قازاقستان رەسپۋبليكاسى پارلامەنتى ماجىلىسىنە جانە بارلىق دەڭگەيدەگى ءماسليحاتتار دەپۋتاتتارىن سايلاۋعا دايىندىق جۇمىستارى اقتوبە قالاسىندا جۇيەلى جۇرگىزىلۋدە.
قالالىق سايلاۋ كوميسسياسىنىڭ حاتشىسى انار ءاليحانوۆانىڭ ايتۋىنشا, اقتوبەلىكتەر 133 ۋچاسكەلىك سايلاۋ كوميسسياسىندا وزدەرىنىڭ ازاماتتىق پارىزدارىن وتەي الادى. قالا تۇرعىندارىنىڭ كوبەيۋىنە بايلانىستى بيىل قوسىمشا سەگىز ۋچاسكەلىك سايلاۋ كوميسسياسى قۇرىلعان. ولار نەگىزىنەن «باتىس-2», «نۇر-اقتوبە», «اقجار-2», «وڭتۇستىك-باتىس» سياقتى شاعىن اۋدانداردا ورنالاسقان. بۇعان دەيىن بۇقارالىق اقپارات قۇرالدارىندا ۋچاسكەلىك سايلاۋ كوميسسيالارىنىڭ شەكارالارى, ورنالاسقان مەكەن-جايلارى جاريالاندى. بيىل قالالىق اكىمدىكتە وسى زامانعى سەرۆيستىك قىزمەت كورسەتۋ كەشەنى العاش رەت اشىلدى. ينتەرنەت-سەرۆيستەن قالالىقتار وزدەرىنىڭ قاي سايلاۋ ۋچاسكەسىنە قارايتىنىن, تىزىمدە بار-جوعىن بىلە الادى. سايلاۋشىلار بۇل ماقساتتا +7 (775) 5552016 ءنومىرى بويىنشا WhatsApp نەمەسە Telegram حابار الماسۋ سەرۆيسىن, 8755 ءنومىرى بويىنشا ينتەراكتيۆتى SMS سەرۆيستى, www.akimataktobe.kz قالالىق اكىمدىكتىڭ رەسمي سايتىن, 2003216 @akto.kz قالالىق اكىمدىكتىڭ ەلەكتروندى پوشتاسىن, 213274 ءنومىرى بويىنشا Gall-ورتالىعىن پايدالانا الادى.
سونداي-اق, قالالىق اكىمدىكتە سايلاۋ ناۋقانى باستالعاننان بەرى «قىزۋ جەلى» انىقتاما قىزمەتى جۇمىس ىستەيدى. بۇل قىزمەتتەن دە سايلاۋعا بايلانىستى قانداي دا سۇراقتارعا تولىق جاۋاپ الۋعا ابدەن بولادى. انىقتاما قىزمەتى تاڭعى 09.00. ساعاتتان كەشكى 21.00. ساعاتقا دەيىن جۇمىس ىستەيدى.بۇل دا سايلاۋشىلاردىڭ كوبەيۋىنە بايلانىستى اشىلعان قىزمەت. سايلاۋ وتەتىن كۇن تايانعاندا انىقتاما قىزمەتى دەمالىس كۇندەرى دە جۇمىس ىستەيتىن بولادى. قازىر بىردە-ءبىر سايلاۋشىنىڭ نازاردان تىس قالماۋىنا باسا كوڭىل بولىنۋدە. سايلاۋشىلار ءتىزىمىن ناقتىلاۋ دا اياقتالىپ كەلەدى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.