شۆەيتساريا استانادا وتكىزىلەتىن حالىقارالىق مامانداندىرىلعان ەكسپو-2017 كورمەسىنە قاتىسۋ كەلىسىمشارتىنا رەسمي تۇردە قول قويدى. بۇل تۋرالى داۆوس قالاسىندا جىل سايىنعى وتكىزىلەتىن بۇكىلالەمدىك ەكونوميكالىق فورۋم اياسىندا بەلگىلى بولدى.
كەلىسىمشارتقا «استانا ەكسپو-2017» ۇلتتىق كومپانياسى» اق-تىڭ باسقارما توراعاسى احمەتجان ەسىموۆ پەن شۆەيتساريا كونفەدەراتسياسىنىڭ سەكتسيا كوميسسارى مانۋەل سالحي قول قويدى. «شۆەيتساريانىڭ وسى ءبىر ماڭىزدى شاراعا قاتىساتىندىعىنا ءبىز وتە قۋانىشتىمىز. شۆەيتساريا بالامالى قۋات كوزدەرىن بەلسەندى پايدالاناتىن مەملەكەتتەردىڭ ءبىرى. ونىڭ ۇستىنە, بۇگىنگى تاڭدا كليماتتىڭ وزگەرۋى ورىن الىپ جاتىر. سوندىقتان ءبىز تەك ەنەرگەتيكا تاقىرىبىن عانا ەمەس, ونىڭ قورشاعان ورتاعا ىقپالى ماسەلەسىن دە كوتەرەتىن بولامىز», – دەدى ءوز سوزىندە ۇلتتىق كومپانيا باسشىسى ا.ەسىموۆ.
«ەكسپو – بۇل شۆەيتساريا ءۇشىن ەنەرگوۇنەمدىلىك پەن جاسىل تەحنولوگيالار سالاسىندا اتقارعان جۇمىسىن الەمگە پاش ەتەتىن ءۇلكەن مۇمكىندىك. ەكسپو-2017 كورمەسىنىڭ «بولاشاق ەنەرگياسى» اتتى تاقىرىبى ۋاقتىلى ءارى ماڭىزدى. دۇنيەجۇزى بويىنشا ەنەرگوتيىمدىلىك پەن بالامالى ەنەرگيا كوزدەرىن دامىتۋ ماسەلەلەرى ەرەكشە وزەكتى. بۇل رەتتە, شۆەيتساريانىڭ الەمگە كورسەتەرى كوپ», – دەدى شۆەيتساريا كونفەدەراتسياسىنىڭ سەكتسيا كوميسسارى مانۋەل سالحي.
وسى كەلىسىمشارت ارقىلى شۆەيتساريا ەكسپو-2017 كورمەسىندەگى پاۆيلونداردىڭ ءبىرىن تاڭداپ الىپ, ونىڭ قايدا ورنالاساتىندىعىن انىقتادى. ەندىگى ۋاقىتتا شۆەيتساريالىقتار پاۆيلوندارىنىڭ ىشكى مازمۇنى بويىنشا جۇمىس اتقاراتىن بولادى.
سونىمەن قاتار, استانا ەكسپو-2017 داۆوس قالاسىندا اقپاراتتىق شارالار ناۋقانىن جۇرگىزىپ جاتىر. اۆتوبۋستار مەن وتەلدەر كورمە لوگوتيپىمەن بەزەندىرىلىپ, تسيۋريح قالاسىنىڭ اۋەجايىندا ارنايى كورمە تۋرالى بەينەروليك كورسەتىلۋدە.
ايتا كەتۋ كەرەك, بۇگىنگى تاڭدا 70 مەملەكەت پەن 13 حالىقارالىق ۇيىم استانادا وتەتىن ەكسپو كورمەسىنە قاتىساتىندىعىن رەسمي راستادى.
ۇلان سانجار.