قازاقستان رەسپۋبليكاسىنىڭ سىرتقى ىستەر مينيسترلىگىندە وسى ۆەدومستۆونىڭ باسشىلىق قۇرامىنىڭ قاتىسۋىمەن كەزەكتى كەڭەس وتىرىسى بولىپ ءوتتى.
كەڭەستە سىرتقى ساياساتتاعى ەكونوميكالىق ماسەلەلەردى ءارى قاراي كۇشەيتۋدىڭ پەرسپەكتيۆالارى, يرانعا قاتىستى حالىقارالىق سانكتسيالاردىڭ الىنىپ تاستالۋىنا وراي وسى ەلمەن ءوزارا ءىس-قيمىل جايى, شىۇ, اوسشك, تمىك, يىۇ جانە باسقا دا ۇيىمدار شەڭبەرىندەگى ءوزارا ىقپالداستىقتى دامىتۋ, سونداي-اق امەريكا, افريكا جانە ازيا ەلدەرىمەن قارىم-قاتىناستى بەلسەندى ەتە ءتۇسۋ ماسەلەلەرى تالقىلاندى.
ۆەدومستۆو باسشىسى ەلگە شەتەل ينۆەستيتسيالارىن تارتۋ بويىنشا ناقتى كۇش-جىگەردى ورىستەتۋدىڭ, شەتەلدىك ارىپتەستەردى ۇلت جوسپارىن جۇزەگە اسىرۋ شەڭبەرىندە ەل ەكونوميكاسىندا بولىپ جاتقان كەڭ اۋقىمدى جاڭعىرتۋلارعا تارتۋدىڭ, سونداي-اق وڭتايلى ىسكەرلىك كليمات قالىپتاستىرۋ بويىنشا جاسالىپ جاتقان دايەكتى شارالاردىڭ (ينۆەستيتسيالىق ومبۋدسمەن قۇرۋ مەن ينۆەستورلار ءۇشىن «ءبىر تەرەزە» قاعيداتىن ەنگىزۋ) ماڭىزىن اتاپ ءوتتى.
وسى ورايدا, ماڭىزدى شارا 20-23 قاڭتاردا داۆوستا وتەتىن كەزەكتى دۇنيەجۇزىلىك ەكونوميكالىق فورۋم بولادى. اتالعان حالىقارالىق شاراعا قازاقستاننان ۇلكەن دەلەگاتسيا قاتىسادى. فورۋمعا قاتىسۋ اياسىندا, باسقا دا ماسەلەلەرمەن قاتار, دۇنيەجۇزىلىك بانكپەن بىرلەسىپ تاياۋدا قازاقستاننىڭ Doing Business رەيتينگىندە 189 ەلدىڭ ىشىندە 12 پۋنكتكە ىلگەرىلەپ, 41-ءشى ورىنعا كوتەرىلۋىنە وراي ىسكەرلىك احۋالدى جەتىلدىرۋ بويىنشا كۇش-جىگەر جۇمساۋدىڭ تۇساۋكەسەرى ۇيىمداستىرىلادى.
يران يسلام رەسپۋبليكاسىنان حالىقارالىق سانكتسيالاردىڭ الىنىپ تاستالۋىمەن بايلانىستى قازاقستان بيزنەسى ءۇشىن جاڭا مۇمكىندىكتەر اشىلاتىنى جەكە ماسەلە رەتىندە قاراستىرىلدى. ە.ىدىرىسوۆتىڭ اتاپ وتكەنىندەي, «بۇگىندە يران توڭىرەگىندەگى جاعدايدىڭ تۇبەگەيلى وزگەرۋىن وسى ەلمەن جانە ونىڭ ترانزيتتىك الەۋەتىنىڭ اشىلۋىن ەسەپكە الا وتىرىپ, باسقا دا ارىپتەستەرمەن ءوزارا ءتيىمدى ىنتىماقتاستىقتى كەڭەيتۋ بويىنشا بارىنشا ءتيىمدى پايدالانۋ ماڭىزدى».
