اتىراۋ وبلىسىنىڭ اكىمى باقتىقوجا ىزمۇحامبەتوۆ كەشە اتىراۋ جۇرتشىلىعى الىندا تاعى ءبىر رەت, ناقتىلاي ايتقاندا, ءتورتىنشى رەت ەسەپ بەردى. الدىمەن ايتالىق, ءوزىن ەشكىمگە ماقتاتتىرمادى. كەرىسىنشە, ەسەپتى كەزدەسۋگە جينالعانداردىڭ سۇراعىن بايىپپەن تىڭدادى.
اكىمنىڭ بايانداۋىنا توقتالار بولساق, الدىمەن, ەل يگىلىگى ءۇشىن ىسكە قوسىلعان جوبالاردىڭ ماڭىزى تارقاتىلدى. ناقتى دەرەكتەرگە توقتالساق, وڭىردە وتكەن جىلى يندۋستريالاندىرۋ كارتاسىمەن 10 جوبا ىسكە قوسىلدى. مۇنىڭ التاۋى اگروونەركاسىپ كەشەنى سالاسىندا ەكەنىن ەسكەرسەك, تابيعاتىنىڭ قاتالدىعى مەن جارتىلاي شولەيتتىگىنە بايلانىستى وركەندەۋى كەنجەلەگەن اۋىل شارۋاشىلىعىن دامىتۋعا باسىمدىق بەرىلگەنى انىق بايقالادى. اسىرەسە, بىلتىردان بەرى جىلىنا 75 مىڭ قۇتى كوكونىس جانە 370 توننا سالات جاباتىن كوكونىس كونسەرۆىلەۋ, ءبىر جىلدا 7,2 مىڭ توننا ەت وڭدەيتىن تسەحتار جۇمىسىن جانداندىرا باستادى. بۇدان بولەك, «اتىراۋ-بودەنە» سەرىكتەستىگى جىلىنا 2,6 ملن.دانا جۇمىرتقا جانە 2,4 توننا بودەنە ەتىن وڭدەيتىن فەرماسىن ىسكە قوستى. كوپ جىلدار بويى اۋىلداعى ءار وتباسىنىڭ قوراسىندا تەكشەلەپ جينالىپ, كەيىن ورتەلەتىن, نە ءشىرىپ-توزاتىن تۇيە مەن قوي ءجۇنىنىڭ تيىسىنشە 100 جانە 350 تونناسىن وڭدەپ, ولاردان ساپالى 400 مىڭ مەتر شۇعا مەن جامىلعى كورپە دايىندايتىن توقىما فابريكاسىنىڭ ماڭىزى ايرىقشا ارتقالى تۇر قازىر.
سوڭعى جىلدارى اۋىل شارۋاشىلىعى دا كاسىپكەرلىكتىڭ كەڭ قانات جايۋىنا قولايلى سالاعا اينالا باستادى. باسقاسىن ايتپاعاندا, تەك سوڭعى ءۇش جىلدىڭ وزىندە اتالعان سالادا 18 كاسىپورىن اشىلىپتى. سيىر جانە ەشكى ءسۇتىن, شۇبات پەن قىمىز وندىرەتىن ءتورت ءسۇت زاۋىتىنىڭ جىلدىق قۋاتى – 16 مىڭ توننا ءسۇت ونىمدەرى. 160 توننا بەكىرە ەتىن جانە 2 توننا قارا ۋىلدىرىق وندىرەتىن ەكى بالىق زاۋىتى جانە بار. كاسىپكەرلەر 12 ملن. دانا قۇتىداعى ەتتى دە شىعارادى. ال ەكى ەت كومبيناتىندا وڭدەلەتىن ءونىم 7,7 مىڭ توننانى قۇراسا, قوس قۇس فابريكاسىندا شىعارىلاتىن جۇمىرتقانىڭ جالپى كولەمى 92 ملن. داناعا جەتكەلى وتىر.
«اگروبيزنەس-2020» دەگەن كەرەمەت باعدارلاما بار, –دەدى وسى ورايدا وبلىس اكىمى باقتىقوجا ىزمۇحامبەتوۆ. «سىباعا» باعىتى بويىنشا شارۋالارعا ءىرى قارا, «قۇلان» بويىنشا جىلقى, «التىن اسىق» بويىنشا قوي ساتىپ الىپ بەرەدى. ەكى جىل كانيكۋلى بار. وعان قوسا, مالدى اسىلداندىرساڭىز, ءىرى قاراعا 18 مىڭ تەڭگە, قويعا 1,5 مىڭ تەڭگە سۋبسيديا بەرەدى. بىلتىر وسى باعدارلامانى پايدالانىپ شارۋالار 624 سيىر, 944 جىلقى, 3821 قوي ساتىپ العان. باعدارلاما جالپى وبلىس بويىنشا ورىندالعانىمەن, يساتاي اۋدانى عانا بارلىق باعىتقا تولىق قاتىسىپ وتىر. وبلىستا 16 اسىل تۇقىمدى مال شارۋاشىلىعى بار.
