سانكتسيا سانسىراتادى
يرانعا قارسى سانكتسيالاردى ەۋرووداق تولىق قولداپ وتىر جانە ونى جۇزەگە اسىرۋعا كىرىستى. ولار يران مۇناي-گاز سەكتورىنا ينۆەستيتسيا سالمايدى جانە وسى سالادا بۇل ەلگە تەحنولوگيالار مەن قۇرال-جابدىق ساتپايدى. يراننىڭ جەتەكشى 40 ساياساتكەرى ەۋرووداق ەلىنە كەلە دە المايدى. سونداي-اق يران بانكتەرى – ەۋروپادا, ەۋرووداق بانكتەرى يراندا قارجىلىق اۋدارىمدار جاساي المايدى. يران باسشىلىعى قانشاما داۋرىقپا مالىمدەمەلەر جاساپ, سانكتسيا وزدەرىنە تۇك ەمەس دەگەنمەن, ول بۇل ەلدىڭ ەكونوميكاسىنا ۇلكەن سوققى بولىپ تيەدى.
پرەمەر قىزمەتىنەن كەتتى
ۇكىمەت باسشىلارى قىزمەتىنەن كەتىپ جاتادى. وڭتۇستىك كورەيا پرەمەر-ءمينيسترى چون ۋن چحاننىڭ كەتۋى قىزىقتاۋ بولدى. بۇرىنعى ەل باسشىلىعىنىڭ ۇكىمەتتىڭ جارتىسىن ەل استاناسى سەۋلدەن ونىڭ وڭتۇستىگىندەگى سەچجون قالاسىنا كوشىرۋ جونىندەگى جوسپارىنا وزگەرىس ەنگىزە الماعانىنا, ياعني ونى پارلامەنتتە وتكىزە الماعانىنا ءوزىن كىنالى ساناعان. استانانى ءىشىنارا كوشىرۋگە قازىرگى پرەزيدەنت لي مەن باك تا قارسى. بۇل ارتىق قارجى جۇمساۋعا, اكىمشىلىك ساپىرىلىسقا سوقتىرادى دەيدى ولار. پرەمەردىڭ بۇل قادامى ەندى پارلامەنتتى دە ويلاندىرار.
گەنەرالداردى جىققان جانسىز
چەحيانىڭ اسكەري بارلاۋى رەسەيلىك ءبىر جانسىزدى اشكەرەلەدى. اشكەرەلەنگەن روبەرت ر. رەسەيگە قاشىپ ۇلگەرىپتى. بىراق ءوز كەزەگىندە چەحيانىڭ جوعارى شەندى ءۇش گەنەرالىن جىعىپ كەتتى. جانسىزعا ەلدىڭ ۇلكەن مەكەمەسىنىڭ ادامى ماعلۇمات بەرىپ وتىرعان ەكەن. مۇنى ەستىگەن سوڭ, پرەزيدەنتتىڭ اسكەري كەڭسەسىنىڭ باستىعى فرانتيشەك گرابال, چەحيانىڭ ناتو-داعى وكىلى يوزەف سەتلاك جانە باس شتاب باستىعىنىڭ ءبىرىنشى ورىنباسارى يوزەف پروكش دەرەۋ قىزمەتتەرىنەن كەتەتىندەرىن مالىمدەگەن.
جاسامىس اجەلەر — جاپونيادا
مىنە, شيرەك عاسىردان بەرى جاپونيا ايەلدەر جاسىنىڭ ۇزاقتىعى جونىنەن ءبىرىنشى ورىندا كەلەدى. وندا ايەلدەردىڭ ورتاشا جاسى – 86,44 جىل بولسا, ال ەر ادامداردىڭ ورتا جاسى 79,59 جىل. بۇل دا از ەمەس-اۋ, الەم ەلدەرى اراسىندا بەسىنشى ورىندا. ەلدىڭ دەنساۋلىق مينيسترلىگى الداعى ۋاقىتتا بۇل ەلدە ادامداردىڭ ورتاشا جاسى وسە تۇسەدى دەگەندى ايتادى.
ۋ سۋعا قوسىلماسىن
قىتايدىڭ سولتۇستىك-شىعىسىنداعى تسزيلين پروۆينتسياسىندا تاسقىن سۋ كەزىندە جەرگىلىكتى ەكى حيميالىق كاسىپورىننىڭ 7 مىڭ بوشكەسى سۋنگاري وزەنىنە اعىپ كەتىپتى. ونىڭ 4 مىڭى بوس ەكەن دە, 3 مىڭىندا تەز وت الاتىن ۋلى حيميكاتتار بار كورىنەدى. ۋ سۋعا قوسىلسا, وزەن بويىنداعى حالىققا قاۋىپ. اتالعان وزەن رەسەي مەن قىتايدىڭ شەكاراسىنداعى حەيلۋندزيانعا (امۋر) قۇيادى. سودان رەسەي دە شوشىپ وتىر. سوڭعى حابارعا قاراعاندا, بوشكەلەر نەگىزىنەن “ۇستالعان” كورىنەدى.
جاڭبىر جاۋدان دا جامان
پاكستاندا نوسەر جاۋىن ارقاشان بولىپ تۇرادى. بىراق ءدال وسىنداي الاپات جاۋىن سوڭعى 80 جىلدا بولماعان ەكەن. جەر دۇنيە توپان سۋعا اينالىپ كەتكەندەي. ەڭ جامانى – سول توپان سۋدان حالىقتىڭ ءبىرازى قاشىپ قۇتىلا الماپتى – سوڭعى مالىمەتكە قاراعاندا, 1100 ادام سۋعا كەتىپتى.
سىعاننىڭ دا ەلى بار
سىعانداردىڭ جۇرمەيتىن جەرى جوق, بۇلاردىڭ ەلى جوق پا دەيمىز عوي. بار ەكەن. بولگاريانىڭ ىشكى ىستەر ءمينيسترى تسۆەتان تسۆەتانوۆتىڭ مالىمدەۋىنە قاراعاندا, ونىڭ ەلى رۋمىنيامەن بىرلەسە وتىرىپ, فرانتسيادان قۋىلعان سىعانداردى وزدەرىنە قابىلداپ الۋدى قاراستىرىپ جاتقان كورىنەدى. ال رۋمىنيانىڭ پرەمەر-ءمينيسترى ەميل بوكتىڭ پىكىرىنشە, ەۋرووداق ەلدەرى سىعانداردى جان-جاقتى قىسپاققا الىپ, كەمسىتەتىن سياقتى.
ميليتسيونەر فاشيستەر
رەسەيدىڭ وڭتۇستىك ساحالين قالالىق سوتى ۇلتشىل ميليتسيونەرلەرگە, وسىندا قۇرىلعان “سلاۆيان وداعى” ەكسترەميستىك قاۋىمداستىعىنىڭ مۇشەلەرىنە ۇكىم شىعاردى. فاشيست ميليتسيونەرلەردىڭ جەتەكشىسى سانالاتىن قىلمىستىق ىزدەستىرۋ ءبولىمىنىڭ وفيتسەرى يۆان روزەنكو 4 جىلعا سوتتالسا, ۇيىمنىڭ تاعى ءبىر مۇشەسى شارتتى تۇردە 2 جىلعا كەسىلىپتى. جۇمساق جازا ولاردى رايىنان قايتارا قويماس.
ازىرلەگەن ماماديار جاقىپ.