, ءورت قاۋىپسىزدىگىن قامتاماسىز ەتۋ ءۇشىن توتەنشە جاعدايلار ءجونىندەگى قۇرىلىم تاراپىنان ءاربىر سايلاۋ ۋچاسكەسىندە ءورت ورىن الماۋى جاعدايلارىنا تەكسەرۋ جۇرگىزىلگەن جانە سايلاۋ ۋچاسكەلەرىنىڭ مۇشەلەرى ءورت ورىن العاندا نە ىستەۋلەرى كەرەكتىگى دە جان-جاقتى پىسىقتالىپتى.
سايلاۋ كۇنى ورتتەن قورعاۋ-قۇتقارۋ قۇرىلىمدارىنىڭ كۇشەيتىلگەن كەزەكشىلىگى ۇيىمداستىرىلعانى جانە دە جەدەل باسقارۋ ورتالىقتارىنىڭ بەينە-باقىلاۋ كامەرالارى دا قولدانىلعانى اتالدى. ءسوز رەتى كەلگەندە م.دەمەۋوۆ ىشكى ىستەر ورگاندارىنىڭ ارنايى مەكەمەلەرىندە سايلاۋعا قاتىسۋ قۇقىعى بار 4 مىڭ ادامنىڭ كونستيتۋتسيالىق قۇقىقتارىن ىسكە اسىرۋ ءۇشىن سايلاۋ كوميسسيالارىنىڭ كەلىسىمى بويىنشا بىرقاتار ارنايى مەكەمەلەردە ۋچاسكەلەر اشىلىپ, قالعاندارىنا داۋىس بەرۋ جاشىكتەرى ورنالاستىرىلىپتى. ەلىمىزدىڭ ءاربىر وڭىرىندە حالىقارالىق بايقاۋشىلاردىڭ وتىنىشتەرى بويىنشا كەزدەسۋلەر وتكىزىلىپ, سايلاۋ وتكىزۋدەگى زاڭدىلىق پەن قاۋىپسىزدىكتى قامتاماسىز ەتۋدى ۇيىمداستىرۋ ماسەلەلەرى پىسىقتالعان.
اسقار تۇراپباي ۇلى,
«ەگەمەن قازاقستان».