پولشا پرەزيدەنتى اندجەي دۋدا ناتو-نى شىعىس ەۋروپادا وسى ايماق پەن پولشانى «رەسەيدىڭ ىقتيمال شابۋىلىنان» قاۋىپسىز ەتۋ ءۇشىن اسكەر
مەن تەحنيكانى كوبەيتۋگە شاقىردى.
پولشا باسشىسى بريۋسسەلدە وتكەن ناتو-نىڭ شتاب-پاتەرىندە سويلەگەن سوزىندە «ءبىز ناتو اسكەرىنىڭ كوبەيگەنىن قالايمىز», – دەپتى. اليانستىڭ كەلەسى جيىنى وسى جىلدىڭ شىلدەسىندە ۆارشاۆادا وتەدى. پولشا پرەزيدەنتى, سونداي-اق, بۇل سامميتتە ناتو باسشىلارى پولشادا اليانس اسكەرلەرىن ۇزاق مەرزىمگە ورنالاستىرۋ جونىندە ءبىر شەشىمگە كەلەدى دەگەن ويىن دا اشىپ ايتتى. بىراق, ول قانشا اسكەر, قانشا تەحنيكا قاجەت ەكەنى تۋرالى ءسوز قوزعامادى. ال ناتو-نىڭ باس حاتشىسى يەنس ستولتەنبەرگ كەلەسى جيىندا پولشانىڭ ءوتىنىشى قارالاتىنىن ءبىلدىردى. «ناتو قازىر شىعىس ەۋروپادا تۇراقتى اسكەر ۇستايدى. پولشا – شىعىس ەۋروپانىڭ ءبىر بولشەگى», – دەدى ي.ستولتەنبەرگى وسى تۋرالى.
«وسكار» سىيلىعىنا قاتىستى داۋ-داماي
امەريكانىڭ كينو ونەرى اكادەمياسى «وسكار» سىيلىعى نوميناتسياسى توڭىرەگىندە تۋىنداعان داۋ-دامايعا بايلانىستى ەلەۋلى وزگەرىستەر ەنگىزۋدى قولعا الدى.
اقپارات قۇرالدارىنىڭ حابارلاۋىنشا, بۇعان كينو ءوندىرىسى سالاسىنىڭ بەلدى وكىلدەرىنىڭ نارازىلىعى باستى سەبەپ بولىپ وتىرعان سياقتى. ويتكەنى, سىيلىققا ۇسىنىلعان 20 كانديداتتىڭ ىشىندە بىردە-ءبىر قارا ءناسىلدى ءارتىس بولماعان. امەريكا كينواكادەمياسىنىڭ پرەزيدەنتى شەريال بۋن ايزەكس: «بۇل وتە كۇردەلى جانە وتە ماڭىزدى ماسەلە, – دەدى ول وسى جونىندە. – بارلىعىن وزگەرتەتىن ۋاقىت جەتتى. اكادەميا ءوز مۇشەلەرىنىڭ قۇرامىن وزگەرتۋ ءۇشىن تۇبەگەيلى قادام جاسايتىن بولادى». ال «وسكار» سىيلىعىنىڭ لاۋرەاتتارى 28 اقپاندا بەلگىلى بولادى. سالتاناتتى ءراسىم «دولبي» تەاترىندا وتەدى.
ۇكىمەت باسشىسى وتستاۆكاعا كەتتى
ماكەدونيا پارلامەنتى ەلدىڭ پرەمەر-ءمينيسترى نيكولا گۋرەۆسكيدىڭ وتستاۆكاعا كەتۋ جونىندەگى ءوتىنىشىن ماقۇلدادى.
ۇكىمەت باسشىسى باسقارۋشى كواليتسيا مەن وپپوزيتسيالىق «ماكەدونيا سوتسيال-دەموكراتيالىق وداعى» پارتياسى اراسىندا جاسالعان كەلىسىمدە كورسەتىلگەن تالاپتار بويىنشا وتستاۆكاعا كەتىپ وتىر. ەۋروپا وداعىنىڭ قولداۋىمەن جاسالعان كەلىسىمگە سايكەس, پرەمەر-مينيستر 24 ساۋىرگە بەلگىلەنگەن پارلامەنت سايلاۋىنا 100 كۇن قالعانعا دەيىنگى ارالىقتا قىزمەتىنەن كەتۋگە ءتيىس. وداقتىڭ مالىمدەمەسىندە پارلامەنت سايلاۋىنا ءوز كانديداتتارىن ەلدە ەركىن اقپارات قۇرالدارى پايدا بولعان جاعدايدا جانە داۋىس بەرۋ قۇقىعى بار ازاماتتاردىڭ ءتىزىمى قايتا جاسالعاندا عانا ۇسىنىلاتىنى كەلتىرىلگەن. كواليتسيا اراسىنداعى داۋ تۋىنداعالى ءبىراز ۋاقىت بولدى. كەلىسىمگە كەلۋ ءتۇرى كورىنبەيدى.
جۋرناليست پرەزيدەنتتى سوتقا بەردى
قىرعىزستان استاناسى – بىشكەكتىڭ ءبىرىنشى مامىر اۋداندىق سوتى جۋرناليست دايىربەك ورىنبەكوۆتىڭ ەل پرەزيدەنتى المازبەك اتامباەۆقا قارسى شاعىمىن قابىلدادى.
