ارداقتى اعا, ارقالى اقىن, ايدىك ءانشى قابدىكارىم ىدىرىسوۆپەن جاقسى سىيلاس, جاقىن سىرلاس بولعان ەدىم. وتىزدىڭ ىشىندە جازۋشىلار وداعىنىڭ حاتشىسى بولىپ سايلانىپ, قازاق ادەبيەتىنىڭ قوس الىبى, قوس عابەڭمەن ىستەس بولىپ, قىزمەت كورسەتكەن قادىرلى ازامات جاس قالامگەرلەردى توڭىرەگىنە تارتىپ كوپ كومەك جاساعان-دى. وداقتان اۋىسقان سوڭ, ۇلكەن ءۇيدىڭ ۇيعارىمىمەن شىعارماشىل جاستارعا ارنالعان «جالىن» باسپاسىن ۇيىمداستىرۋدى قولعا الىپ, از ۋاقىتتىڭ ىشىندە مارتەبەسى بيىك, بەدەلدى مەكەمە قۇردى. وعان باسى «ءبىلىم جانە ەڭبەك» جۋرنالىنىڭ باس رەداكتورى قالداربەك نايمانباەۆ سياقتى كىلەڭ قارىمدى قالامگەرلەر مەن ساۋاتتى رەداكتورلاردى قىزمەتكە تارتتى. سونىڭ ارقاسىندا جازۋشى مەن ساياسي باسپالاردى ساعالايتىن قالامگەر قاۋىمنىڭ دەنى ەندى «جالىنعا» قاراي ويىستى.
اياۋلى اكەسى سولاقاي ساياساتتىڭ قۇربانى بولىپ, ون جاسىنان باستاپ تارتقان جەتىمدىكتىڭ زاردابىنان, جاستاي ارقالاعان جاۋاپكەرشىلىكتىڭ سالماعىنان جانە ۇدايى كوپتىڭ كوڭىلىن تابۋدى ويلاستىراتىن ۇيىمداستىرۋ جۇمىسىنىڭ اۋىرلىعىنان اقىن جۇرەگى ەرتە سىر بەرىپ, جەتپىسىنشى جىلداردىڭ ورتا شەنىندە اۋرۋحاناعا ءجيى ءتۇسىپ قالىپ ءجۇردى. سونداي ساتتەردىڭ بىرىندە ەكەۋمىز ءبىر بولىمشەدە, ءبىر بولمەدە جاتىپ بىرگە ەم العانىمىز بار. جۇرەكتەن اۋىرعانىنا ءبىراز بولعان اعامىز اۋرۋحانا ءدارىگەرلەرىنىڭ بارىمەن تانىسىپ, ابدەن اۋىل-ءۇي قونىپ الىپتى. جاراتىلىسىنان اقجارقىن ول كەز كەلگەن دارىگەرمەن ورتاق ءتىل تاۋىپ, ءازىل-قالجىڭ ايتىپ, شۇيىركەلەسىپ جۇرە بەرەدى. بىردە جاسى وتىزدارعا تاقاپ قالعان سۇڭعاق بويلى, سۇلۋ ءمۇسىندى اققۇبا ءبىر دارىگەر قىز كەزەكشىلىك ءمىندەتىن وتەپ, ءحالىمىزدى بىلۋگە كىردى.
قىزدى كورگەندە قاۋاڭنىڭ ءجۇزى جايناپ, كوزى ويناپ كەتتى.
– وحو! قالقام-اۋ, بۇرىن كورىنبەي قايدا جۇرگەنسىڭ؟! كەلىستى-اق قىز ەكەنسىڭ, كۇيەۋىڭ بار ما ءوزى؟ – دەپ اقىن اعا بىردەن قالجىڭعا باستى.
– قۇدا تۇسەيىن دەپ پە ەدىڭىز, باسىم بوس, – دەپ قىز دا ازىلمەن ىلە ءتۇستى. – بۇرىن كورىسپەگەنىمىز ءبىزدىڭ جۇمىس وتاشىلاردان كەيىن باستالادى. وتادان سوڭ ەس-ءتۇسسىز جاتقان سىرقاتتىڭ ەسىن جيعىزىپ, ءتىرىلتىپ الاتىن انەستەزيولوگ بولامىز.
