استانا. 30 قاڭتار. تۇتىنۋشىلار قۇقىعىن قورعاۋ كوميتەتى قازاقستاندىقتارعا وڭتۇستىك امەريكا ەلدەرىنە تاراعان زيكا ىندەتىنە اسقان ساقتىقپەن قاراۋدى ەسكەرتەدى. بۇل تۋرالى tengrinews.kz سايتىنا سىلتەمە جاساعان egemen.kz ءتىلشىسى حابارلادى.
دۇنيەجۇزىلىك دەنساۋلىق ساقتاۋ ۇيىمى قاۋىپتى ىندەتتىڭ 2015 جىلى ءساۋىر ايىندا برازيليا مەملەكەتىندە باستالعانىن رەسمي تۇردە حابارلادى. وسىدان سوڭ, وڭتۇستىك امەريكانىڭ وزگە دە ەلدەرىنە تاراعان.
زيكا ىندەتى 27 قاڭتار كۇنى الەمنىڭ 27 ەلىنە تاراعانى بەلگىلى بولدى. ولار: باربادوس, بوليۆيا, برازيليا, كابو-ۆەردە, كولۋمبيا, ەكۆادور, سالۆادور, فيدجي, فرانتسۋز گۆياناسى, گۆادەلۋپا, گايانا, گايتي, گوندۋراس, مالديۆ, مارتينيكا, مەكسيكا, جاڭا كالەدونيا, پاناما, پاراگۆاي, پۋەرتو-ريكو, سەن-مارتەن, ساموا, سولومون ارالدارى, سۋرينام, تايلاند جانە ۆەنەسۋەلا.
زيكا ىندەتى كوبىنە قاۋىپتى ۆيرۋس جۇقتىرعان جاندىكتەر مەن تورپيكالىق ايماقتاردا ءومىر سۇرەتىن ماسالار ارقىلى جۇعادى. ادامدار اراسىنداعى جۇقپالى اۋرۋلاردىڭ قاتارىنا جاتپايدى. دەنە قىزۋى, تىتىركەنۋى, بۋىن اراسىنداعى جايسىزدىق, باس اۋرۋلارى ىندەتتىڭ نەگىزگى بەلگىلەرى بولىپ ەسەپتەلەدى.
زيكا اسىرەسە جۇكتى ايەلدەر ءۇشىن اسا قاۋىپتى. جۇكتىلىكتىڭ العاشقى 12-16 اپتاسىندا جۇقتىرعان بولاشاق انادان ميكروتسەفاليامەن اۋىرعان نارەستە دۇنيەگە كەلەدى. ميكروتسەفاليا ءسابيدىڭ باس سۇيەگى مەن مي قۇرىلىسىنىڭ دامۋىنا كەرى اسەرىن تيگىزەدى. بۇل كەزدە ارنايى ۆاكتسينالار ەش كومەكتەسپەيدى.
تۇتىنۋشىلار قۇقىعىن قورعاۋ كوميتەتى قازاقستاندىقتاردىڭ شەتەلگە بارعان كەزدەرىندە وسى ماسەلەگە اسقان ساقتىقپەن قاراۋدى ەسكەرتتى. لاجى بولسا, قاۋىپتىڭ بەتى قايتقانشا, شەتەلگە بارماعاندارى ءجون ەكەنىن العا تارتتى.
«شەتەلگە بارعان قازاقستاندىقتار اۋرۋ تاراتقىش ماسالاردان قورعانىپ, جابىق كيىمدەر كيگەنى ءجون. لاس ايماقتاردان الىس بولىپ, قوناق ۇيلەردە تەك سالقىنداتقىشتى عانا پايدالانۋلارى قاجەت. قازاقستانعا كەلگەننەن كەيىن اۋرۋ بەلگىلەرى بىلىنگەن بولسا, ۋاقىت سوزباي دارىگەرلەر كومەگىنە جۇگىنگەندەرى ءجون», – دەيدى تۇتىنۋشىلار قۇقىعىن قورعاۋ كوميتەتى.
ايان ءابدۋالي.
دەرەك: tengrinews.ru.
سۋرەت: livemint.com.