استانا. 29 قاڭتار. يەمەن استاناسى ادەن قالاسىندا جويقىن جارىلىس بولىپ, 8 ادام قازا تاپتى. تاعى 12 تۇرعىن ءتۇرلى دەنە جاراقاتتارىن الدى. بۇل تۋرالى 24.kz-كە سىلتەمە جاساعان egemen.kz حابارلادى.
جويقىن جارىلىس پرەزيدەنت رەزيدەنتسياسىنىڭ الدىندا بولدى. پوليتسەيلەردىڭ حابارلاۋىنشا, جانكەشتى جارىلعىش زاتتى دەنەسىنە بايلاپ, اۆتوكولىگىمەن رەزيدەنتسياعا كىرمەك بولعان. الايدا, ول دىتتەگەن جەرىنە جەتە الماي, قۇرىلعىنى قاقپا الدىندا ىسكە قوسقان.
كەيبىر جەرگىلىكتى تەلەارنالار قاستاندىقتىڭ سول ۋاقىتتا عيمارات ىشىندە بولعان ادەن قالاسىنىڭ گۋبەرناتورىنا باعىتتالعانىن حابارلاۋدا. ال جارىلىس كەزىندە پرەزيدەنت وندا بولدى ما, جوق پا, ول جاعى بەلگىسىز. بەلگىلىسى بەيبىت تۇرعىندار قازا تاپقان.
قازىرگى تاڭدا قاستاندىق ارەكەتتى «يراك پەن لەۆانت لاڭكەستىك ۇيىمى» ءوز مويىندارىنا الدى. ولاردىڭ حابارلاۋىنشا, جارىلىستىڭ سالدارىنان كۇزەت قىزمەتىنىڭ 10 ساربازى قازا تاۋىپ, 20 ادام جارالانعان.
تالعات رايىمبەك.
دەرەك, سۋرەت: egemen.kz.