– ءپالى, باسىڭ بوس بولسا, مىناۋ دەگەن ءبىر جىگىتپەن تانىستىرايىن. مەنىڭ ءاليحان دەگەن قۇرداسىم بار, ءوزىڭ سياقتى وتە سۇلۋ ازامات, كورەسىڭ ءالى, قىز مىنەزدى جىگىت.
– جارايدى, قىز كورەتىن جىگىتتى ءبىز دە كورەيىك اۋەلى, – دەپ ءازىلگە الدىرمايتىن دارىگەر قالجىڭداي ك ۇلىپ, قان قىسىمىزدى ولشەپ كەتە باردى. ول كەتكەن سوڭ:
– قابا, الگى جەر-كوككە سىيعىزباي سىرتىنان قالىڭدىق تاڭداپ جۇرگەن جىگىتىڭىز كىم؟ – دەپ سۇرادىم.
– ءوي, سەن بىلمەۋشى مە ەدىڭ, ءوزىڭنىڭ جەرلەسىڭ كوكشەتاۋلىق ءاليحان قازتاەۆ دەگەن دوكەي جۋرناليست. قازىر «قازاقستان» باسپاسىندا اعا رەداكتور, جاقسى اۋدارماشى, العاش «جازۋشى» باسپاسىندا اۋدارما رەداكتسياسىندا ىستەپ, قازاق وقىرماندارىن شەتەل كلاسسيكتەرىنىڭ تۋىندىلارىمەن تانىستىرۋعا اتسالىسقان قالامگەر. ورىسشاعا دا, قازاقشاعا دا جەتىك, وتە ساۋاتتى ازامات, – دەدى.
قابدىكارىم قۇرداسىنىڭ كوڭىلىن سۇراي كەلگەندە اليحانمەن العاش ەتەنە تانىسقان ەدىم. اقىن ايتسا ايتقانداي, ول شىنىندا دا ايەل زاتى كوز قيىعىن تاستاماي وتپەيتىن اسا اجارلى جىگىت ەكەن. بويى ورتادان جوعارى. ارتىق ەتى جوق. سىمعا تارتقانداي سىمباتتى, اققۇبا كىسى. وڭعا قايىرعان قارا شاشىنىڭ الدى تولقىنداپ, جازىق ماڭدايىن اشا تۇسكەن. كوپ سوزگە جوق, توقەتەرىن عانا ايتىپ ءبىر-اق قايىراتىن بىرتوعا سياقتى. قىز مىنەزدى, قوي اۋزىنان ءشوپ المايتىن مومىن ەكەنى بىردەن بايقالادى. بولعان جەردەن شىققان بولپىش, باپ ادام ەكەنى قىلاپ بوي-بىتىمىنەن-اق مەنمۇندالاپ تۇر.
قابەكەڭ ەم الۋعا كەتكەندە ەكەۋمىز وڭاشا قالىپ سۋىرتپاقتاپ سىر تارتا وتىرىپ, ءبىراز جايعا قانىقتىم. ءاليحان اتاقتى جانبوتادان كەيىن كۇرسارى كەرەيلەردىڭ بولىسى بولعان قۇنداق بايدىڭ ۇرپاعى ەكەن. اكەسى ەلى ەركەلەتىپ قازتاي اتاپ كەتكەن عابدۇلعازيز قۇنداق ۇلى اتا سالتىمەن كەيىن بۇكىل اقكول, بۇلاندى ءوڭىرىن بيلەپ, اتى اقمولا, كوكشەتاۋعا كەڭ جايىلعان اتاقتى بولىس. باي-بولىس دەسە ازا بويى قازا تۇراتىن كەڭەس وكىمەتىنىڭ كوزىنە سۇيەلدەي قادالىپ, بيلىگىمەن قوسا مال-مۇلكى تۇگەل تاركىلەنىپ, كەزىندە اتىراۋ جاققا جەر اۋدارىلعان. ودان ومبى جاققا كوشىرىلىپ, وتىز ەكىنىڭ اشارشىلىعى تۇسىندا جاناق اۋىلىندا دۇنيەدەن ءوتىپ, سۇيەگى تۋعان جەردەن ءتۇۋ الىستا قالىپتى.
