تاراز. 29-قاڭتار. وسى اپتادا جامبىل وبلىسى, تۇرار رىسقۇلوۆ اۋدانىندا 2008 جىلى تۋىلعان جاس بالانىڭ قازاسىنا بايلانىستى قىلمىستىق ءىس قوزعالدى. بۇل تۋرالى egemen.kz ءتىلشىسى حابارلادى.
وتكەن اپتادا اسىلىپ قالعان بالا تۋرالى اقپارات تاراعان بولاتىن. ەل ىشىندە مارقۇم بالانى الدەبىرەۋ ابدەن جابىرلەپ, قورلاپ, سوڭىنان اعاشقا اسىپ كەتكەنى تۋرالى دا اڭگىمە شىقتى. كەيىنىرەك بالانىڭ اناسى ەكى بالاسىمەن ەكىنشى مارتە كۇيەۋگە شىققانى, بۇل وقيعا سول كۇيەۋىنىڭ ۇيىندە ورىن العانى انىقتالدى. 25-قاڭتار كۇنى بولعان وقيعاعا بايلانىستى وسى اپتادا قىلمىستىق كودەكستىڭ «ادام ءولتىرۋ» جانە «ناپسىقۇمارلىق سيپاتتاعى كۇش قولدانۋ ءىس-ارەكەتتەرى» بابتارى بويىنشا قىلمىستىق ءىس قوزعالدى.
تەرگەۋ جۇمىستارى كەزىندە جاس بالالارعا ءجابىر كورسەتۋ فاكتىلەرى انىقتالدى. وگەي اكە جاس بالا مەن ونىڭ قارىنداسىن ۇزاق ۋاقىت بويى قورلاپ, جابىرلەپ كەلگەن. وسىعان بايلانىستى 1980 جىلى تۋىلعان ونىڭ ۇستىنەن قىلمىستىق كودەكستىڭ ءجابىر كورسەتۋ باپتارى بويىنشا قىلمىستىق ءىس قوزعالدى.
جاس بالالارعا وتە قاتالدىق تانىتقان وگەي اكە قازىر اۋداندىق سوتتىڭ شەشىمىمەن 2 ايعا قاماۋعا الىندى.
ورالحان ءداۋىت.
دەرەك, سۋرەت: egemen.kz