تاراز. 17 اقپان. تاراز مەملەكەتتىك پەداگوگيكالىق ينستيتۋتىندا «جانساراي» جاستار تەاترى اشىلدى. ونىڭ اكتەرلەرى اتالعان وقۋ ورنىنىڭ ستۋدەنتتەرى. بۇل تۋرالى تارمپي ءباسپاسوز قىزمەتى حابارلادى.
تەاتر ونەرپازدارى يسرايل ساپاربايدىڭ «سىعان سەرەناداسى» مۋزىكالىق دراماسىن ساحنالادى. بۇل – تەاتر رەپەرتۋارىنداعى العاشقى كلاسسيكالىق شىعارما.
ايگىلى ءشامشىنىڭ جۇرەك شىمىرلاتار, سەزىم سەرپىلتەر قۇدىرەتتى اندەرى ءاربىر قازاقتىڭ اۋزىندا. سول سۇلۋ اندەر ومىرگە قالاي كەلدى؟ جالپى ءشامشىنىڭ ءوز تاعدىرى, ءوز ماحابباتى تۋرالى نە بىلەسىز؟ ەرىكسىز بيگە جەتەلەپ ماحابباتپەن تەبىرەنتەر «سىعان سەرەناداسى». وسى ءبىر ءاندى وياتقان سىعان قىزى يزولدا جايلى ەستىگەنىڭىز بار ما؟ ءان ماحابباتى ءشامشى تاعدىرىن توقايلاستىرعان يسرايل ساپاربايدىڭ «سىعان سەرەناداسى» اتتى پوەتيكالىق دراماسى ساحنادا وسى تۇرعىدا سىر شەرتىسەدى. اۋەنگە تولى دراما اسەرگە دە تولى. «سىعان سەرەناداسى» - تەاتر ساحناسىنداعى شوقتىعى بيىك تۋىندىلاردىڭ ءبىرى. ونىڭ ورەسى كەڭ, قۇپياسى اشىلماعان. ۆالس كورولى ايگىلى ءشامشى رۋحىنا باعىشتالعان بۇل تۋىندى سازگەردىڭ تاعدىرىن بەينەلەيدى.
تەاتر رەجيسەرى, قازاقستان رەسپۋبليكاسىنىڭ ەڭبەك سىڭىرگەن ءارتىسى مايرا الىمبەتوۆانىڭ ايتۋىنشا, بولاشاقتا ماحاببات پەن دوستىقتىڭ قانشالىقتى قۇدىرەتتى كۇش, ۇلى سەزىم ەكەنىن ۇعىندىراتىن ءھام جۇرتشىلىقتىڭ كوڭىل تورىنەن ورىن العان كلاسسيكالىق قويىلىمدار ساحنالانباق.
«تەاتر – بۇل ماڭگىلىك سەزىمگە تولى تۇتاس ءبىر ءومىر. ماحاببات پەن وشپەندىلىك, ءومىر مەن ءولىم, سەنىم مەن ءۇمىت. ستۋدەنتتەر ءۇشىن ول تەاتر ونەرىنىڭ سيقىرلى كۇشىنە جاناسۋعا, ءتۇرلى كەيىپكەرلەردىڭ بەينەسىن سومداۋعا تۇسىنۋگە جول اشادى. بۇل تەاتر قويىلىمدارىن كاسىبي ماماندار ەمەس, ستۋدەنتتەر قويادى. بۇل – جاستاردىڭ شىعارماشىلىعىن شىڭداۋعا ۇلكەن سەپ بولماق», دەدى تاراز مەملەكەتتىك پەداگوگيكالىق ينستيتۋتىنىڭ رەكتورى داريا قوجامجاروۆا.
كەلگەن قوناقتار قويىلىم سوڭىنان ۇزدىكسىز, ۇزاق ۋاقىت قوشەمەت كورسەتىپ, شاپالاقتان شاشۋ شاشتى. ستۋدەنتتەردىڭ ونەرىن تاماشالاۋعا كەلگەن جامبىل وبلىس اكىمدىگى مادەنيەت باسقارماسى باستىعى دۇيسەن بىقىباەۆ, جامبىل وبلىستىق قازاق دراما تەاترىنىڭ ديرەكتورى بولات بەكجان جانە وزگە دە قوناقتار قويىلىمنىڭ جاستارعا بەرەر ءتالىم-تاربيەسىنىڭ قانشالىقتى زور ەكەنىن ايتىپ, ءوز ريزاشىلىقتارىن ءبىلدىردى.
قازىرگى ۋاقىتتا تەاتر ستۋدەنتتەرى «ايشا ءبيبى» اتتى تاريحي قويىلىمعا دايىندالۋدا.
ورالحان ءداۋىت.
دەرەك, سۋرەت: egemen.kz