اكەدەن الدى جەتى جاستا, ارتى بەسىكتە جەتىم قالعان شيەتتەي ءتورت بالامەن تاعدىر تاقسىرەتىن تارتىپ, تۇرمىس تاپشىلىعى جانىنا باتقان كوشتاي انا كۇنكورىس قامىمەن جاماعايىن قاينىلارىنىڭ ءبىرى, باستاۋىش مەكتەپ مۇعالىمى كارىبايعا تۇرمىسقا شىعىپ, ستەپنياك قالاسىنان قازىرگى التىندى (بۇرىنعى دانيلوۆكا) اۋىلىنا كوشىپ كەلەدى. قالاداعى قازاق مەكتەبىنىڭ جەتى سىنىبىن ۇزدىك بىتىرگەن ءاليحان اۋىلداعى ورىس-قازاق مەكتەبىنىڭ سەگىزىنشىسىن وتە جاقسى ءتامامدايدى. سول جىلى سوعىس ءورتى بۇرق ەتىپ, ارقاسۇيەر وتاعاسى قىس ورتاسىندا مايدانعا اتتانىپ, وتباسىنىڭ تاۋقىمەتى تاعى دا انا موينىنا ءتۇسىپ, اعايىندى ساعالاپ اقمولا جاقتاعى كالەن اۋىلىنا كوشىپ بارۋعا تۋرا كەلەدى.
بۋىنى بەكىپ, بۇعاناسى قاتپاعان ءاليحاننىڭ سوعىس جىلدارىنداعى بالالىق شاعى تىلداعى اۋىر ەڭبەكپەن ەزىلىپ, وسى اۋىلدا وتەدى. باس كوتەرەر ازاماتتاردىڭ ءبارى مايداندا. اۋىلدا قالعان كەمپىر-شال, قىز-كەلىنشەكتەرمەن بىرگە بەس-التى جاس جەتكىنشەكتىڭ ءيىنى جاستاي جانشىلىپ, ۇجىمشاردىڭ بار اۋىر جۇمىسىن اتقارۋىنا تۋرا كەلدى. مەنشىكتىڭ سيىرىن سوقاعا جەگىپ, كوكتەمدە جەر جىرتىپ, جازدا قول شالعىمەن ءشوپ شاپتى, كۇزدە ەگىن وردى, قىستا وگىز شانامەن 50 شاقىرىم جەردەگى اقكول ەلەۆاتورىنا استىق تاسىدى. وسىلاي ءۇش جىل بويى كۇننىڭ قالاي باتىپ, تاڭنىڭ قالاي اتقانىن بىلمەي بوي جازباي جۇمىس ىستەدى ول.
بۇنداي باتپان بەينەتتەن ءاليحاندى اسكەرگە شاقىرىلۋى دا قۇتقارا المادى. 44 جىلدىڭ 15 جەلتوقسانىندا تۋرا 18-گە تولعان تۋعان كۇنىندە اسكەرگە شاقىرىلعان ونى سوعىسقا ءبىردەن ءجونەلتپەي, «تىل مايدانىنىڭ جاۋىنگەرىسىڭ» دەپ اقمولا پاروۆوز دەپوسىنا ماشينيست كومەكشىسى, كوچەگار ەتىپ جىبەردى. جەڭىس كۇنىن ول ماڭداي تەرىن تامشىلاتىپ, قىپ-قىزىل بوپ جالىنداعان پاروۆوز پەشىنىڭ كومەيىنە تەمىر كۇرەكپەن كومىر لاقتىرىپ, ونى سۇيمەنمەن كومەيلەتە تۇرىپ ۇزىن جولدىڭ ۇستىندە قارسى الدى.
