كەشە قازاقستان كوممۋنيستىك حالىق پارتياسى ورتالىق كوميتەتىنىڭ كەڭسەسىندە رەسپۋبليكالىق سايلاۋالدى شتاب وكىلدەرى كەزەكتەن تىس پارلامەنت ءماجىلىسى مەن ءماسليحاتتار سايلاۋلارىنىڭ قورىتىندىسى بويىنشا ءباسپاسوز ءماسليحاتىن وتكىزدى.
جيىن بارىسىندا شتاب جەتەكشىسى ايقىن قوڭىروۆ قازاقستان كوممۋنيستىك حالىق پارتياسى 20 ناۋرىزدا وتكەن سايلاۋ ناتيجەلەرىن تولىق مويىندايتىنىن جانە ونى بارلىق سايلاۋ ناۋقانىنىڭ زاڭدى قورىتىندىسى دەپ سانايتىنىن مالىمدەدى.
– «ءبىز ورتالىق سايلاۋ كوميسسياسى جاريالاعان داۋىس بەرۋدىڭ الدىن الا قورىتىندىسى ەلىمىزدەگى ساياسي كۇشتەردىڭ شىنايى بولمىسىنا ساي دەپ ەسەپتەيمىز. وتكەن سايلاۋ ەركىن جانە اشىق بولدى. سايلاۋ ناۋقانى كەزىندەگى سايلاۋالدى كۇرەس ءادىل جۇرگىزىلدى. ءبىزدىڭ بايقاۋشىلارىمىز ايتارلىقتاي زاڭبۇزۋشىلىقتاردى انىقتاعان جوق. سايلاۋالدى دودانى اشىق ءارى ءادىل وتكىزۋگە بارلىق جاعداي جاسالدى», – دەدى ايقىن قوڭىروۆ.
پارلامەنت ءماجىلىسىنىڭ دەپۋتاتتىعىنان ۇمىتكەر ۆلاديسلاۆ كوسارەۆ پارتيانى قولداعان بارشا قازاقستاندىقتارعا العىس ءبىلدىرىپ, سەنىمدەرىنە سەلكەۋ تۇسىرمەۋگە تىرىساتىندىقتارىن اتاپ ءوتتى.
قازاقستان كوممۋنيستىك حالىق پارتياسى قازاقستاندىقتاردىڭ جاڭا سەنىم مانداتىنا يە بولۋ ارقىلى وسى جولى دا ءوزىنىڭ ساياسي الاڭداعى ماڭىزدىلىعىن دالەلدەدى. ءبىز كوممۋنيستەرگە داۋىس بەرگەن ەلىمىزدىڭ بارلىق ازاماتتارىنا العىس ايتامىز. ءبىز ءوزىمىزدىڭ قارسىلاستارىمىزدى جەڭىستەرىمەن قۇتتىقتايمىز جانە ەگەمەندى قازاقستاننىڭ يگىلىگى ءۇشىن بىرلەسە وتىرىپ پارلامەنتتە جەمىستى ەڭبەك ەتۋگە سەنىم ءبىلدىرەمىز. كەزەكتەن تىس سايلاۋ زاڭنامالىق جۇمىستى جاڭا ساپاعا كوتەرىپ, قازاقستاندى اۋقىمدى تۇردە جاڭعىرتۋعا باعىتتالعان رەفورمالاردى ىسكە اسىرۋعا ءتيىستى ۇلەس قوسۋعا مۇمكىندىك بەرەدى», – دەدى ۆلاديسلاۆ كوسارەۆ.
راۋان قايدار,
«ەگەمەن قازاقستان».