وڭتۇستىك قازاقستان وبلىسىندا وتكەن سايلاۋ بارىسىنا 13 شەتەلدىك بايقاۋشى قاتىستى. ونىڭ ىشىندە تمد تاراپىنان ءۇش بايقاۋشى قىرعىزستاننان, ءۇش بايقاۋشى رەسەي فەدەراتسياسىنىڭ ياروسلاۆ وبلىسىنان كەلدى.
اۆستريادان كەلگەن پەتتەر اندەرسون جۋرناليستەرمەن كەزدەسكەندە بىلاي دەدى.
– مەن سىزدەرمەن كەزدەسۋگە دەيىن جەتى سايلاۋ ۋچاسكەسىندە بولدىم. قاي-قايسىندا دا ادام كوپ, بۇل سايلاۋدىڭ دەموكراتيالىق جاعدايدا ءوتىپ جاتقاندىعىنىڭ بەلگىسى. بۇل مەنىڭ قازاقستانعا ەكىنشى ساپارىم. مۇنىڭ الدىندا پرەزيدەنت سايلاۋىندا بايقاۋشى بولىپ قاتىسقانمىن. سايلاۋ بارىسىندا زاڭبۇزۋشىلىق وقيعالارى ورىن العان جوق. ۇمىتكەرلەردىڭ باقىلاۋشىلارى تاراپىنان دا ارىز-شاعىم بولمادى. سايلاۋ ۋچاسكەلەرىنە كوپ ازاماتتار كەلىپ, ءوز تاڭداۋىن جاسادى. ولاردىڭ اقجارقىن جۇزىنەن ومىرگە دەگەن قۇشتارلىق, مەملەكەتىنىڭ بولاشاعى مىقتى بولارىنا سەنىمدىلىك اڭعارىلادى.
ال, فرانتسيادان كەلگەن بايقاۋشى, سەناتور يۆ پوتستسو دي بورگو شىمكەنتتىك سايلاۋشىلاردىڭ كەزەككە تۇرعىسى كەلمەي تەز داۋىس بەرۋ ءۇشىن اسىعاتىندارىنا تاڭدانىسىن ءبىلدىردى.
ونىڭ ايتۋىنشا فرانتسيادا سايلاۋشىلار سايلاۋ ۋچاسكەلەرىندە ءوز كەزەگىن اسىقپاي توسادى.
– وڭتۇستىكقازاقستاندىقتاردىڭ ءوز داۋىسىن بەرۋ ءۇشىن كەزەك كۇتپەيتىندىگىندە تۇرعان ەشقانداي زاڭ بۇزۋشىلىق جوق, – دەيدى فرانتسيالىق بايقاۋشى.
– سايلاۋشىلار وتە بەلسەندى, كوڭىلدى. ءاسىرەسە, جاستاردىڭ جارقىلى ەرەكشە تاڭعالدىردى. ولار ءومىردىڭ بۇگىنگىسىنەن دە جاقسارعانىن قالايدى. قازاقستاندا وزگە ورتالىق ازيا مەملەكەتتەرىنە قاراعاندا قاي جاعىنان العاندا دا العا باسۋشىلىق بار.
شەتەلدەن كەلگەن بايقاۋشىلار تەك سايلاۋ ۋچاسكەلەرىندەگى جاعدايعا عانا ەمەس قازاقستاننىڭ بولاشاعىنا دا جاقسى باعا بەرۋدە.
باقتيار تايجان,
«ەگەمەن قازاقستان».
وڭتۇستىك قازاقستان وبلىسى.