«استانا» وڭىرلىك قولباسشىلىعىندا «سپاسسك» وقۋ-جاتتىعۋ ورتالىعىنىڭ بازاسىندا ۇلى وتان سوعىسىنىڭ تانكىشى ارداگەرى يسماعيل عاليۋللين جاس اسكەري قىزمەتشىلەرگە شەبەرلىك-سىنىبىن وتكىزدى.
توقسان جاسقا كەلگەنىنە قاراماستان, جاۋىنگەرلىك ماشينانى باسقارۋ داعدىسىن جوعالتپاعان ارداگەر ت-72 تانكىسىنىڭ يىنتىرەگىنە وتىردى. قازىرگى كەزدە ارميانىڭ جاراعىندا اناعۇرلىم اۋىر قۇرىشتى, قارۋ-جاراعى مەن تەحنيكالىق تۇرعىدا جابدىقتالعان زاماناۋي جاۋىنگەرلىك ماشينالار بار ەكەنىن ايتا كەتەيىك. الايدا, تانكىشى ارداگەر ءۇشىن جاڭا تەحنيكانى مەڭگەرۋ اسا ءبىر قيىندىق تۋعىزعان جوق.
يسماعيل عاليۋللين ۇلى وتان سوعىسى جىلدارى تانكىشى بولدى جانە ءوزىنىڭ قىزمەت ەتكەن جىلدارىن ەسىنە تۇسىرگىسى كەلدى. «استانا» وڭىرلىك قولباسشىلىعىنىڭ اسكەري قىزمەتشىلەرى ارداگەرگە بۇل جايتتى ەسىنە الۋعا كومەكتەستى.
ۇلى وتان سوعىسى جىلدارىندا عاليۋللين اتىشۋلى ت-34-تە شايقاستى. بۇكىل ەۋروپانىڭ شايقاسىن باستان كەشىرىپ, سوعىستى بەرليندە اياقتادى.
جاقىندا عانا ۇلى وتان سوعىسىنىڭ ارداگەرى ءوزىنىڭ 90 جىلدىعىن اتاپ ءوتتى. «استانا» وڭىرلىك قولباسشىلىعى اسكەرلەرىنىڭ قولباسشىسى, گەنەرال-مايور سۇلتان كامالەتدينوۆ ارداگەردى قۇتتىقتاپ, باعالى سىيلىق تابىس ەتتى. «يسماعيل نيعمات ۇلى, ءبىز سىزگە ۇزاق عۇمىر تىلەيمىز جانە ءارقاشان كومەكتەسۋگە دايىنبىز. ءبۇگىنگى تاڭدا ءسىز سياقتى ۇلى وتان سوعىسىنىڭ ارداگەرلەرى وتە از قالدى. ءبىز ەرلىگىڭىزدى ەشقاشان ۇمىتپايمىز», – دەدى قولباسشى ءوزىنىڭ سوزىندە.
«ەگەمەن-اقپارات».