اتىراۋ. 22 قاڭتار. اتىراۋدا مۇنايدى زاڭسىز ساتىپ الۋ, تاسىمالداۋ جانە ساتۋمەن ۇزىق ۋاقىت اينالىسقان ۇيىمداسقان قىلمىستىق توپ ۇستالدى. بۇل تۋرالى وبلىستىق ىشكى ىستەر دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
«ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرىمەن جەدەل-ىزدەستىرۋ ءىس-شارالارىن وتكىزۋ كەزىندە مۇنايدى زاڭسىز ساتىپ الۋ, تاسىمالداۋ جانە ساتۋمەن ۇزاق ۋاقىت اينالىسىپ كەلگەن ۇيىمداسقان قىلمىستىق توپ قولعا ءتۇستى. اتالعان قىلمىستىق توپتىڭ ءوز ارەكەتتەرىن جۇزەگە اسىرىپ كەلگەن حيميالىق زاۋىت اۋماعىن تەكسەرۋ بارىسىندا, شيكى مۇناي تيەلگەن رەسەي فەدەراتسياسى ۆولگاگراد قالاسىنىڭ كوممەرتسيالىق ۇيىمىنا قاراستى ماز ماركالى اۆتوكولىگى مەن «كومپوزيتسيالىق تۇرمىستىق وتىن» ءتۇرى ەكەنىن راستايتىن جالعان قۇجاتتار انىقتالىپ, تاركىلەندى. سونىمەن قاتار, سىيىمدىلىعى ءارتۇرلى ون بەستەن استام مۇنايعا ۇقساس قارا ءتۇستى سۇيىقتىق تولتىرىلعان ىدىستار ورنالاستىرىلعان وندىرىستىك تسەح انىقتالدى. ساراپتاما قورىتىندىسىنا سايكەس, زەرتتەۋگە جىبەرىلگەن ونىمدەردىڭ مۇناي ەكەنى بەلگىلى بولدى. قازىرگى ۋاقىتتا ۇيىمداسقان قىلمىستىق توپ قۇردى جانە باسقاردى دەگەن كۇدىكپەن قازاقستان رەسپۋبليكاسىنىڭ 2 ازاماتى ۇستالدى», – دەپ حابارلادى اتىراۋ وبلىستىق ىشكى ىستەر دەپارتامەنتىنىڭ ءباسپاسوز قىزمەتى.
قازىرگى ۋاقىتتا دەپارتامەنتتىڭ تەرگەۋ باسقارماسىمەن توپتىڭ ءبىر مۇشەسىنە قاتىستى قىلمىستىق كودەكستىڭ 262-بابى 1-بولىمىمەن, تاعى ءبىر مۇشەسىنە ۇيىمداسقان قىلمىستىق توپقا قاتىسقانى ءۇشىن قىلمىستىق كودەكستىڭ 262-بابى 2-بولىمىمەن قىلمىستىق ءىس قوزعالدى. ال مۇنايدىڭ قانداي جولمەن, قايدان, قالاي الىنعاندىعى تەكسەرىلۋدە.
جولداسبەك شوپەعۇل.
دەرەك: اتىراۋ وبلىستىق ىشكى ىستەر دەپارتامەنتىنىڭ ءباسپاسوز قىزمەتى.
سۋرەت: timeskz.kz.