قىرعىزستاندىق اقپارات اگەنتتىكتەرىنىڭ حابارلاۋىنشا, پرەزيدەنت ءجۋرناليستىڭ ار-نامىسىنا تيەتىن سوزدەر ايتقان سياقتى. سوت ءجۋرناليستىڭ شاعىمىنا بايلانىستى ەكى وتىرىس وتكىزەدى. العاشقىسى مەملەكەت باسشىسىنا جانە ونىڭ اپپارات جەتەكشىسى فاريد نيازوۆقا قاتىستى بولماق. ءبىرىنشى وتىرىس 28 قاڭتارعا, ەكىنشىسى 1 اقپانعا بەلگىلەنىپ وتىر. د.ورىنبەكوۆ پەن ەل بيلىگى اراسىنداعى داۋ جۋرناليست ءوزىنىڭ ءبىر ماقالاسىندا 2010 جىلعى قاقتىعىستى پرەزيدەنت ا.اتامباەۆ پەن ونىڭ جاقتاستارى ۇيىمداستىرۋى مۇمكىن دەگەن پىكىرىنەن سوڭ باستالعان.
قىسقا قايىرىپ ايتقاندا:
قىرىم ءمۇفتيى ەميرالي ابىلاەۆتىڭ ايتۋىنشا, باقشاسارايداعى حان مەشىتىنە كۇردەلى جوندەۋ جۇرگىزىلەدى. وعان قانشا قارجى جۇمسالاتىنى ناقتى ايتىلماعان.
وسى اپتادا جاپونيادا الەمنىڭ ەڭ قارت تۇرعىنى سانالعان ياسۋتارو كويدە ومىردەن وزدى. ول 1903 جىلى 13 ناۋرىزدا فۋكي پرەفەكتۋراسىندا ومىرگە كەلىپتى.
بىرقاتار اقپارات قۇرالدارى ارگەنتينا استاناسى – بۋەنوس ايرەس ماڭىنداعى جاعاجايلاردا ۋلى جىلانداردىڭ قاپتاپ كەتۋىنە بايلانىستى ولاردىڭ جابىلعانى جونىندە حابارلادى.
32 ميلليارد دوللارمەن تولىعادى
يراننىڭ ورتالىق بانكىسىنىڭ باسشىسى ۆاليوللا سايف تەھران سانكتسيالار الىنعان سوڭ, سانكتسيا سالىنعان 32 ميلليارد دوللاردى قۇرايتىن قارجىنى قايتارىپ الۋدى جوسپارلاپ وتىر.
يران مەملەكەتتىڭ تەلەارناسىنىڭ حابارلاۋىنشا, سانكتسيالار الىنعاننان كەيىن, 28 ميلليارد دوللار بىردەن ەلدىڭ ورتالىق بانكىنە بەرىلەدى. قالعان 4 ميلليارد دوللار مەملەكەت قازىناسىنا ۇكىمەت اكتيۆتەرى رەتىندە قايتارىلماق. تاعى اتاپ وتەيىك, بۇۇ, اقش جانە ەۋروپالىق وداق يراننىڭ ورتالىق بانكىنە قارسى سانكتسيالاردى وسى جىلدىڭ 16 قاڭتارىندا يادرولىق باعدارلامالاردى شەكتەۋ تۋرالى كەلىسىم تالاپتارىن ورىنداعان سوڭ الىپ تاستاعان ەدى.
ۋكراينادان ساياسي باسپانا الدى
رەسەي ءجۋرناليسى دميتري شيپيلوۆ ۋكراينادا ساياسي بوسقىن مارتەبەسىن الدى. بۇل جونىندە جۋرناليست الەۋمەتتىك جەلىلەردە حابارلادى.
«ون ايعا سوزىلعان ەپوپەيا اقىرى اياقتالدى. بارلىعىڭىزعا راحمەت!», – دەپ جازعان ول. د.شيپيلوۆ بوسقىن مارتەبەسىن الۋ تۋرالى ءوتىنىشتى وتكەن جىلدىڭ اقپانىندا بەرگەن ەكەن. كەمەروۆ وبلىسىنىڭ تۋماسى بيلىكتەگى بىرقاتار شەنەۋنىكتەرگە «ءتىل تيگىزەتىن» جاريالانىمدارى ءۇشىن ون ءبىر اي ەڭبەكپەن تۇزەۋ مەكەمەسىندە جازاسىن وتەگەن.
تۋريست رەتىندە 19,73 ميلليون ادام بارعان
حالىقارالىق اقپارات اگەنتتىكتەرى وتكەن جىلى جاپونياعا 19,73 ميلليون شەتەل تۋريستەرى كەلگەنى جونىندە حابار تاراتتى.
كەيتي ءيسيندىڭ حاباردار ەتۋىنشە, بۇل 2014 جىلمەن سالىستىرعاندا, 47,1 پايىزدى قۇراعان. تۋريستەر, اسىرەسە, قىتايدان كوپ كەلەدى. وتكەن جىلى قىتايدان كەلگەن تۋريستەر سانى 4,5 ميلليون ادامعا جاقىندادى. 2015 جىلى وسى ەلگە قىتايدان 2,5 ميلليون ادام كەلگەن ەكەن.