استانا. 17 اقپان. وتكەن تۇندە ۋەفا چەمپيوندار ليگاسىنىڭ 1/8 فينالى شەڭبەرىندە ەكى ويىن وينالدى. فرانتسيانىڭ پسج-سى انگليانىڭ «چەلسيىن» قابىلداپ, 2:1 ەسەبىمەن جەڭىسكە جەتسە, توپتىق كەزەڭدە «استانامەن» ءبىر توپتا بولعان پورتۋگاليانىڭ «بەنفيكاسى» ءوز الاڭىندا رەسەيدىڭ «زەنيتىنەن» 1:0 ەسەبىمەن باسىم ءتۇستى. بۇل تۋرالى egemen.kz ءتىلشىسى حابارلادى.
پسج (پاريج, فرانتسيا) – «چەلسي» (لوندون, انگليا) 2:1
گولدار: زلاتان يبراگيموۆيچ 39, ەدينسون كاۆاني 78 – وبي ميكەل 45+1.
زلاتان يبراگيموۆيچ باستاعان پسج ويىن بارىسىندا اعىلشىنداردان ايتارلىقتاي باسىم بولدى. اتاپ ايتقاندا, 90 مينۋتتا پسج فۋتبولشىلارى قارسىلاستار قاقپاسىنا 17 سوققى جاساسا, لوندوندىقتاردىڭ 7 سوققىمەن عانا قارىمتا قايتارۋعا شامالارى جەتتى. باسقا دا ستاتيستيكالىق كورسەتكىشتەر بويىنشا باسىم تۇسكەن لوران بلاننىڭ شاكىرتتەرى زاڭدى جەڭىسكە قول جەتكىزدى.
كەزدەسۋدىڭ ەسەبى 39-مينۋتتا ستاندارتتى جاعدايدان كەيىن اشىلدى. ناقتى ايتار بولساق, ايىپ سوققىسىن ورىنداعان يبراگيموۆيچ تاماشا گولدىڭ اۆتورى اتاندى. وسى رەتتە دوپتىڭ جول-جونەكەي «چەلسي» ويىنشىسى وبي ميكەلگە ءتيىپ, باعىتىن وزگەرتكەنىن اتاپ وتكەن ءجون.
ءبىرىنشى تايم تۇگەسىلەر تۇستا, ياعني 45-مينۋتتا ميكەل ءدال سوققىسىمەن تارازى باسىن تەڭەستىرگەن ەدى. الايدا, 79-مينۋتتا ويىنعا تىڭنان قوسىلعان ەدينسون كاۆاني مەرگەندىگىمەن كوزگە ءتۇسىپ, كومانداسىنىڭ جەڭىس گولىن سوقتى.
«بەنفيكا» (ليسسابون, پورتۋگاليا) – «زەنيت» (سانكت-پەتەربۋرگ, رەسەي) 1:0
گول: جوناس 90+1.
پورتۋگاليا استاناسى – ليسسابون قالاسىندا وتكەن «بەنفيكا» – «زەنيت» ماتچىندا ويىن تاعدىرىن سوڭعى مينۋتتا سوعىلعان جالعىز گول شەشتى. 90 مينۋت بويى پورتۋگالداردىڭ جويقىن شابۋىلدارىنا توتەپ بەرگەن رەسەيلىكتەر تورەشىنىڭ نەگىزگى ۋاقىتقا قوسقان قوسىمشا مينۋتتارىندا قاقپالارىنا گول جىبەرىپ الدى. گولدىڭ اۆتورى – «بەنفيكانىڭ» شابۋىلشىسى جوناس.
بۇل كوماندالاردىڭ قارىمتا كەزدەسۋلەرى 9 ناۋرىزدا وتەدى. سول كۇنى «چەلسي» لوندوندا پسج-نى قابىلداسا, «زەنيت» سانكت-پەتەربۋرگتە «بەنفيكامەن» شيرەك فينالدىڭ جولداماسىن ساراپقا سالادى.
ايتا كەتەيىك, بۇگىن تۇندە ءتۋرنيردىڭ اتالعان ساتىسى اياسىندا تاعى ەكى ماتچ وتەدى. بەلگيانىڭ «گەنت» كومانداسى ءوز الاڭىندا گەرمانيانىڭ «ۆولسبۋرگىمەن» سىنعا تۇسسە, يتاليانىڭ «روماسى» ريمدە يسپانيانىڭ «رەالىمەن» (مادريد) كەزدەسەدى. بۇل ويىندار استانا ۋاقىتىمەن ساعات 01:45-تە باستالادى.
ەلامان قوڭىر.
دەرەك: egemen.kz.
سۋرەت: championat.com.