استانا. 19 قاڭتار. جولاۋشىلار ناسىلدىك كەمسىتۋشىلىككە جول بەرگەن American Airlines اۋە كومپانياسىنان 6 ميلليون اقش دوللارىن تالاپ ەتۋدە. بۇل تۋرالى تاسس اگەنتتىگىنە سىلتەمە جاساعان egemen.kz ءتىلشىسى حابارلادى.
ءتورت امەريكالىق ازامات – ءۇش مۇسىلمان جانە ءبىر سيكح ناسىلدىك ەرەكشەلىكتەرىنە قاراي كەمسىتكەنى ءۇشىن American Airlines اۋە كومپانياسىنان 6 ميلليون اقش دوللارى كولەمىندە وتەماقى تالاپ ەتىپ وتىر. دۇيسەنبى كۇنى ولار وسىنداي ماعىناداعى تالاپ ارىزدى نيۋ-يورك قالالىق سوتىنا بەرگەن.
ارىزدانۋشىلار اۋە كومپانياسىن وتكەن جىلدىڭ جەلتوقسان ايىندا كانادانىڭ تورونتو قالاسىنان نيۋ-يورككە ۇشقالى تۇرعان ۇشاقتان وزدەرىن قىزمەتكەرلەردىڭ نەگىزسىز ءارى ەش سەبەبىن تۇسىندىرمەستەن ءتۇسىرىپ تاستاعانى ءۇشىن ايىپتاپ وتىر.
ەكيپاج مۇشەلەرى جولاۋشىلاردى تىم دورەكى تۇردە ۇيقىسىنان وياتىپ, ۇشاق سالونىن بوساتۋدى تالاپ ەتكەن. بۇل تالاپتى ءتۇسىندىرۋدى وتىنگەندە ستيۋاردتار جولاۋشىلارعا تەرمينالعا قايتا بارىپ, سول جەردە الداعى وكىمدى كۇتۋلەرىن ۇسىنعان.
«مۇنداي جاعداي ءوزىمدى ءبىر قىلمىسكەر سەكىلدى سەزىندىردى. قۇددى مەن ءبىر بيىكتە تۇرىپ, ەلدىڭ ءبارى ماعان ساۋساعىن شۇقشيتىپ, كىنالاپ تۇرعانداي بولدى», – دەپ جابىرلەنۋشىلەردىڭ ءبىرى CNN تەلەارناسىنا مالىمدەگەن. الايدا, ول ءوزىنىڭ اتى-ءجونىن جاريا ەتپەگەن. جابىرلەنۋشىنىڭ سوزىنە قاراعاندا, American Airlines كومپانياسىنىڭ وكىلى وقيعانىڭ ءمان-جايىن ۇشاق نيۋ-يورك-كە ۇشىپ كەتىپ, ءتورت جولاۋشى تەرمينالدا قالعاننان كەيىن عانا ءتۇسىندىرىپ بەرگەن.
«ءبىزدىڭ بورتتا بولۋىمىز ەكيپاج مۇشەلەرىن, اسىرەسە, كومانديرگە ىڭعايسىزدىق كەلتىرگەن. ولار جاعىمسىز جولاۋشىلاردى ءتۇسىرىپ تاستامايىنشا رەيسكە قىزمەت كورسەتۋدەن باس تارتقان», – دەيدى نيۋ-يوركتىڭ 23 جاستاعى تۇرعىنى.
ول كومپانيا وكىلدەرىنەن بۇل جاعدايعا ونىڭ بەت-ءجۇزىنىڭ قاراتورىلىعى مەن ءوزى مەن جانىنداعى جولداستارىنىڭ ساقالى قانداي دا ءبىر ءرول اتقارعانى تۋرالى سۇراعان. الايدا, American Airlines وكىلى بۇل ەرەكشەلىكتەر «وسى ىسكە ەش كومەكتەسپەگەنىن» مويىنداعان.
اۋە تاسىمالى ازىرگە تالاپ ارىز تۋرالى ەشقانداي مالىمدەمە جاساعان جوق. كومپانيا ءىستىڭ انىق-قانىعىمەن تانىسقاننان كەيىن بىردەن جاۋاپ بەرەتىندىكتەرىنە ۋادە بەرگەن. قازىرگى تاڭدا اقش-تا ناسىلدىك ەرەكشەلىكتەرى مەن ءدىني كوزقاراستارىنا قاراي كەمسىتۋشىلىك ماسەلەسى وزەكتى بولىپ تۇر. وتكەن جىلى 13 قاراشادا پاريجدە بولعان لاڭكەستىك وقيعادان كەيىن وسىعان ۇقساس جاعدايلار جيىلەپ كەتكەن. ەستەرىڭىزدە بولسا, فرانتسيا استاناسىنداعى قاندى وقيعا كەزىندە 130-دان استام ادام قازا بولعان ەدى.
ەلامان قوڭىر.
دەرەك: تاسس.
سۋرەت: Wikipedia.org.