جامبىل وبلىسىندا جالپى قۇنى 28,1 ملرد. تەڭگەنى قۇرايتىن 16 مەموراندۋمعا قول قويىلدى. جۇمىسشىلاردىڭ ەڭبەك قۇقىعى مەن كەپىلدىگىن قامتاماسىز ەتۋ ماسەلەسىنە قاتىستى وتكەن جيىندا اۋىل شارۋاشىلىعى مينيسترلىگىنىڭ كوميتەت توراعاسى, ءىرى كاسىپورىنداردىڭ باسشىلارى مەن كاسىپوداق كوميتەتىنىڭ ءتورايىمى جانە باسقا دا جۇمىس بەرۋشىلەر ءبىراز ماسەلەلەردى تالقىلادى.
جۇمىسشىلاردىڭ الەۋمەتتىك جانە ەڭبەك قۇقىقتارىن قامتاماسىز ەتۋ, جۇمىس ورىندارىن قىسقارتپاۋ جولدارى ايتىلدى. جيىن سوڭىندا وبلىس اكىمدىگى, كاسىپورىن باسشىلارى, كاسىپوداق كوميتەتى جانە ۇلتتىق كومپانيالار ءوزارا ىنتىماقتاستىق تۋرالى ەكى باعىتتاعى بىرنەشە مەموراندۋمدارعا قول قويدى. بارلىعى 16 مەموراندۋمعا قول قويىلسا, سونىڭ ىشىندە 6-ۋى ءىرى كاسىپورىنداعى جۇمىسشىلاردىڭ ەڭبەك قۇقىقتارىن قامتاماسىز ەتۋگە بايلانىستى. اتالعان كاسىپورىنداردا بارلىعى 20 مىڭنان استام جۇمىسشى ەڭبەك ەتەدى. ال قالعان 10 مەموراندۋم ءوندىرىس بارىسىندا جەرگىلىكتى جانە قازاقستاندىق ۇلەستى قامتاماسىز ەتۋگە ارنالعان. مەموراندۋمداردىڭ جالپى قۇنى شامامەن 28,1 ملرد. تەڭگە.
سونداي-اق, وڭىردە جۇمىسشىلار مەن كاسىپوداقتار اراسىنداعى بايلانىستى نىعايتۋ, جۇمىسشىلاردىڭ ەڭبەك قۇقىقتارىن قامتاماسىز ەتۋگە بايلانىستى كاسىپورىنمەن مەموراندۋمعا قول قويۋ ءوز جالعاسىن تاباتىن بولادى.
بۇگىنگى تاڭدا جامبىل وبلىسىندا 3952 كاسىپورىن بولسا, ونىڭ 1721-مەن نەمەسە 43,5 پايىزىمەن ۇجىمدىق كەلىسىمشارت جاسالعان.
ورالحان ءداۋىت,
«ەگەمەن قازاقستان».
جامبىل وبلىسى.