كەشە قازاقستاننىڭ «اق جول» دەموكراتيالىق پارتياسىنىڭ سايلاۋالدى شتابىندا پارتيا جەتەكشىسى ازات پەرۋاشەۆ ءباسپاسوز ءماسليحاتىن وتكىزدى.
بۇقارالىق اقپارات قۇرالدارى وكىلدەرىنىڭ الدىندا ازات پەرۋاشەۆ سايلاۋعا بەلسەنە قاتىسىپ, ءوز تاڭداۋلارىن جاساعان بارشا قازاقستاندىقتارعا ريزاشىلىعىن ءبىلدىردى. سونداي-اق, ول ءارىپتەستەرىنە ساياسي دوداداعى جەڭىستەرىن رەسمي تۇردە بايانداپ, ەل جۇكتەگەن سەنىمگە سەلكەۋ تۇسىرمەۋ باستى مىندەت ەكەنىن ايتتى.
– حالىق ءبىزدىڭ پارتياعا سەنىم ءبىلدىرىپ, قولداۋ كورسەتتى. ەندى ءبىز ەل سەنىمىن اقتاۋىمىز كەرەك, – دەپ قىسقا قايىردى ول.
سونىمەن قاتار, ازات تۇرلىبەك ۇلى ەلباسى, «نۇر وتان» پارتياسىنىڭ توراعاسى نۇرسۇلتان نازارباەۆ پەن پارتيا مۇشەلەرىن جاڭا جەڭىسىمەن قۇتتىقتادى.
– مەن ءوز اتىمنان جانە اقجولدىقتاردىڭ اتىنان «نۇر وتان» پارتياسىنىڭ جەتەكشىلەرى مەن ءمۇشەلەرىن سايلاۋداعى جارقىن جەتىستىگىمەن شىن جۇرەكتەن قۇتتىقتايمىن. راسىمەن, قازاقستاندىقتار جەتەكشى پارتياعا ۇلكەن سەنىم ارتىپ, قولداۋ كورسەتتى, – دەدى «اق جول» توراعاسى.
ءباسپاسوز ءماسليحاتىندا ازات پەرۋاشەۆ اقجولدىقتارعا قولداۋشىلار تاراپىنان ارتىلعان سەنىم مەن مىندەتتى ورىنداۋ ءۇشىن تولىمدى تىرلىك, بولىمدى بىرلىك كەرەكتىگىن جەتكىزدى.
شارا سوڭىندا ول سايلاۋ ناۋقانىنىڭ جوعارى دەڭگەيدە وتكەنىن, ورتالىق سايلاۋ كومميسسياسىنىڭ ءوز مىندەتتەرىن تولىق ورىنداعانىن باياندادى. سونداي-اق, «اق جول» پارتياسىنىڭ 7,22 پايىز داۋىس جيناعانى وسى ۋاقىتقا دەيىن اتقارىلعان جۇمىستىڭ ناتيجەسى ەكەنىن مالىمدەدى.
ايتا كەتەيىك, بۇگىندە اتالعان پارتيانىڭ 175 مىڭنان استام مۇشەسى بار. ال بۇعان دەيىنگى پارلامەنت ءماجىلىسىنىڭ V شاقىرىلىمىندا پارتيا اتىنان 8 ادام دەپۋتاتتىق مانداتقا يە بولعان ەدى.
تالعات رايىمبەك,
«ەگەمەن قازاقستان».