سىرتقى ساياسات ۆەدومستۆوسىنىڭ باسشىسى ەۋرازيالىق ەكونوميكالىق وداق (ەاەو) اياسىنداعى ينتەگراتسيالىق ۇدەرىستەردى ءارى قاراي دامىتۋدىڭ ماڭىزىن ەرەكشە اتادى. ونىڭ ماڭىزى, اسىرەسە, وداققا مۇشە بارلىق ەلدەردىڭ مۇددەسىن جانە ەاەو-عا توراعالىق ەتۋ 2016 جىلدان باستاپ قازاقستانعا وتكەنىن ەسكەرە كەلگەندە, ايتارلىقتاي ارتا تۇسەدى.
سىرتقى ساياساتتى ەكونوميالاندىرۋ بويىنشا كۇش-جىگەردى تالقىلاۋ ورايىندا قازاقستان رەسپۋبليكاسى سىرتقى ىستەر مينيسترلىگىنىڭ جەلىسى بويىنشا استانادا وتەتىن ەكسپو-2017 حالىقارالىق مامانداندىرىلعان كورمەسىنە دايىندىق جونىندەگى شارالار جايى تالقىلاندى. وسى ورايدا, سىرتقى ىستەر ءمينيسترىنىڭ ءبىرىنشى ورىنباسارى – ەكسپو كوميسسارى ءراپىل جوشىباەۆ اتاپ وتكەندەي, ۇستىمىزدەگى جىلى 3 ايعا سوزىلاتىن كورمەگە قاتىسۋشىلار قاتارىن قالىڭداتۋ بويىنشا جۇمىس جالعاستىرىلادى. ال كورمەگە قازىردىڭ وزىندە 67 مەملەكەت پەن 13 حالىقارالىق ۇيىم قاتىساتىنىن قۋاتتاپ وتىر.
ە.ىدىرىسوۆ, سونداي-اق, ۇستىمىزدەگى جىلى يسلام ىنتىماقتاستىعى ۇيىمىنا مۇشە ەلدەر مەملەكەت باسشىلارىنىڭ كەڭەسى (ىستامبۇل) مەن وسى ۇيىمعا مۇشە ەلدەر سىرتقى ىستەر مينيسترلەرىنىڭ كەڭەسىن (تاشكەنت) وتكىزۋ جوسپارلانعانىن ايتىپ ءوتتى. بۇل باسقوسۋدىڭ بۇگىندە ۋممانىڭ وزىندە ايتارلىقتاي كۇردەلى ۇدەرىستەر ءجۇرىپ جاتقان كەزدە ماڭىزى ەرەكشە ارتاتىنى تۇسىنىكتى. ال قازاقستان حالىقارالىق دەڭگەيدە ۇنقاتىسۋ مەن ءوزارا تۇسىنىستىك يدەيالارىن بەلسەندى ىلگەرىلەتەتىن مەملەكەت رەتىندە يسلام الەمىن نىعايتۋ, ونى دامىتۋ جانە الەمدىك قوعامداستىقپەن ءوزارا ءىس-قيمىلىن ارتتىرۋ ورايىندا اتالعان ۇدەرىستەردى نىعايتۋعا ءوزىنىڭ ۇلەسىن قوسۋى ءتيىس جانە قوساتىن بولادى.
بيىلعى حالىقارالىق ماڭىزدى وقيعالار قاتارىندا تامىز ايىندا برازيليادا وتەتىن جازعى وليمپيا ويىندارى بار. وسىعان بايلانىستى مينيستر اتالعان ەلگە ءبىزدىڭ سپورتشىلارىمىز بەن جانكۇيەرلەردىڭ بارۋى ءۇشىن بارىنشا وڭتايلى جاعدايلار جاساۋدى تاپسىردى.
«ەگەمەن-اقپارات».