قاراعاندى مەملەكەتتىك تەحنيكالىق ۋنيۆەرسيتەتىندە ەلباسى نۇرسۇلتان نازارباەۆتىڭ سەمەي يادرولىق پوليگونىن جابۋ تۋرالى جارلىعىنىڭ 25 جىلدىعىنا ارنالعان جاستاردىڭ «بەيبىتشىلىك ەستافەتاسى – جاستارعا» اتتى رەسپۋبليكالىق انتيادرولىق ونلاين فورۋمى ءوتتى.
ماڭىزدى شاراعا اقىن, كورنەكتى قوعام قايراتكەرى, «نەۆادا-سەمەي» حالىقارالىق انتيادرولىق قوزعالىسىنىڭ توراعاسى ولجاس سۇلەيمەنوۆ, سۋرەتشى, انتيادرولىق قوزعالىستىڭ بەلسەندىسى كارىپبەك كۇيىكوۆ, قازاقستان پرەزيدەنتى جانىنداعى مەملەكەتتىك باسقارۋ اكادەمياسىنىڭ پروفەسسورى تولەۋتاي سۇلەيمەنوۆ جانە باسقا دا قۇرمەتتى قوناقتار قاتىستى. جالپى, ونلاين فورۋمعا قازاقستاننىڭ 17 جوعارى وقۋ ورنىنان 10 مىڭعا تاياۋ ستۋدەنت جاستار تارتىلدى. ءبىر عانا قارمتۋ-ءدىڭ وزىنەن شاراعا 1700-دەن استام ادام اتسالىستى.
فورۋم جۇمىسىنىڭ باسىندا ءبىلىم جانە عىلىم ءمينيسترى ەرلان ساعاديەۆتىڭ, دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆانىڭ جانە ەنەرگەتيكا ءمينيسترى ۆلاديمير شكولنيكتىڭ ارنايى جولداعان قۇتتىقتاۋ حاتتارى وقىلدى. ال القالى جيىن يادرولىق قاۋىپسىزدىكتى ارتتىرۋ بويىنشا قازاقستان ساياساتىن جۇزەگە اسىرۋدىڭ تەتىكتەرى مەن قۇرالدارىن ءارى قاراي دامىتۋ بويىنشا تاجىريبە الماسۋ جانە كەلەشەكتى بولجاۋ ماقساتىن العا قويدى.
انتيادرولىق ونلاين فورۋمىندا ءسوز سويلەگەن عالىمدار قازاقستانداعى يادرولىق قاۋىپسىزدىك سالاسىنداعى اعىمداعى جاعداي, جاپپاي قىرىپ-جويۋ قارۋلارىن تاراتپاۋدىڭ حالىقارالىق رەجىمىن نىعايتۋ بويىنشا قازاقستان قىزمەتىنىڭ ناتيجەلىلىگىن باعالاپ, يادرولىق قاۋىپسىزدىك جانە يادرولىق قارۋدى تاراتپاۋ, قارۋسىزدانۋ سالاسىنداعى قازاقستاننىڭ جاھاندىق جەتەكشىلىگىن, ەلىمىزدىڭ يميدجىن حالىقارالىق ارەناعا كوتەرۋ ماسەلەلەرى بويىنشا پىكىر الماسىپ, كوكەيكەستى تاقىرىپتى تالقىعا سالدى.
جيىن سوڭىندا فورۋمعا قاتىسۋشىلار قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ اتىنا جانە قازاقستان جاستارىنا ۇندەۋ حاتتار جاريالادى. حاتتاردا «يادرولىق سىناقتارعا تىيىم سالۋ ماسەلەسى جاھاندىق قاۋىپسىزدىكتىڭ اسا ماڭىزدى پروبلەمالارىنىڭ ىشىندە وزەكتى ورىن الاتىنى كۇمانسىز. ءبىز وسى ۇدەرىسكە العاشقى جانە بارىنشا ءىرى ۇلەستى قازاقستان رەسپۋبليكاسى, ونىڭ تۇڭعىش پرەزيدەنتى قوسقانى ءۇشىن ايرىقشا ماقتانىش سەزىمىنە بولەنەمىز! 1991 جىلى ءسىز ءوز جارلىعىڭىزبەن الەمدەگى اسا ءىرى يادرولىق سىناق پوليگونىن ءبىرجولا جاپتىڭىز جانە اقىرىندا قۋاتى جونىنەن الەمدەگى 4-ءشى زىمىراندىق-يادرولىق ارسەنالدان ءوز ەركىڭىزبەن باس تارتتىڭىز. قازاقستان وسى ءساتتەن باستاپ, ءسىز وتە ءدال اتاپ كورسەتكەندەي, «بەيبىتشىلىك ەپيتسەنترىنە» اينالدى» دەگەن سوزدەر بار.
قايرات ءابىلدينوۆ,
«ەگەمەن قازاقستان».
قاراعاندى.