استانا. 22 قاڭتار. قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ ستۋدەنتتەر سارايىندا ۋنيۆەرسيتەت تۇلەگى, فيلولوگيا عىلىمدارىنىڭ دوكتورى, پروفەسسور جەڭىس سادۋاقاس ۇلىنىڭ 70 جىلدىق مەرەيتويىنا وراي «ۇلت رۋحانياتىنىڭ قاينار كوزدەرى: ءتىل مەن ادەبيەت, ءبىلىم مەن تاربيە» اتتى رەسپۋبليكالىق عىلىمي-تاجىريبەلىك كونفەرەنتسيانىڭ پلەنارلىق ءماجىلىسى ءوتتى. بۇل تۋرالى ۋنيۆەرسيتەتتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
كونفەرەنتسيا جۇمىسىنا رەسپۋبليكامىزعا بەلگىلى عالىمدار, وبلىستىڭ زيالى قاۋىم وكىلدەرى, ۋنيۆەرسيتەت وقىتۋشى-پروفەسسورلارى مەن ورتا جانە جوعارى وقۋ ورىندارىنان كەلگەن ۇستازدار, ستۋدەنتتەر, ماگيسترانتتار جانە دوكتورانتتار قاتىستى.
جيىندى اشقان ۋنيۆەرسيتەت رەكتورى, ت.ع.د., پروفەسسور قىلىشباي بيسەنوۆ: «ءوز ورتاسىندا بەدەلدى, كىشىگە قامقور, ۇلكەنگە ىزەتتى اعامىز قاشاندا ءوزىنىڭ تاعىلىمدى جولىن كەيىنگى ۇرپاققا ۇلگى ەتىپ كەلەدى. 70 جىلدىق مەرەيتوي قارساڭىندا ءوزىنىڭ جەكە كىتاپحاناسىنان ۋنيۆەرسيتەت كىتاپحاناسىنا 800 دانا ءتىل ءبىلىمى مەن ادەبيەتتانۋ عىلىمىنا قاتىستى عىلىمي ەڭبەكتەر مەن كوركەم شىعارمالاردى تارتۋ ەتۋى وسىنداي ونەگەنىڭ ءبىرى دەپ ويلايمىز», – دەدى. سونداي-اق, ۋنيۆەرسيتەت باسشىسى مەرەيتوي يەسىنە ىزگى لەبىزىن ءبىلدىرىپ, ارىپتەستەرىنىڭ اتىنان قۇتتىقتاۋىن جەتكىزدى.
كونفەرەنتسيا بارىسىندا ل.ن.گۋميلەۆ اتىنداعى ەۋرازيزيا ۇلتتىق ۋنيۆەرسيتەتىنىڭ پروفەسسورى, ف.ع.د. جانتاس جاقىپوۆ «جەڭىس جەلىسى», اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ پروفەسسورى, ف.ع.د. تەمىرحان تەبەگەنوۆ ««سىر بويى» گازەتى – سىر ءوڭىرى اقىن-جازۋشىلارى شىعارماشىلىعى قالىپتاسۋىنىڭ ىقپالدى قۇرالى», پاۆلودار مەملەكەتتىك پەداگوگيكالىق ۋنيۆەرسيتەتىنىڭ پروفەسسورى, ف.ع.د. بەكەن ساعىندىق ۇلى «ءداستۇرلى گرامماتيكا: جاقتى سويلەم تابيعاتى», ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادەستەمەلىك ورتالىعى ديرەكتورىنىڭ ورىنباسارى, ف.ع.ك. بيجومارت قاپالبەك «سينتاكسيستى تانۋداعى قايشىلىقتار» تاقىرىپتارىندا بايانداما جاساپ, ادەبيەتتانۋ عىلىمى جانە ءتىل ءبىلىمىنىڭ وزەكتى ماسەلەلەرىن ورتاعا سالدى.
كونفەرەنتسيا جۇمىسى ودان ءارى ۋنيۆەرسيتەت عىلىمي كەڭەسىنىڭ سالتاناتتى ماجىلىسىمەن جالعاستى. وندا جەڭىس سادۋاقاس ۇلىنا قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ «قۇرمەتتى پروفەسسورى» اتاعى بەرىلدى. عالىمنىڭ ونەگەلى ءومىرى مەن عىلىم جولىنداعى ەڭبەگى, ىسكەرلىك, ۇيىمداستىرۋشىلىق ەرەكشەلىكتەرى تۋرالى پروفەسسور باعدات كارىبوز ۇلى باستاعان ارىپتەستەرى مەن شاقىرىلعان قوناقتار ەستەلىكتەرىن ايتىپ, ەلىمىزدىڭ ءار تۇكپىرىنەن كەلىپ تۇسكەن قۇتتىقتاۋ حاتتار تانىستىرىلدى.
بۇگىندە پروفەسسور 3 مونوگرافيا, 7 وقۋ قۇرالى, 200-گە جۋىق عىلىمي-پۋبليتسيستيكالىق جانە ادىستەمەلىك ماقالالاردىڭ اۆتورى. ونىڭ جەتەكشىلىگىمەن 1 عىلىم كانديداتى, 16 ماگيستر ديسسەرتاتسيا قورعاعان. ال جيىن سوڭىندا قاتىسۋشىلارعا كونفەرەنتسيانىڭ عىلىمي ەڭبەكتەر جيناعى تاراتىلدى.
تالعات رايىمبەك.
دەرەك, سۋرەت: قورقىت اتا اتىنداعى قمۋ-ءنىڭ ءباسپاسوز قىزمەتى.