استانا. 22 قاڭتار. «استانا» فۋتبول كومانداسى ۋەفا ەۋروپا ليگاسىنىڭ پلەي-وفف ساتىسىندا ويناۋى مۇمكىن. ەگەر ۋەفا ءبىزدىڭ كلۋب ءۇشىن وڭ شەشىم قابىلداسا, ەلوردالىقتار بۇل تۋرنيردە تۇركيانىڭ «گالاتاساراي» كلۋبىن الماستىرادى. بۇل تۋرالى fotomac.com.tr باسىلىمىنا سىلتەمە جاساعان egemen.kz ءتىلشىسى حابارلاستى.
بۇگىندە «گالاتاساراي» كومانداسى Fair Play جۇيەسى بويىنشا قارجى قيىندىعىنا تاپ بولىپ وتىر. بۇعان دەيىن كلۋب ۋەفا تاراپىنان ەسكەرتۋ العانىمەن, ءالى كۇنگە ونى ورىنداماعان. سوندىقتان اتالعان ۇيىم ىستامبۇلدىڭ كومانداسىن ەۋروكۋبوكتىق باسەكەلەردەن شەتتەتىپ, قاتاڭ جازالاۋى مۇمكىن. ونىڭ ىشىندە اقپان ايىندا پلەي-وفف كەزەڭى باستالاتىن ەۋروپا ليگاسى دا بار. ال «گالاتاساراي» اتالعان تۋرنير شەڭبەرىندە 18 جانە 25 اقپان كۇندەرى يتاليانىڭ «لاتسيو» كومانداسىمەن كەزدەسۋى ءتيىس.
ايتا كەتەيىك, تۇركيانىڭ بۇل كومانداسى وسى ماۋسىمدا «استانامەن» چەمپيوندار ليگاسىندا ءبىر توپتا وينادى. ناتيجەسىندە «اتلەتيكو» (يسپانيا) مەن «بەنفيكا» (پورتۋگاليا) ءبىرىنشى جانە ەكىنشى ورىن الىپ, ءتۋرنيردىڭ كەلەسى اينالىمىنا جولداما الدى. ال ءۇشىنشى ورىننان كورىنگەن «گالاتاساراي» ەۋروپا ليگاسىندا ويناۋ مۇمكىندىگىنە يە بولعان ەدى. سايكەسىنشە, «استانا» توپتا ءتورتىنشى ورىن العانىن اتاپ وتكەن ءجون.
ەلامان قوڭىر.
دەرەك: fotomac.com.tr.
سۋرەت: fitness96.ru.