ايتكەنمەن جەڭىس دەگەن جەڭسىك ءسوز جاس جىگىت ءۇشىن ەركىندىكتىڭ جەلى بوپ ەستى. ەندى جۇمىستى تاستاپ وقۋىمدى جالعاستىرامىن دەپ ويلاعان ول دەپو باسشىلىعىنان جۇمىستان بوساتۋىن ءوتىندى. تەمىر جولدىڭ اسكەري تارتىپتە جۇمىس ىستەيتىنىن, ءوزىنىڭ اسكەري بورىشىن وتەپ جۇرگەنىن بىلگەن دە جوق. باسشىلارىنىڭ جوعارعى جاقتان بۇيرىق كەلگەنشە بوساتا المايمىز دەگەنىنە قاراماي, بالالىق جاساپ جۇمىسقا شىقپاي قويدى. بالالىعى شالالىق بولىپ تانىلىپ, اسكەري تريبۋنالدىڭ شەشىمىمەن مىندەتتى بورىشىن وتەۋدەن باس تارتقان قاشقىن رەتىندە التى جىلعا سوتتالىپ, قارلاگتان ءبىر-اق شىقتى. ايتەۋىر, ءۇش جىلدان سوڭ كەشىرىم جاريالانىپ, 48-ءدىڭ تامىزىندا قاماۋدان بوسادى. اۋىلدا ءبىر-اق اپتا بولىپ, اقمولانىڭ مەكتەپ-ينتەرناتىنا كەلىپ, توعىزىنشى سىنىپقا ءتۇسىپ, 50-ءشى جىلى ورتا ءبىلىمنىڭ اتتەستاتىن الىپ شىقتى. جوعارى وقۋ ورنىنا تۇسكەلى مەكتەپ جولداما بەرگەن بالالارمەن بىرگە ءبىر مۇعالىم باستاپ الماتىعا اتتانىپ بارا جاتقان جولدا (وندا پويىز ومبى, ءنوۆوسىبىر, بارناۋل ارقىلى ءجۇرەدى) اقكول بەكەتىنەن اكە ورنىنداعى اعاسىماعى ءتۇسىرىپ الىپ, اۋىلدا ەسەپشى بولىپ, وتباسىنا كومەكتەسەسىڭ دەپ ول جىلى وقۋعا جىبەرمەي قويدى. كەلەسى جىلى ناعاشىلارىنىڭ كومەگىمەن وقۋعا قايتا اتتانىپ, قازمۋ-دىڭ جۋرناليستيكاسىنا كەلىپ ءتۇستى. ءبىرىنشى كۋرستى كىلەڭ بەسكە ءبىتىرىپ, جازعى كانيكۋلعا كەلسە, كارىباي اعاسى تاعى دا توسىن سىي ازىرلەپ, قالىڭدىق سايلاپ وتىر ەكەن. بۇنىڭ نە ويى بارىن سۇراپ باس اۋىرتىپ جاتپاي, باسا-كوكتەپ اۋىلدىق كەڭەستە حاتشى بولىپ ىستەيتىن وزىمەن جاستى باعىش دەگەن قىزعا ۇيلەندىردى. بۇرىننان تانىس-ءبىلىس اۋىل قىزى عوي. شەشەمە كوز قىرىن سالار دەگەن ويمەن بۇل دا كوپ قارسىلاسپاي, ءۇي ءىشىنىڭ شەشىمىنە بويۇسىندى. كەلەسى جىلى كانيكۋلعا كەلگەندە ءاليحان بەسىكتە جاتقان تۇڭعىش ۇلى بالقايدى كوردى. اعايىن-تۋعاندار اراسىندا بىرەر اي ماۋقىن باسقان سوڭ استاناعا قايتىپ, الاڭسىز وقۋىن جالعاستىردى.
الايدا اراعا اراپشى ءتۇسىپ, ارەكەت ارالايىن دەسە قيىن ەمەس ەكەن. ءۇشىنشى كۋرستى دا كىلەڭ بەسكە تاپسىرىپ, ءاسكەري كافەدرانىڭ جاز ايلارىنداعى جاتتىعۋلارىنا قاتىسىپ, اۋىلعا بارۋعا ۋاقىتى جەتپەي قالادى. ونىڭ ۇستىنە كەيىنگى كەزدە قولىندا شەشەسى مەن ەكى جاسار قىزى بار ءبىر جەرلەس كەلىنشەكتىڭ ۇيىنە ارا-تۇرا بارىپ, شاي-پاي ءىشىپ جۇرەتىنىن باعىشتىڭ زاڭ فاكۋلتەتىندە وقيتىن ءىنىسى كورگەنى بار. كانيكۋلعا كەلمەگەن سوڭ جارىن كۇتكەن اپكەسىنە سونى داپتەتپەي مە ول. مۇنى ەستي سالا باعىش تاس-تالقان بوپ تۋلاپ, اقىلىن اشۋعا جەڭگىزىپ, حرۋششەۆتان باستاپ قوناەۆقا دەيىن, ۋنيۆەرسيتەت رەكتورىنان باستاپ پارتيا, كومسومول ۇيىمدارىن تەگىس تۇگەندەپ, ءاليحان قازتاەۆ اتىلىپ كەتكەن حالىق جاۋىنىڭ بالاسى, پاتشا زامانىندا بولىس-بي بولعان شىنجىر بالاق, شۇبار ءتوستىڭ تۇقىمى, ءوزى اسكەري بورىشىن وتەۋدەن باس تارتقان قىلمىسكەر, كەڭەس ستۋدەنتىنىڭ قاتارىندا بولۋعا قاقىسى جوق دەپ ارىزدى قارشا بوراتادى. دومالاق ارىزدىڭ باستى دا, تاستى دا جاراتىن كەزى عوي. ۋنيۆەرسيتەت باسشىلىعى قىزىل ديپلوممەن ءبىتىرىپ, عىلىم جولىنا تۇسەدى دەپ ءۇمىت ارتىپ جۇرگەن ستۋدەنتىن وقۋدان شىعارۋعا ءماجبۇر بولادى.
