قاراعاندى. 18 اقپان. قاراعاندى وبلىسىندا زاڭسىز اڭ اۋلاپ, قىزىل كىتاپقا ەنگەن كيىكتەردى اتقان كۇدىكتىلەر قولعا ءتۇستى. بۇل تۋرالى وبلىستىق ىشكى ىستەر دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
نۇرا اۋداندىق ىشكى ىستەر ءبولىمىنىڭ تابيعاتتى قورعاۋ پوليتسياسى مەن «وحوتزووپروم» مەكەمەسىنىڭ قىزمەتكەرلەرى بىرىگىپ جۇرگىزگەن شارانىڭ ناتيجەسىندە نۇرا اۋدانىنىڭ اۋماعىندا «ۋاز» جانە تىركەمەسىندە موتورلى شاناسى بار «نيۆا» اۆتوكولىكتەرى تەكسەرۋدەن وتكىزىلدى. تەكسەرۋ بارىسىندا ءۇش كيىكتىڭ ەتى سالىنعان بىرنەشە قاپ تابىلدى. ءتيىستى حاتتامالار تولتىرىلعاننان كەيىن, كيىكتىڭ ەتى, براكونەرلەرگە تيەسىلى مىلتىق پەن ونىڭ وقتارى جانە موتورلى شانا تاركىلەندى.
قازىرگى ۋاقىتتا كۇدىكتىلەر قاماۋعا الىنىپ, سوتقا دەيىنگى تەرگەۋ امالدارى جۇرگىزىلىپ جاتىر.
قايرات ءابىلدينوۆ.
دەرەك: قاراعاندى وبلىستىق ىشكى ىستەر دەپارتامەنتىنىڭ ءباسپاسوز قىزمەتى.
سۋرەت: egemen.kz.