الماتى. 17 اقپان. الماتىدا پرەزيدەنت مۇراعاتىندا ۇلتتىق عىلىم اكادەمياسىنىڭ قۇرىلعانىنا 70 جىل تولۋىنا وراي «ەلدىڭ ينتەللەكتۋالدى كاپيتالى: تاۋەلسىز قازاقستاننىڭ زوولوگيا عىلىمى» اتتى تاريحي-قۇجاتتىق كورمە جانە دوڭگەلەك ۇستەل ءوتتى. بۇل تۋرالى egemen.kz ءتىلشىسى حابارلادى.
تاريحي-قۇجاتتىق كورمە ءبىلىم جانە عىلىم مينيسترلىگى عىلىم كوميتەتى زوولوگيا ينستيتۋتى, عىلىمي تەحنيكالىق قۇجاتتاما ورتالىق مەملەكەتتىك مۇراعاتىمەن (قر عتق ومم), «عىلىم ورداسى» رەسپۋبليكالىق مەملەكەتتىك كاسىپورىن ۆەدومستۆولىق مۇراعاتىمەن بىرلەستىكتە دايىندالدى.
زياتكەرلىك كورمەدە قازاقستاننىڭ زوولوگيا عىلىمىنىڭ تاريحىن, ونىڭ قالىپتاسۋى جانە دامۋىن بەينەلەيتىن مۇراعات قۇجاتتارى: زوولوگيا سەكتورىنىڭ قۇرىلۋى تۋرالى حاتتامالار مەن قاۋلىلار, باسشىلاردى تاعايىنداۋ تۋرالى حاتتامالاردان ۇزىندىلەر, عىلىمي-زەرتتەۋ جۇمىستارىنىڭ جوسپارلارى مەن ەسەپتەرى, جاريالانعان ەڭبەكتەر تۋرالى مالىمەتتەر, ينستيتۋتتىڭ زەرتتەۋ قىزمەتى مەن حالىقارالىق قاتىناستارى بويىنشا حات الماسۋ ۇسىنىلدى. كورمەدە سيرەك كەزدەسەتىن, قىزىل كىتاپقا ەنگەن جاندىكتەردىڭ زوولوگيالىق كوللەكتسيالارى, زوولوگيا ينستيتۋتىنىڭ ەڭبەكتەرى ورنالاستىرىلدى.
كورمەنىڭ سالتاناتتى اشىلۋىندا پرەزيدەنت مۇراعاتىنىڭ ديرەكتورى بوريس جاپاروۆ, ۇلتتىق عىلىم اكادەمياسىنىڭ پرەزيدەنتى مۇرات جۇرىنوۆ, عىلىمي تەحنيكالىق قۇجاتتاما ورتالىق مەملەكەتتىك مۇراعاتىنىڭ ديرەكتورى گۇلايحان سارسەنوۆا ءسوز سويلەدى.
دوڭگەلەك ۇستەل شەڭبەرىندە پاۆەل ماريكوۆسكيدىڭ پرەزيدەنت مۇراعاتىنىڭ قورىندا ساقتاۋداعى قولجازباسىنىڭ نەگىزىندە دايىندالعان «ۆوسپومينانيا ناتۋراليستا, زوولوگا, پيساتەليا» كىتابىنىڭ تۇساۋكەسەرى ءوتتى. تۇساۋكەسەر قر عتق ومم-دا ساقتاۋداعى پاۆەل ماريكوۆسكيدىڭ جەكە قورىنىڭ ماتەريالدارى نەگىزىندە دايىندالعان كورمەمەن قوسا وتكىزىلدى.
ايناش ەسالي.
دەرەك, سۋرەت: egemen.kz.