اتىراۋدا ەگىن شارۋاشىلىعىن دامىتۋعا دا كوڭىل ءبولىنىپ وتىرعانىنا مىنا دەرەكتەر دالەل بولا الادى. بۇرىن كوكونىس پەن باقشا داقىلدارىن وسىرەتىن ەگىستىك كولەمى 357 گەكتاردان اسپاعان بولسا, بىلتىر 6,8 مىڭ گەكتارعا ۇلعايدى. ەندى بيىل كارتوپتى 2 000 گەكتارعا, باقشا داقىلدارىن 1 015 گەكتارعا, كوكونىستى 2 490 گەكتارعا ەگۋ جوسپارلانىپتى. بۇل ورايدا, اسىرەسە, تامشىلاتىپ سۋارۋ ءادىسىنىڭ تيىمدىلىگى بايقالادى. قازىر بۇل ءادىستى اتىراۋ قالاسىنىڭ, يندەر, قۇرمانعازى مەن ماحامبەت اۋداندارىنىڭ شارۋاگەرلەرى كەڭىنەن قولدانادى. سونىمەن بىرگە, اۋىل شارۋاشىلىعى ونىمدەرىن جىلىجايدا وسىرۋگە دە قۇلشىنىس تانىتقاندار بىلتىر 2 گەكتار جىلىجايدى ىسكە قوسىپتى.
راس, اتىراۋ – بۇرىننان مۇناي-گاز ونەركاسىبى قارقىندى دامىعان ءوڭىر. بۇل سالاعا قۇيىلاتىن ينۆەستيتسيانىڭ دا ۇلەسى باسىم. قازىر بۇل سالادا ىسكە اسىرىلىپ جاتقان تىڭ جوبالار جەتەرلىك. ءوزى دە وسى سالانىڭ قاتارداعى مۇنايشىسىنان مينيستر ءدارەجەسىنە دەيىنگى باسپالداقتان وتكەن اكىم ءوڭىردى مۇناي-گاز ونەركاسىبى سالاسىنا تاۋەلدىلىكتەن ارىلتۋ ءۇشىن كونوميكانىڭ وزگە بۋىندارىن دامىتۋعا كوڭىل ءبولدى. ءسويتىپ, ءوڭىر تۇرعىندارىنىڭ الەۋمەتتىك احۋالىن جاقسارتۋ ماقساتىمەن تەك اتىراۋ قالاسىندا ەمەس, اۋدانداردا دا تۇرعىن ءۇي سالۋدى قولعا الدى. بۇرىنعى كەزدى ايتپاعاننىڭ وزىندە سوڭعى 25 جىلدىڭ ىشىندە كەزدەسپەگەن جاڭالىق – اۋدان ورتالىقتارىنان 600 پاتەر تاپسىرىلدى.
حالىقتى گازبەن قامتۋداعى ەڭ ۇلكەن جوبا, تاۋەكەلگە بەل بايلاپ كىرىسكەن جۇمىسىمىز – ازعىر وڭىرىنە گاز قۇبىرىن جۇرگىزۋ قولعا الىندى. سول ءوڭىردىڭ 10 اۋىلىندا 8 مىڭعا جۋىق تۇرعىن ءومىر سۇرەدى. بۇل جۇمىس ەلباسىمىزدىڭ شەكارا ماڭىنداعى اۋىلداردى دامىتۋ جونىندە بەرگەن تاپسىرماسىنا سايكەس جاسالۋدا, دەدى باقتىقوجا ىزمۇحامبەتوۆ.
اكىم ءوڭىر كاسىپكەرلەرىن جاقسى ءىستى باستاۋعا شاقىردى. بۇل –اتا-انا قامقورلىعىنسىز قالعان بالالاردى وتباسىلاردا تاربيەلەۋ ءۇشىن قامقورشى اتا-انالارعا ءبىر پاتەرلى 10 ءۇي سالۋ. «بۇل الەۋمەتتىك جوبانى «جاناشىر» دەپ اتايىق. بەسىكتى اۋىلىنان 6 گەكتار جەر بەلگىلەندى. ون كاسىپكەر تاۋەلسىزدىكتىڭ 25 جىلدىعىنا 200 شارشى مەترلىك ءبىر-ءبىر ۇيدەن سالىپ بەرسە, وبلىستاعى بالالار ءۇيىن جابامىز. بۇل جوبانى مەملەكەت دە قارجىلاندىرا الادى. كاسىپكەرلەردى الەۋمەتتىك ماسەلەگە قايىرىمدىلىق جاساۋعا شاقىرامىن», دەگەن كەي سالاداعى كەمشىلىكتەردى دە اينالىپ وتپەدى. ماسەلەن, تۋبەركۋلەز دەرتى مەن انا ءولىمىنىڭ كەزدەسىپ وتىرعانىنا توقتالدى.
بۇدان سوڭ ب.ىزمۇحامبەتوۆ جۇرتشىلىق تاراپىنان قويىلعان سۇراقتاردىڭ ارقايسىسىنا جەكە-جەكە جاۋاپ بەردى. كوپشىلىگى اۋىز سۋ, كوشە جولى مەن جارىعى تۋراسىندا قويىلدى.
جولداسبەك شوپەعۇل,
«ەگەمەن قازاقستان».
اتىراۋ وبلىسى.