استانا. 18 اقپان. بۇگىن ۋەفا چەمپيوندار ليگاسىنىڭ پلەي-وفف ساتىسىندا تاعى ەكى كەزدەسۋ ءوتتى. اتاپ ايتقاندا, بەلگيانىڭ «گەنت» كومانداسى ءوز الاڭىندا گەرمانيانىڭ «ۆولفسبۋرگىن» قابىلداپ, 2:3 ەسەبىمەن ەسە جىبەرسە, يسپانيانىڭ «رەالى» (مادريد) سىرت الاڭدا يتاليانىڭ «روماسىنان» 2:0 ەسەبىمەن باسىم ءتۇستى. بۇل تۋرالى egemen.kz ءتىلشىسى حابارلادى.
«گەنت» (گەنت, بەلگيا) – «ۆولفسبۋرگ» (ۆولفسبۋرگ, گەرمانيا) 2:3
گولدار: سۆەن كۋمس 80, كاليفا كۋليبالي 89 – يۋليان دراكسلەر 44, 54, ماكس كرۋزە 60.
توپتىق كەزەڭدە سەنساتسيا جاساپ, تالايدىڭ نازارىن اۋدارعان «گەنت» بۇل ويىندا جەڭىلسە دە, جانكۇيەرلەرىنە قۋانىش سىيلاي الدى. قارسىلاسىنىڭ وزىنە قاراعاندا تاجىريبەلى ەكەنىنە قاراماستان, ماتچ بارىسىندا دوپقا يەلىك ەتۋ كورسەتكىشى, قاقپاعا جاسالعان تۋرا سوققى سىندى ستاتيستيكالىق ناتيجەلەر بويىنشا باسىم بولعان بەلگيالىقتار سوڭعى مينۋتتارعا دەيىن ايقاستى.
كەزدەسۋدىڭ ەسەبى 44-مينۋتتا «ۆولفسبۋرگ» ويىنشىسى يۋليان دراكسلەردىڭ گولىمەن اشىلدى. 54-مينۋتتا ول تاعى دا مەرگەندىگىمەن كوزگە ءتۇسىپ, ءدۋبلدىڭ اۆتورى اتاندى. ارادا 6 مينۋت وتكەندە گەرمانيالىقتار ەسەپتى 3:0-گە جەتكىزدى. بۇل جولى ماكس كرۋزە ناتيجەلى سوققى جاساعان بولاتىن.
الايدا, ءوز جانكۇيەرلەرى الدىندا نامىستى قولدان بەرمەۋدى ماقسات تۇتقان «گەنت» ويىنشىلارى 80 جانە 89-مينۋتتاردا سوققان ەكى گولمەن قارىمتا قايتاردى. بۇل گولداردىڭ اۆتورلارى – تيىسىنشە سۆەن كۋمس پەن كاليفا كۋليبالي. گەنتتىكتەردىڭ تارازى باسىن تەڭەستىرۋگە ۋاقىت جەتپەدى. ناتيجەسىندە سىرت الاڭدا جەڭىسكە جەتكەن «ۆولسبۋرگ» شيرەك فينالعا ءبىر تابان جاقىندادى. قوس كوماندانىڭ قارىمتا كەزدەسۋى 8 ناۋرىز كۇنى گەرمانيادا وتەدى.
«روما» (ريم, يتاليا) – «رەال» (مادريد, يسپانيا) 0:2
گولدار: كريشتيانۋ رونالدۋ 57, حەسە 86.
جانكۇيەرلەر مەن مامانداردىڭ نازارىن اۋدارعان بۇل ويىندا «رەال» جەڭىسكە جەتتى. ماتچتىڭ ءبىرىنشى تايمىندا ەسەپ اشىلعان جوق. ال ەكىنشى بولىكتە يسپانيالىقتار قارقىندارىن كۇشەيتىپ, جۇيەلى ويىن ورنەگىن كورسەتتى. ناتيجەسىندە, 57-مينۋتتا كريشتيانۋ رونالدۋ ەسەپ اشسا, 86-مينۋتتا حەسە «رەالدىڭ» ەكىنشى گولىن سوقتى. وسىلايشا, سىرت الاڭدا جەڭىسكە جەتكەن كورولدىك كلۋب شيرەك فينال ماسەلەسىن جارتىلاي شەشىپ قويدى. بۇل كوماندالاردىڭ دا قارىمتا ويىنى 8 ناۋرىزدا وينالادى.
ەلامان قوڭىر.
دەرەك: egemen.kz.
سۋرەت: uefa.com, championat.com.