سوڭعى كەزدە جامبىل وبلىسى ءىىد-ءنىڭ قىزمەتىندە ىلگەرىلەۋشىلىك بايقالادى. جىل باسىنان بەرگى اتقارىلعان قىزمەتكە ساراپتاما جاسالعان كەزدە, مىسالى, پوليتسيا جاساعىنىڭ جەتۋ ۋاقىتى بۇرىنعىدان جەدەلدەي تۇسكەن. بۇل كوڭىل تولارلىق جاعداي. ءويتكەنى, قۇقىق بۇزۋشى قىلمىس جاساعاننان كەيىن 10 ءمينوت ىشىندە حابارلاسىپ, پوليتسيا قىزمەتكەرلەرى وقيعا ورىن العان جەرگە جەدەل جەتىپ ۇلگەرسە, وندا قاستاندىق ارەكەتتەردىڭ 80 پايىزى ءىزى سۋىماي اشىلادى ەكەن.
ال بۇرىن “02”-گە حابارلاسۋ قيىنعا سوعاتىن, سونىڭ سالدارىنان كەزەكشى جاساقتار شاقىرىلعان جەرگە دەر كەزىندە جەتە المايتىن. قازىر بۇل قىزمەتتى كوپ ارنالى تەلەفون اپپاراتتارىنىڭ كومەگىمەن ءۇش وپەراتور ساپالى اتقارۋدا. سونىڭ ناتيجەسىندە قىلمىستىق وقيعانىڭ تاۋلىك ىشىندەگى اشىلۋى 82 پايىزدى قۇراپ وتىر. مىسالى, جىل باسىنان بەرى بەينەباقىلاۋ جۇيەسى كومەگىمەن 61 قىلمىس اشىلسا, ونىڭ ىشىندە توناۋ مەن قاراقشىلىق شابۋىل – 21, ۇرلىق 24 رەت ورىن الىپتى.
قۇقىقتىق ءتارتىپتى نىعايتىپ, ازاماتتاردىڭ قاۋىپسىزدىگىن كۇشەيتۋگە ءمۇددەلى وبلىس اكىمى ق. بوزىمباەۆ بەينەكامەرالار سانىنىڭ ارتىپ, پوليتسيا قىزمەتىنە قاجەتتى باسقا دا تەحنيكالىق قۇرال-جابدىقتاردى كوبەيتۋگە جەتە ءمان بەرىپ وتىر. بيىلعى جىلدىڭ سوڭىنا دەيىن تەحنيكالىق بازاعا تاعى 40 بەينەكامەرا قوسىلماقشى. ول بەينەكامەرالار قوعامدىق ورىندارعا, ءبىلىم بەرۋ مەكەمەلەرى ماڭىنا جانە حالىق كوپ شوعىرلاناتىن جەرلەرگە قويىلماق. كافەلەر مەن تۇنگى كلۋبتارعا بەينەكامەرالار ورناتۋ مەن مەنشىك يەلەرى ەسەبىنەن جەكە كۇزەت قۇرىلىمدارىن تارتۋ جونىندە تاراز قالاسىنىڭ اكىمى ە. استاەۆ تا جاقسى جۇمىس ىستەۋدە.
سونداي-اق, وبلىس اكىمىنىڭ باستاماسىمەن ارنايى جاساق, پاترۋلدىك جول پوليتسياسىنىڭ ساپتىق ءبولىمشەلەرى مەن مەكتەپ ينسپەكتورلارىن 200 قىزمەتكەرگە تولىقتىرۋعا اقشالاي قاراجات ءبولۋ جوسپارلانۋدا. اۆتوپاركتەگى قىزمەتتىك اۆتوكولىكتەردى 46 بىرلىككە ارتتىرۋ جانە قىزمەتتىك فورما الۋ, ءىىد-نە قاراستى عيماراتتارعا كۇردەلى جوندەۋ جۇمىستارىن جۇرگىزىپ, ماتەريالدىق-تەحنيكالىق بازاسىن كۇشەيتۋ, سونىمەن بىرگە جول پوليتسياسى باسقارماسى اكىمشىلىك عيماراتىنىڭ جاڭا قۇرىلىسىن باستاۋ جوسپارلاندى. قازىرگى تاڭدا ءىىد قىزمەتكەرلەرىنە ارنالعان كوپ قاباتتى ءۇي قۇرىلىسىنا جەر تەلىمىن ءبولۋ ماسەلەسى قاراستىرىلۋدا.
وبلىس ءىىد-ىنە كەلسەك, مۇندا ءوڭىر پوليتسياسىنىڭ باسشىسى, پولكوۆنيك ب. ايماعامبەتوۆ قوعامدىق ءتارتىپتى ساقتاۋ مەن قۇقىق بۇزۋشىلىقتىڭ الدىن الۋدى كۇشەيتۋ بويىنشا جەكە قۇراممەن ءتيىمدى ءىس-شارالار قابىلداپ, پاترۋلدىك پوليتسيا قىزمەتىن كۇشەيتۋدە جانە رەفورمالاۋدا. سونىڭ ناتيجەسىندە, ءپاترۋلدى-بەكەتتىك جاساقتىڭ بەرىكتىگى مەن پاترۋلدەۋدىڭ جاڭا مارشرۋتتارىنىڭ سانى ارتا تۇسكەن. تەرگەۋ مەن كريمينوگەندىك تەكسەرۋدىڭ باستاپقى كەزەڭىندە شۇعىل تەكسەرۋ ارەكەتتەرىن جۇرگىزۋدەگى تەرگەۋ-جەدەل توپتارىنىڭ مۇمكىندىكتەرىنە, جەكە قۇراممەن جۇرگىزىلەتىن تاربيە جۇمىستارىنىڭ, باسقارما مەن پوليتسيا ەڭبەگىندەگى عىلىمي ۇيىمداردىڭ اكتۋالدى ماسەلەلەرى دە شەشىلە باستاعان.
وبلىستا پوليتسيانىڭ بارلىق اۆتوپاركتەرىن سپۋتنيكتىك ناۆيگاتسيا جۇيەسىمەن جابدىقتاۋ ماسەلەسى دە ويلاستىرىلۋدا. سونداي-اق, ءبىراز جىل بۇرىن ءوز جۇمىسىن توقتاتقان مەديتسينالىق ساۋىقتىرۋ ورنىن قايتا اشۋ ماسەلەسى دە قاراستىرىلۋدا.
كوسەمالى ساتتىباي ۇلى. جامبىل وبلىسى.