ەلگە قارار بەت جوق, اۋىلعا بارار نيەت جوق, جار دەگەنى جارعا جىعىپ, وكپەگە قيىپ, ءومىرىن وكسىتكەن ءاليحان الماتىدا ءبىر جىلدان استام تۇراقتى جۇمىس تاپپاي, ءار نارسەنىڭ باسىن ءبىر شالىپ ءجۇردى دە اقىرى قازاق مەملەكەتتىك كوركەم ادەبيەت باسپاسىنا كوررەكتور بولىپ كىردى. بىلىمدارلىعىن بايقاعان باسشىلىق ءتورت اي وتەر-وتپەستە رەداكتورلىققا جوعارىلاتتى. ءسويتىپ, 57-ءشى جىلى ونىڭ تابانى كۇرەكتەي قىرىق جىلعا سوزىلعان قيىن دا كۇردەلى, جاۋاپتى دا جانكەشتى قىزمەتى باستالدى. جانى جاستاي قالاعان جۋرناليستيكانى اراعا ءتورت جىل سالىپ, سىرتتاي جالعاستىرىپ, ديپلومىن تاماشا قورعاپ شىقتى. كەيىن ول ون بەس جىلداي «قازاقستان» باسپاسىندا اعا رەداكتور بولىپ, ودان رەسپۋبليكا كومپارتياسى ورتالىق كوميتەتىنىڭ جانىنداعى ماركسيزم-لەنينيزم كلاسسيكتەرىنىڭ شىعارمالارىن قازاقشا اۋدارىپ شىعاراتىن باس رەداكتسياعا اعا عىلىمي رەداكتورلىققا شاقىرىلىپ, كەڭەس وداعى تاراعانشا سوندا جەمىستى قىزمەت اتقاردى. سوڭىنان التى جىلداي «سانات» باسپاسىندا اعا رەداكتور بولدى.
جازۋشى جازادى, رەداكتور جانداندىرادى, دەگەن ءبىر قيسىن بار. جاقسى رەداكتور تۇزەيدى, جامان رەداكتور كۇزەيدى دەگەن ءسوز جانە بار. ال الەكەڭ قولجازبانىڭ جانىن كىرگىزىپ, ءارىن ەنگىزەتىن ءبىلىمدى دە بىلىكتى رەداكتور بولعان. باسپا رەداكتورلارىنىڭ اراسىنان قازاقستاننىڭ ەڭبەك سىڭىرگەن مادەنيەت قىزمەتكەرى قۇرمەتتى اتاعىن العاش العانى سونىڭ ايعاعى بولسا كەرەك. كەزىندە ول العان «قۇرمەت بەلگىسى» وردەنى مەن قازاقستان جوعارعى كەڭەسىنىڭ قۇرمەت گراموتاسى دا كەز كەلگەن قالامگەرگە بۇيىرا بەرمەيتىن مارتەبەلى ماراپات.
