...قالالىق فيليالدا قوعامدىق تىڭداۋ ءوتتى
“نۇر وتان” حالىقتىق-دەموكراتيالىق پارتياسى قالالىق فيليالىنىڭ ۇيىمداستىرۋىمەن “جول كارتاسى” – حالىق سەنىمى” تاقىرىبىندا قوعامدىق تىڭداۋ ءوتتى. وندا ەلباسىنىڭ تاپسىرماسىمەن قارجى داعدارىسىنىڭ الدىن الۋ ماقساتىنداعى “جول كارتاسى” باعدارلاماسى بويىنشا وتكەن جىلى بولىنگەن 3 ملرد. تەڭگەدەن استام قارجىنى يگەرۋ ناتيجەسى قورىتىندىلاندى.
تالدىقورعاننىڭ كورىكتى كەلبەتىن ساقتاۋ جانە اباتتاندىرۋ جۇمىستارى ۇزدىكسىز جالعاسۋدا. باعدارلاما اياسىندا اعىمداعى جىلى بيۋدجەتتەن 1 ملرد.95 ملن. تەڭگە ءبولىنىپ, تۇرعىن-ءۇي كوممۋنالدىق شارۋاشىلىعى, جىلۋمەن قامتۋ, كاناليزاتسيا جەلىلەرىن, جول جوندەۋ, ءبىلىم, دەنساۋلىق ساقتاۋ, سپورت, مادەنيەت سالالارى بويىنشا 15 جوبا قولعا الىنىپ, مەردىگەرلەر وسى باعىتتاعى جۇمىستارىن ۇقىپتى جۇرگىزىپ كەلەدى.
جوبانى جۇزەگە اسىرۋدا مىڭعا تارتا ادام جۇمىسپەن قامتىلىپ, 103 ادام قوسىمشا ماماندىق الۋ ءۇشىن قايتا وقىتىلۋدا. قوعامدىق تىڭداۋ بارىسىندا پارتيالىق باقىلاۋ پوستارىنىڭ جۇمىسى جوعارى باعالانىپ, كەيبىر ماسەلەلەردى ءالى دە تياناقتاۋ قاجەتتىگى اتاپ كورسەتىلدى.
كۇمىسجان بايجان, الماتى وبلىسى.
...ۇيىم توراعاسى ەسەپ بەردى
باتىس قازاقستان وبلىستىق ارداگەرلەر ۇيىمىنىڭ پلەنۋمى بولىپ, وندا ۇيىم توراعاسى ماقسوت باتىروۆ ەسەپ بەردى.
جيىن ۇلى جەڭىستىڭ 65 جىلدىعىن مەرەكەلەۋدىڭ قورىتىندىلارىنا ارنالدى.
وبلىستىق ارداگەرلەر كەڭەسىنىڭ توراعاسى م.باتىروۆتىڭ ايتۋىنشا, وبلىستا 71832 زەينەتكەر بار, ونىڭ 666-سى ۇلى وتان سوعىسىنىڭ ارداگەرلەرى, 240-ى سوعىس مۇگەدەگى. ۇلى جەڭىستىڭ 65 جىلدىعىنا وراي 240 پاتەرلىك جاڭا ۇيدەن 89 سوعىس ارداگەرى مەن ولاردىڭ جەسىرلەرىنە پاتەر بەرىلدى ءجانە اۋداندارداعى 24 سوعىس ارداگەرى جاڭا ۇيگە قونىستاندى. سونداي-اق, اۋداندا تۇراتىن 48 ارداگەردىڭ ءۇيى جوندەلىپ, 41-ءىنىڭ ۇيىنە كوگىلدىر وتىن, 39-ىنا سۋ كىرگىزىلدى.
توراعا سونداي-اق ۇلى وتان سوعىسىنا قاتىسقان باتىرلاردىڭ ەسىمى كوشەلەرگە بەرىلىپ, اۋقىمدى مەرەكەلىك شاراعا وراي ارداگەرلەرگە ۇكىمەت تاراپىنان بار سىي-سياپات جاسالعانىن اتاپ ءوتتى.
تاعى ءبىر جاعىمدى جاڭالىق, وبلىس ورتالىعى مەن اۋدانداردا الداعى جىلى ارداگەرلەر ءۇيى اشىلاتىن بولادى. بۇل ماسەلە وبلىس اكىمى تاراپىنان تولىق قولداۋ تاپقان.
تەمىر قۇسايىن, باتىس قازاقستان وبلىسى.
...جاڭا جۇلدىز اۋىلى مەرەكە وتكىزدى
وبلىستاعى جەلەزينكا اتالاتىن اۋداننىڭ اۋىلدارى ەندى اتتارىن ءوزگەرتىپ, بايىرعى اتاۋلارىنا نەمەسە جاڭا اتاۋلارعا يە بولۋدا. نوۆوكۋزمينكا دەگەن اتىمەن قوشتاسقان سونداي اۋىلداردىڭ ءبىرى جاڭا جۇلدىز دەپ اتالادى. ايتسا ايتقانداي, اۋىل ءۇشىن جاڭا ءومىر, جاقسىلىق باستالعانداي.
وسى مەرەكەنى سپورتتىق شارا بارىسىندا اتاپ ءوتۋ ءۇشىن اۋداننىڭ بارلىق اۋىلدىق اۋماقتارىنان, كورشىلەس ەسقارا, ەكىشوقى اۋىلدارىنان كەلگەن سپورتشىلار جاڭا جۇلدىز اۋىلىنا جينالدى. وسى جەردە الاۋ جاعىلىپ, اۋداندىق XX سپارتاكيادا ءوتتى. الاۋ جاعۋ قۇرمەتىنە اۋداننىڭ اتاقتى سپورتشىسى رۋسلان كامال يە بولدى. سپورتشىلار ۇلتتىق سپورت ويىندارى – قازاقشا كۇرەس, اۋدارىسپاق, توعىزقۇمالاقپەن قاتار, ۆولەيبول, فۋتبول, شاحمات, جەڭىل اتلەتيكا سياقتى سپورت تۇرلەرى بويىنشا سىنعا ءتۇستى.
فاريدا بىقاي, پاۆلودار وبلىسى.