باتىرلاردىڭ باتىرى باۋىرجان مومىش ۇلى – باۋكەڭ ايتپاقشى, «سۇيەك-ەتتەن جارالعان ادام» بولعاسىن باس اۋىرىپ, بالتىر سىزداماي تۇرمايدى-اق. جاقىندا وسىنداي ءپانايى سەبەپپەن استانانىڭ №8 ەمحاناسىنا بارا قالدىق. جاماعاتىمىز دارىگەرلەر ناۋقاستاردى قابىلدايتىن كابينەتتەر الدىنداعى ۇباق-شۇباق كەزەككە مۇرنىن تىعا الماي, مازالانىپ اۋرە-سارساڭعا ءتۇسىپ جاتقاندا ءبىز بۇل كورىنىستى ۇزاق قاراپ تۇرۋعا جۇرەگىمىز شىدامايتىنىن, سابىر-ءداتىمىز جەتپەيتىنىن اڭعارىپ شەتتەي بەرگەنبىز. سودان بوس تۇرعانشا دەپ قابىرعاعا ىلىنگەن كورنەكىلىكتەرگە كوز ءجۇگىرتكەنىمىز سول ەدى, بۇل ارادا دا كوڭىلىمىز سۋ سەپكەندەي باسىلىپ قالدى.
«نەگە» دەيسىز عوي؟ وتە ورىندى سۇراق. ايتايىق. سىرتتاي قاراعاندا ادەمى كورىنەتىن ستەندكە ءتۇرلى پلاكات, جارناما, ەمدەلۋشىلەرگە ارنالعان اقىل-كەڭەستەر ءىلىنىپتى. ەڭ باسىنا ەلباسى نۇرسۇلتان نازارباەۆتىڭ ءبىر اۋىز ءسوزى كەلتىرىلىپتى. قازاق ءجانە ورىس تىلدەرىندە. قوش دەلىك. ستەند تاقىرىبىنا: «سالاۋاتتى ءومىر سالتىن قالىپتاستىرۋ» دەپ جازىلىپتى. «سالاۋاتتى» دەگەن ءسوزدىڭ قاتە جازىلعانى ءوز الدىنا. ول «سالاماتتى» بولۋى كەرەك ەدى عوي. «زدوروۆىي وبراز جيزني» دەگەنىمىز قازاق تىلىندە «سالاماتتى ءومىر سالتى» دەپ الىنىپ كەلە جاتقالى قاشان. ودان قالا بەردى, سوندا 8-ءشى ەمحاناداعى ابزال جاندار «سالاماتتى قازاقستان» باعدارلاماسىنان دا بەيحابار بولعانى ما؟
ودان ءارى ەلباسى سوزىنەن كەلتىرىلگەن سويلەمدە تاعى ءارىپ قاتەسى ءجۇر. ونى ەجىكتەپ جاتپاي-اق قويالىق. تەك بۇل سىلتەمەنىڭ سوڭىندا «قازاقستان-2030» دەپ كورسەتىلۋىنە قايران قالدىق. ويپىرىم-اي, بۇكىل قازاق ەلى, مىنە, ءتورتىنشى جىلعا قادام باستى, «قازاقستان-2050» باعدارلاماسىمەن جۇمىس ىستەپ, قيانعا قۇلاش سەرمەپ جاتقاندا, 8-ءشى ەمحانانىڭ جاراندارى بۇعان سەلت ەتپەي, شابان اتتاي شەگىنشەكتەۋى قالاي ءوزى؟.. دەگەن قىنجىلىستى وي كەشتىك. ولار نەگە ۋاقىتپەن بىرگە قادام باسپايدى, جاڭالىقتى نەگە جاتسىنادى؟ وسى سەلقوستىق, سامارقاۋلىق حالىققا ءدارىگەرلىك قىزمەت كورسەتۋ ساپاسىنىڭ تومەندەۋىنە دە اسەر ەتىپ جاتقان جوق پا ەكەن؟ ويتكەنى, ەنجارلىقتىڭ قاي ءتۇرى بولسىن ەتەكتەن تارتارى انىق قوي.
نازار قاسىم.