ارينە, مۇنداي ابىروي-اتاققا ول تەك ايانباي ەتكەن ادال ەڭبەگىنىڭ عانا ارقاسىندا جەتتى. ايتپەسە, ونى ءومىر ەركەلەتكەن جوق. تەگى جات دەپ كوزتۇرتكى ەتىپ, تىرناق استىنان كىر ىزدەگەن قىتىمىر قوعام ونى قارشادايىنان قىسپاققا سالدى. باقىتىن دا, بايلىعىن دا بىلىمنەن تابامىن دەگەن قۇلشىنىسى ۇدايى كەدەرگىگە تاپ بولىپ, ۇزىلە بەردى. ءوزىم دەگەن جارى وزىنە جاۋ بولىپ شىعىپ, العاشقى وتباسى بىت-شىت بولدى. امال جوق, وسەك-اياڭعا قولدى ءبىر سىلتەپ, كىممەن قارايساڭ, سونىمەن اعار دەپ, قينالىپ جۇرگەندە قولۇشىن بەرىپ, جىلى قاباق تانىتقان جەرلەس كەلىنشەككە ۇيلەنۋگە تۋرا كەلدى. دەگەنمەن, نيەتى ءتۇزۋ, كوڭىلى پاك ەكەن. گۇلنار بۇعان اسىلان مەن تولەش دەگەن بالپاناقتاي ەكى ۇل سىيلادى. الايدا ول بالالارىنىڭ قىزىعىن كورە الماي, 70-ءشى جىلداردىڭ باسىندا دۇنيە سالدى.
قابدىكارىم اعانىڭ قالىڭدىق ىزدەپ جۇرگەنى ءاليحاننىڭ شىن جارىنان ايىرىلىپ, ءۇش سابيمەن سوقا باسى سورلاپ جۇرگەن كەزى ەكەن عوي. اققا قۇداي جاق دەپ, ايتەۋىر وعان ادال ءسۇت ەمگەن جەمىس اتتى كىتاپحاناشى قىز كەزدەسىپ, ءۇش بالانى بىرگە كوتەرىسىپ, ەتەك-جەڭىن جيعىزىپ, ەرجەتكىزدى. ونىمەن قويماي, جەمىس ءاليحانعا شوقان, كەمەل سىندى تاعى دا تورسىق شەكە ەكى ۇل تۋىپ بەردى. 90-شى جىلداردىڭ اياعىندا كوز جانارى كۇرت ناشارلاپ, وتاعا دا, ەمگە دە كونبەي جارتىلاي زاعيپ بولىپ قالعاندا الەكەڭدى ول بالاداي ايالاپ, ماپەلەپ كۇتتى. كوز دارىگەرىنە جەتەكتەپ اكەپ, قولتىقتاپ الىپ ءجۇردى.
سونداي كۇندەردىڭ بىرىندە كوز ءدارىگەرىنىڭ قابىلداۋىندا ۇشىراسىپ قالىپ, داۋسىمنان تانىعان ءاليحان اعانىڭ:
– جازعاندارىڭدى جىبەرمەي وقىپ رازى بولىپ ءجۇرۋشى ەدىم. ەندى ودان ايىرىلدىم, – دەپ ءبىر كۇرسىنىپ الىپ, دارىگەرگە بۇرىلىپ: – التىن قالقام, مىناۋ قازاقتىڭ قازىرگى كەرەمەت ءجۋرناليسى ەكەنىن بىلەسىڭ عوي, ەندى وسىنىڭ جانارىن امان ساقتاڭدار, – دەگەنى ءالى كۇنگە دەيىن قۇلاعىمدا.
وعان دا التى-جەتى جىل بولىپ قالدى-اۋ دەيمىن. بەرتىن ولار استاناعا كوشىپ كەتىپ, حابارسىز ءجۇر ەدىم. بيىلعى جازدا جاسى توقساننىڭ تورىنە قاراي اتتاعان شاعىندا ءاليحان اعانىڭ ءومىردەن وزعانىن گازەتتەردەن وقىپ, قاتتى كۇيزەلدىم. تەگى جاقسى جامپوزعا ءوزى شىر ەتىپ دۇنيە ەسىگىن اشقان قۇنداق جەرىنەن, قازىرگى اقكول كەنتىنىڭ ماڭىنان توپىراق بۇيىرىپتى. جاتقان جەرى جايلى, توپىراعى تورقا بولىپ, يمان بايلىعىنا شۇيگىسىن. ورنىندا بار وڭالار دەيدى عوي. ارتىندا ارىستاي ءتورت ۇلى, الديار باستاعان اسىل تەكتى نەمەرەلەرى بارىندا الەكەڭنىڭ اتى ۇزاق جاسايتىنىنا سەنىم كامىل.
سارباس اقتاەۆ,
جازۋشى.