سونىمەن, سايلاۋ اتتى ساياسي الامان اياقتالدى. پارلامەنتتىڭ تومەنگى پالاتاسىنداعى ورىندار ءۇشىن بولعان پارتيالار اراسىنداعى باسەكە مارەگە جەتىپ, داۋىس بەرۋدىڭ العاشقى ناتيجەلەرى جالپاق جۇرتقا جاريالانىپ ۇلگەرگەنى بەلگىلى.
ەلىمىزدىڭ ومىرىندەگى وسىناۋ ەلەۋلى وقيعاعا بايلانىستى كەشە «بىرلىك» ساياسي پارتياسىنىڭ توراعاسى سەرىك سۇلتانعالي بۇقارالىق اقپارات قۇرالدارى الدىندا مالىمدەمە جاسادى. ءوزىنىڭ وزەكجاردى ءسوزىن پرەزيدەنت نۇرسۇلتان نازارباەۆتى جانە ەلباسىنىڭ ساياسي تىرەگى – «نۇر وتان» پارتياسىن ايقىن جەڭىسىمەن قۇتتىقتاۋدان باستاعان ول ماجىلىسكە ءوز وكىلدەرىن ۇسىنۋعا مۇمكىندىك بەرەتىن مەجەنى باعىندىرعان باسقا دا ارىپتەستەرىنىڭ رەسپۋبليكامىزدىڭ جوعارى زاڭ شىعارۋشى ورگانىنداعى الداعى قىزمەتتەرىنە تابىس تىلەدى.
سالماقتى وي ساباقتاعان ساياساتكەردىڭ پىكىرىنشە, بۇل سايلاۋ پرەزيدەنتىمىزدىڭ ۇستانعان سارا باعىتىن, ۇلت جوسپارى مەن باسقا دا ماڭىزدى مەملەكەتتىك باعدارلامالاردى حالقىمىز بارىنشا قولدايتىنىن كورسەتكەن. ەڭ باستىسى, سايلاۋ قازاقستان رەسپۋبليكاسى كونستيتۋتسياسىنىڭ, حالىقارالىق ستاندارتتار مەن ەلىمىزدەگى ءتيىستى زاڭنامالار تالابىنا ساي, جوعارى دارەجەدە وتكەن. ورتالىق سايلاۋ كوميسسياسى ساياسي دوداعا تۇسكەن بارلىق پارتيالارعا تەڭ جاعداي جاساعانى ايرىقشا ەكپىنمەن ايتىلدى.
ال بۇل جولى ايى وڭىنان تۋا قويماعان «بىرلىك» پارتياسى كەلەشەكتە ءوز قاتارىن كوبەيتىپ, بەلسەندى جۇمىسىن جالعاستىرا بەرمەك. سايلاۋالدى ۇگىت-ناسيحات ناۋقانىندا قالىڭ كوپشىلىكتىڭ بارلىق الەۋمەتتىك توپتارىمەن كەزدەسكەن بىرلىكتىكتەر ولارعا نە كەرەك ەكەندىگىنە كوز جەتكىزىپ قانا قويماي, الدا اتقارار اۋقىمدى مىندەتتەرىن ايقىنداعان. ەندىگى ۋاقىتتا ولار وسى قارقىندى جوعالتپاي, جەرگىلىكتى فيليالدار مەن وكىلدىكتەرىنىڭ قىزمەتىن جاڭاشا سەرپىنمەن جالعاستىرماق.
«وتكەن سايلاۋ «بىرلىك» ساياسي پارتياسى ءۇشىن ۇلكەن بەلەس بولدى. ويتكەنى, ءبىز مول تاجىريبە جيناقتادىق. سونىڭ ءبارىن بولاشاقتا ءتيىمدى پايدالانباقپىز», دەپ ءسوزىن تۇيىندەدى سەرىك سۇلتانعالي.
جۋرناليستەردىڭ قويعان سۇراقتارىنا قىسقاشا جاۋاپ قايتارعان «بىرلىك» پارتياسىنىڭ باسشىسى جينالعانداردى ۇلىستىڭ ۇلى كۇنى – ناۋرىز مەيرامىمەن قۇتتىقتاپ, جۇرەكجاردى جىلى لەبىزىن جەتكىزدى.
تالعات باتىرحان,
«ەگەمەن قازاقستان».