«نۇر وتان» پارتياسىنىڭ XVII سەزىندە سويلەگەن ەلباسىنىڭ ءسوزىن تەلەديداردان كورىپ, دەن قويىپ تىڭدادىق. ۇلت جوسپارىن ىسكە اسىرۋ ءۇشىن مەملەكەتتىك قىزمەتكەرلەردىڭ بىلىك, ءبىلىمى مىقتى, باسەكەگە قابىلەتتى, ەكونوميكالىق ساۋاتتى بولۋى تالاپ ەتىلۋى زاڭدى. ايتپەسە, كوكە, جاكەسىنىڭ ارقاسىندا جاقسى مانساپ الىپ, ءشوپ باسىن سىندىرماي جۇرگەندەر دە جەتەرلىك.
وبلىس باسشىلارىنىڭ جەكە حاندىق قۇرعانداي جان-جاعىمەن ساناسپايتىندىعى دا جاقسى ايتىلدى. ماسەلەن, وڭتۇستىك قازاقستان وبلىسىندا رەسپۋبليكا بويىنشا جىلىجايلاردىڭ 87 پايىزى ورنالاسقان. ءونىمى رەسەيگە دەيىن كەتىپ جاتادى. نەگە وزگە وبلىستار كەلىسىمشارت تۇزبەيدى؟! بىرىندە بار, بىرىندە جوققا تالداۋ جاساپ, بىرلەسە ءىس-قيمىل جاساسا, كورشى مەملەكەتتەردەن اعىلىپ جاتقان ازىق-ت ۇلىكتەرگە كەتەتىن قارجى ءوز ەلىمىزدە قالىپ, ءوز ەكونوميكامىزعا جۇمىس ىستەۋمەن قاتار قىمباتشىلىقتىڭ الدىن الار ەدىك. قازىر بارلىق دەڭگەيدەگى اكىمدەردەن ەڭ الدىمەن بيۋدجەت اقشاسىن قايدا جۇمسايمىن ەمەس, باردى باعالاي الاتىن مەنەدجەرلىك قابىلەت كۇتىلەدى. ۇلت جوسپارى بار, «100 ناقتى قادام» بەلگىلەنگەن, تەك ىسكەرلىكپەن ىسكە اسىر.
نۇرسۇلتان ءابىش ۇلىنىڭ «قازاقستاندا جۇمىسسىزدىق بولماۋى كەرەك» دەگەنى دە كوڭىلگە قوندى. ەلىمىزدە شاعىن جانە ورتا كاسىپكە وتە وڭدى جاعداي جاسالعان. ەڭبەكقور ادامدار بۇگىندە كاسىبىن دوڭگەلەتىپ, ۇلكەن پايداعا كەنەلىپ جاتىر. جاقىندا وبلىستىق كاسىپكەرلىك, يندۋستريالىق-يننوۆاتسيالىق دامۋ جانە تۋريزم باسقارماسىنىڭ باسشىسى ماقسات قارعاباەۆ شارۋالار ءۇشىن جاعىمدى جاڭالىق ايتتى. بۇرىن شارۋالار جەكە كاسىبىنە نەسيە العاندا 14 پايىزدىڭ 7 پايىزىن مەملەكەت موينىنا الىپ كەلگەن. ەندى اۋىلدىق جەرلەردە جەكە شارۋاشىلىق اشقان فەرمەرلەر 4 پايىزبەن نەسيە الادى ەكەن. بۇل دەگەن ناعىز كەرەكتى مەملەكەتتىك قولداۋ عوي.
وبلىس اكىمدىگى مەن «دامۋ» قورى شارۋالار مەن ديقاندارعا تاعى دا جەڭىلدىك جاساۋ ءۇشىن جوبا تۇزۋدە. وسىنىڭ ءبارى شىن جۇمىس جاساعىسى كەلگەن ادامعا جۇمىسىم جوق دەگىزبەيدى.
بۇل باعىتتا «نۇر وتان» پارتياسىنا ۇلكەن جاۋاپكەرشىلىك جۇكتەلىپ وتىر. ەلباسى بەلگىلەپ بەرگەن ۇلت جوسپارىن ورىنداي الساق, بۇل قازاقتىڭ كوسەگەسى بۇگىنگىسىنەن دە كوگەرەدى.
وڭعار تاجيەۆ,
«قازاقستان جولى» گازەتىنىڭ باس رەداكتورى.
وڭتۇستىك قازاقستان وبلىسى.