استانا. 29 قاڭتار. استاناداعى تاۋەلسىزدىك سارايىندا ەلباسى – «نۇر وتان» پارتياسىنىڭ توراعاسى نۇرسۇلتان نازارباەۆتىڭ توراعالىعىمەن پارتيانىڭ كەزەكتەن تىس XVII سەزى باستالدى. بۇل تۋرالى inform.kz-كە سىلتەمە جاساعان egemen.kz ءتىلشىسى حابارلادى.
جيىنعا 2 مىڭنان اسا دەلەگات قاتىسۋدا. ولاردىڭ قاتارىندا رەسپۋبليكانىڭ بارلىق وڭىرلەرىندەگى كونفەرەنتسيالاردا سايلانعان دەلەگاتتار, مەملەكەتتىك باسقارۋ ورگاندارىنىڭ, ۇلتتىق حولدينگتەردىڭ, ءبىلىم, عىلىم, مادەنيەت جانە سپورت قايراتكەرلەرى, قوعام, ديپلوماتيالىق كورپۋس, ۇكىمەتتىك ەمەس جانە جاستار ۇيىمدارىنىڭ, بۇقارالىق اقپارات قۇرالدارىنىڭ, باستاۋىش پارتيا ۇيىمدارىنىڭ وكىلدەرى بار.
سەزدە نەگىزگى باياندامانى پرەزيدەنت جاساپ, پارتيا الدىنا جاڭا باعدارلاما اياسىندا ناقتى مىندەتتەر قويادى دەپ كۇتىلۋدە. سونداي-اق, «قازاقستان-2021. بىرلىك. تۇراقتىلىق. جاسامپازدىق" اتتى جاڭا سايلاۋالدى باعدارلاما قابىلدانباق. باعدارلاما قابىلدانعاننان كەيىن 20 ناۋرىزدا وتەتىن پارلامەنت ءماجىلىسىنىڭ سايلاۋىنا ۇمىتكەرلەردىڭ پارتيالىق ءتىزىمى بەكىتىلەدى.
ەلامان قوڭىر.
دەرەك: inform.kz.
سۋرەت: altaynews.kz.