تالدىقورعانداعى جۋرناليستەر ۇيىندە قازاقستان رەسپۋبليكاسىنداعى سايلاۋدى بايقاۋ جونىندەگى رەسپۋبليكالىق قوعامدىق كوميسسياسى الماتى وبلىستىق فيليالىنىڭ توراعاسى ادىلعازى ەسمۇرزانوۆ جۋرناليستەرمەن ءباسپاسوز بريفينگىن وتكىزدى.
وندا پارلامەنت ءماجىلىسى مەن ءماسليحاتتار دەپۋتاتتارىن سايلاۋدى قاداعالاۋ بارىسىندا اتقارىلاتىن جۇمىستار مەن دايىندىق ماسەلەسى باياندالدى. الماتى وبلىسىندا 931 سايلاۋ ۋچاسكەسى بولسا, سونىڭ ىشىندە اسكەري بولىمدەر سەكىلدى بايقاۋشىلاردى كىرگىزبەيتىن 50 جابىق سايلاۋ ۋچاسكەسى تاعى بار.
جالپى, فيليال تاراپىنان تالدىقورعان قالاسىنداعى 51 بايقاۋشىنىڭ باسىن قوسقان سەمينار جانە ەسكەلدى, كوكسۋ, قاراتال اۋداندارى مەن تەكەلى قالاسىنان قۇرالعان 124 بايقاۋشىمەن كوشپەلى سەمينار وتكىزىلىپتى. سونداي-اق, وبلىستىق اكىمدىكتىڭ كىشى زالىندا ونلاين رەجىمىندەگى بەينەسەميناردا 881 بايقاۋشىنىڭ باسى قوسىلعان. فيليال بايقاۋشىلارى بارلىق سايلاۋ ۋچاسكەلەرىندە تىركەلگەن.
ەگەر قانداي دا ءبىر كەلەڭسىزدىك, تۇسىنىسپەۋشىلىك تۋىنداپ جاتسا, بايقاۋشى مىندەتى دەرەۋ فوتوسۋرەتكە نەمەسە بەينەتاسپاعا ءتۇسىرىپ الۋى كەرەك. سول جاعدايدى كوميسسيا توراعاسىنا ەسكەرتىپ, سايلاۋ ەرەجەسىنە سايكەس اكت تولتىرىپ, جەكە قولدارىن قويىپ راستاپ, ءىس قاعازىنا تىركەتەدى. قوعامدىق نەگىزدە جۇمىس ىستەيتىن ءار بايقاۋشىعا 20 ناۋرىز كۇنى تاڭەرتەڭنەن كەشكە دەيىن سايلاۋ ۋچاسكەسىندە بولعانى ءۇشىن ءبىر كۇنگە 4 مىڭ تەڭگەدەن اقى تولەنەتىنى دە ايتىلدى.
سايلاۋ زاڭناماسى بويىنشا ءار سايلاۋشىنىڭ جەكە كۋالىگى ارقىلى ءبىر دانا بيۋللەتەن بەرىلەدى ەكەن. ءبىر ادامعا بىرنەشە بيۋللەتەن بەرۋ زاڭسىزدىق بولىپ سانالادى. بريفينگتە جۋرناليستەر تاراپىنان قويىلعان وزگە دە سۇراقتارعا فيليال باسشىسى جاۋاپ بەردى.
نۇربول الدىباەۆ,
«ەگەمەن قازاقستان».
تالدىقورعان.